Wiisuupulula 3:1-22
3 “Mmulepele namitthaka* a muloko wa oSardi, wira: Onihimya itthu iya tuule orina minepa 7 sa Muluku, ni orina itheneeri 7: ‘Kinnisuwela soowiira sanyu, nyuwo munikhala ntoko mwa akumi, masi muri ene ookhwa ene.
2 Nwehaweheke saana, nave mulipihe itthu sihanle, seiyo saahala okhwa, maana kihoona wira miteko sanyu khasivariwe voomalela ohoolo wa Muluku aka.
3 Tivo, muupuweleke itthu mwaakhenle anyu ni mwiiwale anyu, nave mweetteleke seiyo ni murukunuxe murima. Mweekeekhai, mwaahiwehaweheke, miyo kinimoorwa ntoko latarau, nave khamunrowa osuwela ewoora kinirwa aka.
4 “‘Vano, aakhala atthu vakhaani* oSardi, yaawo ahinanarinhe malaya aya, ni anrowa weetta ni miyo awanre ene malaya ootteela, okhala wira anniphwanelela.
5 Nto, ole onrowa oxintta onoowara malaya ootteela, nave nkinrowa-tho ottipiha nsina nawe muliivuruni mwa okumi. Masi, kinoohimya ohoolo wa Atiithi ni wa malaikha aya wira kinnisuwela nsina nawe.
6 Ole orina maaru oowiiwa, iiweke ele munepa woowaarya onihimeerya aya miloko’.
7 “Mmulepele namitthaka* a muloko wa oFiladelfia, wira: Onihimya itthu iya tuule oowaarya, yoowo ori eekeekhai, orina ixaavi sa Davidi, onihula mukhora wira mutthu mukina ohiwale, ni oniwala mukhora wira mutthu mukina ohihule:
8 ‘Kinnisuwela soowiira sanyu. Moone! Koohula mukhora ohoolo wanyu, yoowo ohiniwerya owaliwa ni mutthu mukina. Nave, koosuwela wira murina ikuru vakhaani, ni moosuka nuulumo naka, ni muhooniherya ororomeleya wa miyo.*
9 Mwiiwe! Ale a esinagoga* ya Satana, anootha ahimyaka wira ayuda, masi ahikhanle ayuda, kinoowiiriha orwa ni wuurama* ohoolo wanyu, ni kinimwaasuweliha wira kinnoophentani.
10 Okhala wira muheettela ele mwiiwale anyu sa ovilela waka,* kinimoosukani ewoora yooweehereriwa, weiwo onrowa wiiraneya elapo yotheene, wira yeehereriwe atthu otheene anikhala mulaponi.
11 Miyo kinnoorwa voohipisa. Nvarexexeke saana ele murina anyu, wira ohikhale mutthu onrowa owaakhani etthuvo* anyu.
12 “‘Ole onrowa oxintta, kinoomukhaliha ntoko epilaari ya mutemplo mwa Muluku aka, nto khonrowa-tho okhumela ota. Nave, kinoomulepa nsina na Muluku aka, ni nsina na epooma ya Muluku aka, eyo piiyo, Yerusalemu a Niinaano, yoowo onikhuruwa wiirimu, okhumaka wa Muluku aka, ni kinoomulepa nsina naka na niinaano.
13 Ole orina maaru oowiiwa, iiweke ele munepa woowaarya onihimeerya aya miloko’.
14 “Mmulepele namitthaka* a muloko wa oLawodiseya, wira: Onihimya itthu iya ti Amen, namoona oororomeleya ni eekeekhai, yoopattuxiwa yoopaceryexa ya Muluku:
15 ‘Kinnisuwela soowiira sanyu, wira nyuwo khamuhiyo ooriirya nnakhala ooviha. Kaaniphavela muri ene ooriirya aahiiso ooviha.
16 Masi okhala wira munlikana ni maasi ookhuttihiwa, eyo piiyo, khamuhiyo ooriirya nnakhala ooviha, kinrowa owuumulani mwaano mwaka.
17 Nyuwo munihimya wira: “Miyo koothaaciri, kookhalana mihakhu sinceene ni khiivo etthu enikithowa”. Masi, khamunisuwela wira mwa mutthu ohinihakalala, oomoriha ikharari, oohaawa, ohinoona, ni ohiwanre etthu.
18 Tivo, kinnoovahani miruku wira, muthume ni miyo eweero ereerihiwe ni mooro, wira muthaaciri. Muthume ni miyo malaya ootteela, wira nware etthu, ni muhuuliwe muru mwaha woohiwara etthu. Nave, muthume ni miyo murette wa maitho wira muttikitthele mmaithoni mwanyu, nweryeke woona saana.
19 “‘Otheene ale kinaaphenta aka, kinniwooniherya vatthenke aya ni kinnaattaruxa. Tivonto, mukhalaneke nthiti ni murukunuxe murima.
20 Moone! Miyo kiheemela vamukhora, kinamana. Akhala mutthu onrowa wiiwa nsu naka, nto onahula mukhora, miyo kinookela mpaani mwawe, nave nnimoolya hoothe yoolya ya ohiyu.
21 Ole onrowa oxintta, kinoomweemererya okilaathi ni miyo veehiceni vaka, siisaale miyo kixinttale aka kikilaathi ni Tiithi aka, veehiceni vawe.
22 Ole orina maaru oowiiwa, iiweke ele munepa woowaarya onihimeerya aya miloko’”.
Inoota
^ Ekereku, “nlaikha”.
^ Ekereku, “masina vakhaani”.
^ Ekereku, “nlaikha”.
^ Ekereku, “wa nsina naka”.
^ Nwehe Moolumo Ootthokiheriwa.
^ Aahiiso, “okokhora”.
^ Aahiiso, woonasa wene: “mootthara ntakiheryo na ovilela waka”.
^ Ekereku, “ekhara”.
^ Ekereku, “nlaikha”.
