Wiisuupulula 9:1-21
9 Vano, nlaikha na neethanu naahoopa nlope naya. Nto kaahiweha etheneeri emosa yaakhuma wiirimu emorelaka vathi. Muluku aahivaha etheneeri eyo exaavi ya nlitti noowiixa.
2 Eyo yaahihula nlitti noowiixa, nto mulittini-mmo waahikhuma mwiixi waalikana ni mwiixi wa eforno yuulupale, nave nsuwa vamosa ni epheyo saahiriipihiwa ni mwiixi wa mulittini-mmo.
3 Mmwiixini-mmo saahikhumelela isoope, khumwareela mulaponi. Isoope iyo, saahivahiwa owerya waalikana ni owerya wa awalisi* a mulaponi.
4 Iyo saahileeliwa wira sihihonone malaxi a mulaponi, nnakhala miri mikithi ni miri sikina. Masi saarummwale waahonona paahi ale yahaarina ekanyeryo ya Muluku vayuuci vaya.
5 Nave, isoope iyo saahivahiwa owerya wira saahaaxe atthu awo miyeeri 5, ohiya owiiva. Nave, ohaaxa waya waalikana ni owereya mutthu onoona awe alummwa ni walisi.*
6 Mahiku awo, atthu anrowa ophavelaka okhwa masi khanrowa owerya. Nave, anrowa wunlelaka okhwa, masi okhwa onrowa waatthyawaka.
7 Mukhalelo wa isoope iyo, waalikana ni ikhavalo silokiheriwe orowa okhottoni. Vamuru vaya, saahikhala itthu saakhala ntoko ikhara sa eweero, nave owiitho waya waalikana ni owiitho wa mutthu.
8 Masi ikharari saya, saalikana ni ikharari sa athiyana. Maino aya, yaalikana ni maino a kharamu.
9 Nave yaahiwara vapeeto,* etthu yaalikana ni yoowara ya eyuuma enikhapelela epeeto.* Nave, onyakula wa mapupha aya, waalikana ni onyakula wa ikaaro sinipuruliwa ni ikhavalo, sinitthimakela okhottoni.
10 Nave-tho, iyo sookhalana miila sirina etthu eniluma ntoko awalisi,* ni miila iyo soovahiwa owerya wa waahaaxa atthu miyeeri mithanu.
11 Iyo sookhalana mwene, eyo piiyo, nlaikha na nlitti noowiixa. Nsina nawe na eheeberi ti Abadoni,* masi nsina nawe na ekereku ti Apoliyoni.*
12 Yootakhala emosa yoovira. Mwiiwe! Nuumala itthu iya, sinookhumelela-tho sootakhala sikina piili.
13 Nlaikha na neethanu namosa naahoopa nlope naya. Nto kaahiiwa nsu nikhumaka mmanyakani mwa altaari a eweero, yoowo ori ohoolo wa Muluku,
14 nihimeeryaka nlaikha na neethanu namosa, nenlo naarina nlope, niiraka: “Mutaphule malaikha maxexe atthukweliwe muro muulupale, Eufrate”.
15 Vano yaahitaphuliwa malaikha ale maxexe, yaawo yaalipelela ewoora, nihiku, mweeri, ni eyaakha, wira yiive mpantta wa neeraru wa atthu.
16 Miyo kaahiiwa nummuru naya. Nummuru na atoropa yeettiha ikhavalo iyo, naari imilyau 200.
17 Enamuna kaawenhe aka ikhavalo iyo ni anakhavalo aya, tiila: Anakhavalo awo yaahiwara yoowara ya eyuuma enikhapelela epeeto,* yooxeerya ntoko mooro, yooripelela,* ni ya ncano.* Miru sa ikhavalo iyo, saalikana ni miru sa akharamu, nave mwaano mwaya waanikhuma mooro ni mwiixi ni enxoofere.
18 Mpantta wa neeraru wa atthu, waahiiviwa ni ihasara iye tthaaru, saakhuma mwaano mwa ikhavalo iyo. Ihasara sene tiiya: mooro, mwiixi, ni enxoofere.
19 Owerya wa ikhavalo iyo, ori mwaano mwaya ni mmiilani mwaya, maana miila saya sinlikana ni inowa, nave sookhalana miru. Nto ni miila seiyo, sinniwooniha owereya atthu.
20 Masi atthu akina yaahanle, yaawo yahiiviwe ni ihasara iye, khiyaattharunwe miteko saya. Awo khiyaahiyale okokhorela malaikha ootakhala, ni ilatarato sa eweero, sa eparatha, sa ekoopiri, sa maluku, ni sa miri, seiyo sihinwerya woona, nnakhala wiiwa, hata weetta.
21 Atthu awo, khiyaattharunwe owiiva akhwaaya, khiyaahiyale okhwiri, orupihana woohiloka,* ni wiiya.
Inoota
^ Aahiiso, “makharanace”.
^ Aahiiso, “nikharanace”.
^ Aahiiso, “vatthirima”.
^ Aahiiso, “etthirima”.
^ Aahiiso, “makharanace”.
^ Nintaphulela “Opwetexa”.
^ Nintaphulela “Mulipa-oopwetexa”.
^ Aahiiso, “etthirima”.
^ Aahiiso, “asuuli”.
^ Aahiiso, “amareelu”.
^ Ekereku, porneía. Nwehe Moolumo Ootthokiheriwa.
