Yakobo 1:1-27
1 Miyo Yakobo, murumeyi a Muluku ni a Pwiya Yesu Kristu, kinnikhomasa maloko 12 amwarenle mulaponi motheene.
2 Axinnaka, mutteeliweke murima, okathi muneehereriwa anyu mwa inamuna soovirikana,
3 maana munnisuwela wira waamini wanyu weehereriwaka, onnikumiherya ovilela.
4 Masi muhiye wira ovilela omaliherye muteko aya, wira mukhale oomalela ni oohittheka mwa inamuna sotheene, ehoothowakani etthu.
5 Nto akhala mutthu ohirina ankhili, ohihiyeke onvekela Muluku, okhala wira owo onnivaha ni murima wotheene, ohipwapwaka;* tthiri ononvaha mutthu owo ankhili.
6 Masi othipeleleke ovekela ni waamini, ohihoveryaka* etthu, maana ole onihoverya, onlikana ni mawimpi a mphareya anipuruliwa ni epheyo, ekelihiwaka khula mpantta.
7 Tthiri, mutthu owo ohilipeleleke ovahiwa etthu ni Yehova;
8 okhala wira khonisuwela oniphavela awe, ni khonitthareya.
9 Masi munna oothoiwa otteeliweke murima,* okhala wira Muluku onoomukhaliha muulupale,
10 nave ole oothaaciri otteeliweke murima mwaha wa oyevihiwa, maana owo onoolakaseya* ntoko ithutu sa mutakhwani.
11 Siisaale nsuwa nnoopa aya, nnanyaaliha mwiri,* ithutu saya sinamora, nave oreera waya onalakaseya, siiso-tho thaaciri onrowa omala-mala hoothe ni miteko sawe.
12 Mutthu onivilela eehereriwaka, onnihakalala, mwaha woowi awerya ovilela yoweeha eyo, onimwaakhela etthuvo* ya okumi, Yehova aaleihenrye awe ale ahinihiya omphenta.
13 Okathi muneehereriwa anyu, muhihimye wira: “Muluku tonikeehererya”. Tthiri Muluku khoneehereriwa ni itthu sootakhala, nave owo khonimweehererya mutthu ni itthu sootakhala.
14 Khula mutthu onneehereriwa ni ophavela wawe sootakhala, weiwo onimoototha, onamuhapuxa.
15 Vano ophavela iwo sootakhala wannuwa, onnikumiherya etampi; nto etampi eyo yapakiwa, enniphwanyiha okhwa.
16 Annaka oophentiwa, muhootothiwe.
17 Soovaha sotheene sooreera ni soomalela, sinikhuma wiirimu. Iyo sinivahiwa ni Tiithi opattunxe mithuko sa wiirimu, yoowo ohiniturukeya ntoko muuttutthi.
18 Owo tophavenle onipattuxa ni nuulumo neekeekhai, wira nikhale ntoko mihokorokho soopacerya, mwa sotheene sipattunxe awe.
19 Annaka oophentiwa, musuweleke wira: Khula mutthu ohaana waakuva wiiwa, opisa olavula, ni opisa onanariwa,
20 maana onanariwa wa mutthu khonikumiherya exariya ya Muluku.
21 Tivonto, muhiye makhalelo otheene oonanara ni sootakhala sotheene.* Nave, moowiiyeviha* mweemererye wira masu a Muluku yaawo aniwerya owoopolani, akhale mwa nyuwo.
22 Masi, mukhaleke atthu aneettela masu awo, ohiya alipa-oowiiwa paahi, mwiiwokaka ni muupuwelo woowootha.
23 Tthiri, ole oniiwa masu khuhineettela, onlikana ni mutthu oniweha owiitho wawe vaxipelyuni.*
24 Nuumala wiiweha, onnirowa, khuliyala niinaano-ru moota siri awe.
25 Masi ole onitokosa nlamulo noomalela nimphwanyiha otaphuwa, oneettela oratteene ni omaliherya nlamulo nlo, ohiya wiiwa paahi khuliyala niinaano-ru, onoohakalala mwaha wa yeeyo.
26 Akhala mutthu onuupuwela wira onnimukokhorela Muluku,* masi ohinawerya okasoopa* saana nlumi nawe, mutthu owo onniiwoka, nave okokhorela wawe ti weethiru.
27 Enamuna yookokhorela* yooloka ni yoohinanarihiwa vamaithoni va Muluku, Tiithi ihu, tiila: okhapelela ikwaasuni ni waakhapelela athiyana anaamukhweli moohaawani mwaya; nave okhootta onanarihiwa ni olumwenku ola.
Inoota
^ Aahiiso, “ohiphavelaka mathowa”.
^ Aahiiso, “ohaanyiheryaka”.
^ Ekereku, “iittottopeke”.
^ Aahiiso, “onimookhwa”.
^ Aahiiso, “munyepu”.
^ Ekereku, “ekhara”.
^ Aahiiso, woonasa wene: “waatta wa sootakhala”.
^ Aahiiso, “moomaala”.
^ Aahiiso, “valoolani”.
^ Aahiiso, “onneettela etiini”.
^ Aahiiso, “weettiha”.
^ Aahiiso, “Etiini”.
