Yohani 10:1-42
10 Yesu aahihimya wira: “Tthiri, kinooleelani ekeekhai wira, ole onikela munsisini mwa ipwittipwitthi ohiviraka vamukhora, masi otuphaka exiri, mutthu owo latarau.
2 Vano, ole onikela munsisini oviraka vamukhora, tokhanle makampusi a ipwittipwitthi.
3 Kwarta onnimuhulela yoowo, nave ipwittipwitthi sinniiwa nsu na makampusi owo. Owo onniihana ipwittipwitthi sawe oromolaka nsina, ni onnikumiherya vate.
4 Nuumala okumiherya vate ipwittipwitthi sawe sotheene, owo onnihoolela, nave iyo sinnimutthara, okhala wira sinnisuwela nsu nawe.
5 Ipwittipwitthi khasinimutthara mutthu sihinimusuwela aya, masi sinoomutthyawa, maana khasinisuwela nsu na mutthu owo”.
6 Yesu aahaahimeerya nlikanyiho nla, masi awo khiyaiwexenxe etthu aaleela awe.
7 Yesu aahihimya-tho wira: “Tthiri, kinooleelani ekeekhai wira, miyo ka mukhora wa ipwittipwitthi.
8 Otheene ale yaihimya okhala amakampusi eekeekhai, ti alatarau. Nto, ipwittipwitthi khisaawiiwelenle.
9 Miyo ka mukhora. Ole onikela munsisini oviraka mwa miyo, onimoopowa. Owo onookelaka ni okhuma, ni onoophwanyaka yoolya.
10 Latarau onrweela wiiya, wiiva ni ohonona paahi. Miyo kihoorwa wira atthu akhalane okumi woomalela.
11 Miyo ka makampusi ooreera murima. Makampusi ooreera murima onnileva okumi awe mwaha wa ipwittipwitthi sawe.
12 Vano namuteko oniliviwa, yoowo ohikhanle makampusi, nave ipwittipwitthi sihikhanle sawawe, okathi onoona awe mwiici orwaaka, onnihiya ipwittipwitthi, onatthyawa. Vano mwiici onnivara ipwittipwitthi iyo ni onnimwarya-mwarya.
13 Owo khonikhapelela ipwittipwitthi iyo, okhala wira namuteko oniliviwa paahi.
14 Miyo ka makampusi ooreera murima. Kinnisuwela ipwittipwitthi saka, nave iyo sinnikisuwela,
15 siisaale Tiithi onikisuwela awe ni miyo kinimusuwela aka Tiithi. Miyo kinnileva okumi aka mwaha wa ipwittipwitthi saka.
16 “Kookhalana-tho ipwittipwitthi sikina sihikhanle sa nikoto* nenla. Seiyo-tho kihaana othukumanya, nave iyo sinrowa owiriyanaka nsu naka. Sinrowa okhala nikoto nimosa ni okhalana makampusi mmosa.
17 Tiithi onnikiphenta, okhala wira kooleva okumi aka wira kaakhele vasya.
18 Khuuvo mutthu onikaakha okumi aka, masi miyo kinnileva voohikhanyereriwa. Miyo kookhalana owerya wooleva okumi aka, nave kookhalana owerya woowaakhela vasya. Ti siiso Tiithi aka okirumme awe”.
19 Ayuda yaahikawanyeya-tho mwaha wa moolumo ala.
20 Anceene a yaawo, yaanihimya wira: “Ola ookhalana nlaikha nootakhala ni onikhwa anepa. Xeeni muninwiriyana anyu?”
21 Akina yaanihimya wira: “Ala khahiyo moolumo a mutthu orina nlaikha nootakhala. Niireke nlaikha nootakhala ninniwerya otthukula maitho a atthu ahinoona?”
22 Okathi owo, oYerusalemu naahikhala Niira Nootthapela.* Yaari eyiita,
23 nto Yesu iira eettaka mutemplo, nipuro naihaniwa Niphiryo na Salomoni.
24 Vano, ayuda yaahimurukurerya Yesu, anahimya wira: “Munrowa onihiya naanyiheryaka mpakha silini? Mwaari Kristu, munileele, muhinikhuwe”.
25 Yesu aahiwaakhula oriki: “Miyo kihooleelani, masi nyuwo khamunikupali. Miteko kinivara aka mwa nsina na Tiithi aka, sinnikikhalela onamoona.
26 Nyuwo khamunikupali, okhala wira khamuhiyo ipwittipwitthi saka.
27 Ipwittipwitthi saka sinniiwa nsu naka, ni miyo kinnisuwela. Nave iyo sinnikitthara.
28 Miyo kinnivaha ipwittipwitthi iyo okumi woohimala, nave khasinkhala-khala sipwetexiwaka. Khuuvo onrowa okuxa mmatatani mwaka.
29 Ipwittipwitthi Tiithi aka okivanhe awe, ti sa faita yuulupalexa ovikana itthu sotheene, nave khuuvo oniwerya okuxa mmatatani mwa Tiithi.
30 Miyo ni Tiithi nihiiraana”.*
31 Ayuda yaahitthikela-tho ottotta maluku wira anvonye Yesu.
32 Vano Yesu aahaaleela wira: “Miyo koowooniheryani miteko sinceene sooreera sinikhuma wa Tiithi. Eriyari ya miteko iya, muniphavela okivonya maluku mwaha wa muteko xeeni?”
33 Ayuda yaahimwaakhula wira: “Hiyo khahiyo nnoovonyani maluku mwaha wa muteko wooreera, masi mwaha wa onveeha Muluku, maana muniipaka okhala muluku, muri ene pinaatamu”.
34 Yesu aahaahimeerya wira: “Munlamuloni mwanyu voolempwa so: ‘Muluku oohimya wira: “Nyuwo mwa amuluku”’,*
35 nave noosuwela wira Soolempwa, khasiniturukiwa. Nto, vakhala wira Muluku oowiihana ale alamuliwe munuulumoni mwawe okhala ‘amuluku’,
36 niireke vannikhalela ohimya wira ‘Nyuwo muninveeha Muluku’, mwaha woowi koohimya wira ‘Miyo ka Mwaana a Muluku’, nnaamwi kitteelihiwe ene ni kirummwale ene ni Tiithi?
37 Kaahivareke miteko sa Tiithi aka, muhikikupali.
38 Masi kaavaraka seiyo, nnaamwi muhikikupaliki, mukupaliki miteko seiyo. Siiso, munoosuwela ni munookupaliki wira Tiithi ohiiraana ni miyo, nave miyo kihiiraana ni Tiithi”.
39 Nto awo yaahiphavela-tho onvara, masi Yesu aahikhuma opuro ole.
40 Vano Yesu aahihokolowela-tho ekhopela ekina ya muro Yordani, weiwo Yohani aapatisa awe atthu khalai. Nto aahikhala weiwo.
41 Atthu anceene yaanirowa vaari awe Yesu, anahimeeryana wira: “Yohani khopanke mwiiriirya nnakhala mmosa, masi itthu sotheene olavunle awe omuhimyaka mulopwana ola, ti seekeekhai”.
42 Siiso, opuro ole, atthu anceene yaahimwaamini Yesu.
Inoota
^ Aahiiso, “nsisi”.
^ Niira nla (Eheeberi, chanukkah), naatthapeliwa woopowa wa ayuda olamulelo wa asiiria ni akereku, nave-tho naatthapeliwa otthikela ovahereriwa Yehova etemplo ya oYerusalemu.
^ Aahiiso, “Miyo ni Tiithi nri mmosa”.
^ Aahiiso, “munlikana ni muluku”.
