Yohani 11:1-57
11 Vano, aahikhala mulopwana mmosa aawereiwa, yoowo aihaniwa Laazaro, aakhala oBethania, muttetthe wa Maria ni muulupale awe, aihaniwa Marta.
2 Ola, ti Maria yoole aamuhenle Pwiya makhura oowunkhela, ni uuminhe inawu sa Pwiya ni ikharari sawe. Owo aari murokorawe Laazaro.
3 Tivo, axirokorawe Laazaro yaahiruma ohimeeriwa Yesu wira: “Pwiya, mpatthani inyu yoole munimphenta anyu, onoowereiwa”.
4 Yesu vaiwale awe siiso, aahihimya wira: “Eretta eyo kheniruuha okhwa, masi enrowa onvuwiha Muluku, nave-tho Mwaana a Muluku onrowa ovuwihiwa mwaha wa yeeyo”.
5 Yesu aanimphenta Marta, Maria ni Laazaro.
6 Masi, Yesu vaiwale awe wira Laazaro anwereiwa, aahikhala-tho mahiku manli nipuro nenle aari awe.
7 Nuuvira mahiku awo manli, aahaahimeerya awiixutti awe wira: “Nrowe nitthikele oYudeya”.
8 Awiixutti awe yaahimukoha wira: “Rabi,* mahiku vakhaani avinre, atthu a oYudeya yaaphavela woovonyani maluku. Vano munitthikela-tho weiwo?”
9 Yesu aahiwaakhula oriki: “Kiira othana orina iwoora 12? Mutthu yoole oneetta othana, khonikwattula etthu, maana onnoona muthuko onimwaleela elapo.
10 Masi ole oneetta ohiyu, onnikwattuliwa, okhala wira khorina muthuko mwa yoowo”.
11 Nuumala ohimya itthu iya, Yesu aahincererya oriki: “Mpatthani ihu Laazaro onoorupa, masi kinrowa weiwo kanvenxe”.
12 Awiixutti yaahimuhimeerya wira: “Pwiya, akhala wira owo onoorupa, onookhala saana”.
13 Masi, Yesu aahimya okhwa wa Laazaro. Vano awiixutti awe yuupuwela wira aahimya orupa wa ikhove.
14 Siiso, Yesu aahaahimeerya oratteene, oriki: “Laazaro ohookhwa.
15 Nave kinnitteeliwa murima mwaha woowi nkaakhanle wuuwu, okhala wira ele enrowa aka opaka, enoolipiha waamini wanyu. Nrowe weiwo ori awe”.
16 Vano Tome, yoowo aihaniwa Maphapo, aahaahimeerya awiixutti akhwaawe wira: “Ni hiyo nrowe, wira nakhwe vamosa ni Yesu”.
17 Okathi Yesu aaphiyale awe, aahoona wira yaahivira mahiku maxexe Laazaro ovithiwe ene mmahiye.
18 OBethania ni oYerusalemu waarekamelanne etthu yoowiiraka ikiloomo tthaaru* paahi.
19 Nto ayuda anceene yaahirwa ommaaliha Marta ni Maria mwaha wookhweliwa murokoraya.
20 Marta vaiwale awe wira Yesu aanirwa, aahirowa okumana nuuwo, masi Maria aahanle owaani.
21 Nto Marta aahimuhimeerya Yesu wira: “Pwiya, mwaari vaava, murokoraka khaarowa okhwa.
22 Hata vari siiso, kinnaamini wira khula etthu eninvekela anyu Muluku, owo onimoovahani”.
23 Yesu aahimuleela wira: “Murokorinyu onoohihimuxiwa”.
24 Marta aahimwaakhula oriki: “Miyo koosuwela wira onoohihimuxiwa nihiku nookiserya”.
25 Vano Yesu aahimuhimeerya wira: “Miyo ki ohihimuwa ni okumi. Ole onikaamini, hata okhwaaka, onookhala-tho mukumi.
26 Nave-tho, otheene yaale ari akumi ni anikaamini, khanikhala-khala akhwaaka. Kiireke munnikupali etthu ela?”
27 Marta aahimwaakhula Yesu wira: “Aayo, Pwiya! Miyo kinnikupali wira nyuwo mwa Kristu. Nyuwo mwa Mwaana a Muluku, yoowo Muluku aahimyale awe wira aamoorwa moolumwenkuni”.
28 Nuumala olavula siiso, Marta aahirowa omwiihana Maria, onamuhimeerya wiiphiini wira: “Mwiixuttihi oophiya, onoowiihanani”.
29 Maria vaiwale awe, aahivenya voowaakuveya, onarowa okumana ni Yesu.
30 Yesu nlelo khaaphiyale omuttettheni, masi aari opuro yoole Marta aakumanne awe nuuwo.
31 Okathi ole, yaahikhala ayuda yaarwiiye ommaaliha Maria vatthokoni vawe. Vaamoonale aya Maria avenyaka voowaakuveya, awo yaahimutthara, maana yuupuwela wira aarowa wunla omahiye.
32 Nuumala Maria onweha Yesu, aahaattamela opuro aari awe, okokhora ohoolo wawe, onamuhimeerya wira: “Pwiya, mwaari vaava, murokoraka khaarowa okhwa”.
33 Yesu vaamoonale awe Maria inlaka, ni ayuda yaarwanne awe yinlaka, aahiriipiwa murima vanceene, ni aahixanka.
34 Yesu aahaakoha wira: “Munvithale vai?” Awo yaahimwaakhula wira: “Pwiya, murwe moone”.
35 Yesu aahimoroxa maithori.
36 Nuumala ayuda oweha eyo, yaanihimya wira: “Mooneke moota Yesu amphenta awe!”
37 Masi atthu akina yaahimya wira: “Yesu ola oowerya otthukula maitho a mulopwana ahoona. Nto niireke khaawerya opaka etthu wira Laazaro ohikhwe?”
38 Nuumala-vo, Yesu aahiriipiwa-tho murima, onarowa omahiye. Mahiye awo yaari nikhuku, naattiyeliwe ni nluku.
39 Vano, Yesu aahiira: “Mukumihe nluku nle”. Nto Marta, murokorawe mulipa-ookhwa owo, aahimuhimeerya wira: “Pwiya, kinoona wira murutthu awe onninkha, okhala wira aavira mahiku maxexe okhwiiye awe”.
40 Yesu aahimukoha Marta oriki: “Nkoohimenryeni wira mwakupali, mwanweha ovuwa wa Muluku?”
41 Siiso, nluku naahikumihiwa. Vano Yesu aahiweha wiirimu, onahimya so: “Tiithi, kinnooxukhuruni mwaha woowi mookiiwa.
42 Koosuwela tthiri wira okathi wotheene munnikiiwa. Masi kihimmye siiso mwaha wa muttitthi wa atthu ala arukurenrye-va, wira akupali wira ti nyuwo mukirumme”.
43 Nuumala ohimya itthu iya, aahikhuwela vanceene oriki: “Laazaro, mukhumele ota!”
44 Mulopwana ole aakhwiiye aahikhumela ota, otthukiwe ene ni ikuwo inawu sawe ni matata awe, nave owiitho wawe waahivitikeleliwa ni ekuwo. Vano Yesu aahaahimeerya wira: “Mmutaphule, mmuhiye aroweke”.
45 Nuumala ayuda anceene yaarwiiye omuxukurya Maria, woona itthu Yesu aapanke awe, yaahimwaamini Yesu owo.
46 Masi, atthu akina yaahirowa waaleela afarisi etthu Yesu aapanke awe.
47 Siiso, makhulupale a anamukuttho ni afarisi, yaahithukumanya eSineedrio,* anahimya wira: “Nipake exeeni, okhala wira mulopwana ola onnipaka miiriirya sinceene?
48 Namuhiya siiso, atthu otheene anoomwaamini, nto aroma animoorwa anaakhe etemplo ahu ni nloko nahu”.
49 Aahikhala mulopwana mmosa aihaniwa Kaifa, yoowo aari vamosa naawo. Owo aari namukuttho muulupale eyaakha ele. Nto aahaahimerya wira: “Nyuwo khamunsuwelasa etthu.
50 Khamunoona wira munoophwanya mureerelo, mulopwana mmosa waakhwela atthu otheene, ohiya nloko notheene opwetexiwa?”
51 Masi mulopwana ole khaahimmye etthu ele okumihaka mmuruni mwawe. Okhala wira aari namukuttho muulupale eyaakha ele, nto aahihimya vahinatthi wira Yesu aarowa waakhwela ayuda.
52 Ohiya waakhwela ayuda paahi, masi-tho, aarowa waathukumanya anamwane a Muluku, yaawo yaamwarenle mapuro manceene.
53 Okhuma nihiku nenno, yaanimpaka palano wira amwiive Yesu.
54 Tivo, Yesu kheetteetta ooniwaka ni ayuda. Masi aahikhuma muttetthe ole aari awe, onarowa muttetthe waattamenle moothakoni, epooma yaihaniwa Efrayimi. Nto, aahikhala weiwo ni awiixutti awe.
55 Vano Paasikha a ayuda aanaattamela. Nto atthu anceene yaakhala mmuttettheni, yaaniwela arowaka oYerusalemu ohinatthi Paasikha, wira yaireerihe, aattharaka nlamulo na Moise.
56 Atthu awo yaanimwaavya Yesu. Siiso, ari ene mutemplo yaanikohana wira: “Nyuwo munoonela sai, niireke tthiri Yesu owo onoorweela niira nla?”
57 Vano, makhulupale a anamukuttho ni afarisi, yaahiruma wira akhala mutthu aasuwela nipuro aari awe Yesu, aahaana waahimeerya wira anvare.
Inoota
^ Aahiiso, “Mwiixuttihi”.
^ Ekereku, “Istaatio 15”. Estaatio emosa, yaarina imeeturu 185.
^ Nwehe Moolumo Ootthokiheriwa.
