Yohani 12:1-50
12 Mahiku 6 ahinatthi Paasikha, Yesu aahiphiya oBethania, weiwo aari awe Laazaro, yoowo Yesu aamuhihimunxe awe mookhwaani.
2 Awo yaahimwaapeela yoolya, nto Marta taarumeela. Masi Laazaro, aari mmosa wa atthu ale yaalya* ni Yesu.
3 Maria aahikuxa makhura oowunkhela, etthu yoowiiraka nimeya na eliituru, yaawo yaapakiwe ni narto* oohitakaaheriwa etthu ni a musurukhu munceene. Maria owo, aahikuxa makhura awo onahela inawu sa Yesu, onapuputtha ni ikharari sawe. Vano empa yotheene yaahisareya wunkhela wa makhura awo.
4 Masi, mmosa a awiixutti a Yesu, aihaniwa Yuda Isikaryoti, yoowo aarowa onvariha Yesu, aahihimya wira:
5 “Xeeni makhura ala oowunkhela yahaatumihiwa aya itenaario* 300, vano musurukhu ene akaweliwa alipa-oohaawa?”
6 Yuda owo aalavunle siiso, ohiya mwaha wa waathokorerya alipa-oohaawa, masi mwaha woowi aari latarau. Owo taasuka musurukhu waarumeeliwa ni awiixutti, nto aamakela wiiya.
7 Yesu aahihimya wira: “Mmuhiye muthiyana ola opake etthu ela niinaano-va, wira olokiherye ovithiwa waka.
8 Okathi wotheene munikhala ni alipa-oohaawa, masi khamunrowa okhalaka ni miyo imaara sotheene”.
9 Muttitthi muulupale wa ayuda waahisuwela wira Yesu aari oBethania, khurowa weiwo. Muttitthi owo, khiwaaronwe onweha Yesu paahi, masi-tho waaronwe onweha Laazaro, yoowo Yesu aamuhihimunxe awe mookhwaani.
10 Vano makhulupale a anamukuttho yaahivarihana omwiiva-tho Laazaro,
11 mwaha woowi okathi ayuda anceene yaaronwe aya oBethania, aweha ele yaamwiiranenle Laazaro, yaanimwaamini Yesu.
12 Mmeeloni mwaya, muttitthi muulupale wa atthu waarwenle niira, waahiiwa wira Yesu aanirwa oYerusalemu.
13 Awo yaahikuxa makukhu a mikole, anarowa okumana ni Yesu. Vano yaanikhuwela ariki: “Khoo Muluku, ninnoovekelani, mmoopole! Ooreelihiwa tuule onirwa mwa nsina na Yehova, mwene a Isarayeli!”
14 Okathi Yesu amphwannye awe mwaaxaana a puuru, aahimukilaathela, ntoko silempwale aya wira:
15 “Muhoove, nyuwo mwaana mwaamuthiyana a oSiyoni. Mwiiwe! Mwene anyu onnoorwa onwenle ene mwaaxaana a puuru”.
16 Woopaceryani, awiixutti khiyaiwexenxe oratteene itthu iya, masi okathi Yesu aavuwihiwe awe, yaahuupuwela wira itthu yaapanke aya, ti seiyo tthiri saalempwale simuhimyaka Yesu.
17 Vano, muttitthi wa atthu waamoonale Yesu omwiihanaka Laazaro wira okhume mmahiye, ni omuhihimuxaka mookhwaani, waanaaleela atthu akina ele yaakhumelenle.
18 Tivonto muttitthi wa atthu waaronwe aya okumana ni Yesu, okhala wira atthu awo yaahiiwa wira aahipaka mwiiriirya ole.
19 Nto afarisi yaanihimeeryana wira: “Mooweha? Khanimpaka etthu. Mooneke! Atthu otheene annimutthara yoowo”.
20 Nave-tho, yaahikhala akereku akina, yaawo yaarwiiye omukokhorela Muluku okathi wa niira.
21 Nto awo yaahimwaattamela Filipe, yoowo aari a oBethisaida, muttetthe wa oGalileya, ananvekela wira: “Atokweene, nimphavela onweha Yesu”.
22 Filipe aahirowa omuleela Andreya. Vano Andreya ni Filipe yaahirowa omuleela Yesu.
23 Siiso, Yesu aahiwaakhula oriki: “Yoophiya ewoora wira Mwaana a mutthu ovuwihiwe.
24 Tthiri, kinooleelani ekeekhai wira, epyo ya etiriku yaahimorele vathi, khintta,* enikhala epyo emosa paahi. Masi yintta* vale, eyo ennikumiherya ipyo sinceene.
25 Akhala mutthu oniphenta okumi awe, eyo enoomwiiriha opweteiwa okumi owo, masi ole oninyokha okumi awe vano, onookhapelela wira ophwanye okumi woohimala.
26 Akhala mutthu oniphavela okhala murumeyi aka, okitthareke. Weiwo kinrowa aka okhala, ti weiwo-tho onrowa awe okhala murumeyi aka. Akhala mutthu oniphavela okhala murumeyi aka, Atiithi anrowa omuttittimiha.
27 Vano miyo kooxanka. Nto kihimye exeeni? Tiithi, mukoopole okathi ola wooxankiha. Masi okathi ola wooxankiha ohaana okiphwanya, maana ti etthu kirwenle aka.
28 Tiithi, nvuwihe nsina nanyu”. Vano, naahiiwanyeya nsu nikhumaka wiirimu, nriki: “Miyo koovuwiha, nave kinrowa ovuwiha-tho”.
29 Muttitthi wa atthu weemenle vaavale waahiiwa nsu nne, nto akina anahimya wira osulu waahikukutteya. Vano, akina yaahimya wira: “Nlaikha ti nimulavulinhe”.
30 Yesu aahihimya wira: “Nsu nna nihiiwanyeya mwaha wa nyuwo, ohiya mwaha wa miyo.
31 Vano, yoophiya ewoora ya ophukeliwa olumwenku ola, nave namalamulela a olumwenku ola onrowa woomoliwa.
32 Masi miyo, keemexiwa* valaponi, kinimwiiruuhela atthu a makhalelo otheene”.
33 Yesu aahilavula eyo, ophavelaka ohimya moota aarowa awe okhwa.
34 Vano, muttitthi wa atthu waahihimya wira: “Nlamulo nnihimya wira Kristu onikhala mahiku otheene. Nto munihimya sai wira Mwaana a mutthu ohaana weemexiwa?* Mwaana a mutthu ti pani?”
35 Tivo, Yesu aahaahimeerya wira: “Muthuko onookhala ni nyuwo okathi vakhaani. Mweetteke murina ene muthuko owo, wira epiphi ehoophwanyeni. Ole oneetta mweepiphini, khonisuwela onrowa awe.
36 Mooniheryeke wira munnaamini muthuko owo, nlelo murina ene, wira mukhale anamwane a muthuko”.
Nuumala Yesu ohimya itthu iya, aahikhuma opuro ole, ni aahiipitha.
37 Nnaamwi Yesu aapanke miiriirya sinceene ohoolo waya, awo khiyaamwaamini,
38 wira yiiraneye ele aahimyale awe profeta Yesaya, oriki: “Yehova, ti pani aaminni itthu nilaleiye ahu? Nave ti pani osuwelihiwe owerya wa moono wa Yehova?”
39 Yesaya aahihimya-tho etthu yaawiiriha ohikupali, oriki:
40 “Miyo koowiiriha ohoona ni kihuumiha mirima saya. Koopaka eyo wira ahooneke, ni ahiiwexexeke itthu sirina aya opaka, ni wira akitthikele ni kaapenuxe”.
41 Yesaya aahilavula itthu iya omuhimyaka Kristu, okhala wira aahiweha ovuwa wawe.
42 Hata vari siiso, anamalamulela anceene yaanimwaamini Yesu, masi khiyooniherya wira yaanimukupali, mwaha wa afarisi, wira ahoomoliwe musinagoga.*
43 Tthiri, atthu awo vaanitepa waasivela ovuwihiwa ni atthu, ovikana ovuwihiwa ni Muluku.
44 Yesu aahihimya voowiiwanyeya, oriki: “Ole onikaamini, khonikaamini miyo paahi, masi-tho onimwaamini Ole okirumme.
45 Nave ole onikiweha, onninweha-tho Ole okirumme.
46 Miyo kihoorwa moolumwenkuni ntoko muthuko, wira ole onikaamini ohikhaleke mweepiphini.
47 Masi ole oniiwa moolumo aka, ohineettela, nkinimphukela, maana nkirwenle ophukela olumwenku, masi kirwenle woopola olumwenku.
48 Ole onikikhootta ni ohinaakhela moolumo aka, ehaavo etthu enrowa omphukela. Moolumo kilavunle aka, tanrowa omphukela nihiku nookiserya.
49 Mweekeekhai, nkilavunle etthu kikumihaka mmuruni mwaka, masi Tiithi, yoowo okirumme, tokihimenrye etthu yoohimya ni etthu yowiixuttiha.
50 Nave kinnisuwela wira otthara ele okirumme awe onniphwanyiha okumi woohimala. Tivo, khula etthu kinilavula aka, kinilavula siisaale Tiithi okihimenrye awe”.
Inoota
^ Aahiiso, “yaakilanthi ahameela vameesa”.
^ Narto, mwiri woowunkhela saana.
^ Musurukhu maluku ene wa eparatha wa oRoma. Nwehe Moolumo Ootthokiheriwa.
^ Ekereku, “khikhwa”.
^ Ekereku, “yakhwa”.
^ Eyo piiyo, othomeiwa vamwirini.
^ Eyo piiyo, othomeiwa vamwirini.
^ Nwehe Moolumo Ootthokiheriwa.
