Yohani 15:1-27
15 “Miyo ka mwiri weekeekhai wa ewuuva. Nto Tiithi aka, tori mulipa-oolima.
2 Owo onniikittha iritta sotheene sihiniima mihokorokho, nave onnireeriha iye siniima mihokorokho, wira sitepeke wiima mihokorokho.
3 Nyuwo muri ooreera mwaha wa nuulumo koohimenryaakani.
4 Mukhaleke oowiiraana ni miyo, nave miyo kinrowa okhala oowiiraana ni nyuwo. Siisaale eritta ehiniwerya aya wiima mihokorokho mekhaya-ru, ehikhanle vamwirini wa ewuuva, nyuwo-tho khamuniwerya wiima mihokorokho, muhikhanle vamosa ni miyo.
5 Miyo ka mwiri wa ewuuva, nyuwo mwa iritta. Ole iiraanale ni miyo, nave miyo kiiraanale ene nuuwo, mutthu owo onrowa otepaka wiima mihokorokho. Nyuwo khamuniwerya opaka etthu muhikhanle ni miyo.
6 Ole ohiniiraana ni miyo, owo onlikana ni eritta yiikitthiwe, yeeyo enuuma. Atthu annithukumanya iritta iyo, anarihela vaikho, sinavya.
7 Nyuwo mwairaana ni miyo, nave moolumo aka yakhala vamurimani vanyu, khula etthu munivekela anyu, munoovahiwa.
8 Tiithi aka onnivuwihiwa mwaahihiyeke wiima mihokorokho, ni wooniherya wira mwa awiixutti aka.
9 Siisaale Atiithi anikiphenta aya, nave-tho miyo kinnoophentani. Nto muthipeleleke ottottela mureerelo ophenta waka.
10 Mwaiwelela sooruma saka, munoottottelaka mureerelo ophenta waka, siisaale miyo kiniiwelela aka sooruma sa Atiithi a wiirimu, kinattottela mureerelo ophenta waya.
11 “Miyo kinooleelani itthu iya, wira musareye otteeliwa murima kirina aka.
12 Etthu enoorumaakani tiila: mphentaneke mukina ni mukhwaawe, siisaale miyo kinoophentaakani.
13 Khuuvo orina ophenta wuulupale, onvikana ole onileva okumi awe mwaha wa apatthani awe.
14 Nyuwo munookhala apatthani aka, vakhala wira munimweettela ele enoorumaakani.
15 Miyo nkinoohimyani-tho okhala ipottha, maana epottha khenisuwela etthu enivara awe pwiya aya. Masi kinoohimyani okhala apatthani, okhala wira kihoosuwelihani itthu sotheene kimwiiwale aka Tiithi aka.
16 Nyuwo khamukithanlale miyo, masi ti miyo koothanlaleni wira muthipeleleke wiima mihokorokho, seiyo sihinimala. Siiso, khula etthu munaavekela anyu Atiithi mwa nsina naka, awo animoovahani.
17 “Kinnoorumani itthu iya, wira mphentaneke mukina ni mukhwaawe.
18 Akhala wira olumwenku onnoonyokhani, musuweleke wira atthu awo aakinyokha miyo ahinatthi woonyokhani nyuwo.
19 Vaakhanle wira nyuwo muri ntoko atthu a olumwenku ola, awo yaarowa woophentakani. Masi miyo kihoothanlani, nto nyuwo khamunlikana ni atthu a olumwenku ola. Tivo, atthu a olumwenku ola anoonyokhaayani.
20 Muupuweleke moolumo ale koohimenryaakani wira: Namuteko khahiyo muulupale onvikana patarau awe. Akhala wira aakilupattha miyo, nave-tho animoolupatthani nyuwo. Akhala wira ahiiwelela moolumo aka, nave-tho animwiiwelela moolumo anyu.
21 Masi anoowiirelani itthu iya sotheene mwaha woowi nyuwo mwa awiixutti aka. Animwiira siiso, okhala wira khanimusuwela Ole okirumme.
22 Vaakhanle wira miyo nkirwiiye, kilavula naawo, khiyaarowa okhalana etampi. Masi vano, khaniwerya okhootta etampi aya.
23 Ole onikinyokha, nave-tho onnimunyokha Tiithi aka.
24 Kahaavanre miteko eriyari aya, seiyo sihitonko ovariwa ni mutthu mukina, awo khiyaarowa okhalana etampi. Masi vano, awo aakiweha ni aakinyokha miyo, vamosa ni Tiithi aka.
25 Eyo ehiiraneya wira simalelihiwe Soolempwa* sinihimya wira: ‘Awo aakinyokha, vahikhanle mulattu’.
26 Kinimooruuhelani namakhaliherya, yoowo onikhuma wa Tiithi a wiirimu, eyo piiyo, munepa woowaarya, yoowo onooniherya ekeekhai, ni onikhuma wa Tiithi. Namakhaliherya owo aphiya, onookikhalela onamoona.
27 Nave nyuwo, muhaana waakhaliherya akina okisuwela, okhala wira munnikhala ni miyo okhuma woopaceryani.
Inoota
^ Ekereku, “Nlamulo”.
