Yohani 16:1-33
16 “Miyo kihoohimeeryani itthu iya wira muhikihiye.
2 Atthu anrowa owoomolani musinagoga.* Mweekeekhai, enoophiya ewoora ale anrowa owiivani, anrowa aya wuupuwelaka wira aninvarela muteko Muluku.
3 Masi awo anoopaka itthu iya, okhala wira khanimusuwela Tiithi, nnakhala khanikisuwela miyo.
4 Vano, kinoohimeeryani itthu iya wira yaphiya ewoora sinrowa aya wiiraneya, muupuweleke wira kaahoohimeeryani.
“Miyo nkoohimenryeni itthu iya okhuma woopaceryani, maana kaari ni nyuwo.
5 Vano kinrowa wa Ole okirumme, masi khuuvo a nyuwo onikikoha wira: ‘Munrowa vai?’
6 Masi okhala wira kihoohimeeryani itthu iya, nyuwo mooriipiwa murima vanceene.
7 Nto, kinooleelani ekeekhai wira, nyuwo munoophwanya mureerelo mwaha woowi kinoorowa. Tthiri kaahirowe, nkinrowa oruma munepa woowaarya wira wookhaliheryeni. Masi karowa, kinimooruuhelani.
8 Vano owo waphiya, onimooniherya oratteene etampi ya olumwenku. Nave onimooniherya wira kinnivara itthu sa xariya, ni onimooniherya olumwenku, atthu Muluku onaaphukela awe.
9 Onrowa opacerya wooniherya oratteene etampi ya olumwenku, okhala wira olumwenku khonooniherya wira onnikaamini.
10 Owo onimooniherya olumwenku wira miyo kinnivara itthu sa xariya, mwaha woowi kinrowa wa Tiithi. Nuumala-vo, khamunrowa-tho okiweha.
11 Nave-tho, onimooniherya oratteene olumwenku, atthu Muluku onaaphukela awe, maana namalamulela a olumwenku ola oophukeliwa.
12 “Nlelo kookhalana itthu sinceene wira kooleeleni, masi niinaano-va, nyuwo khamunwerya wiiwexexa.
13 Masi, okathi onrwa awe namakhaliherya owo, eyo piiyo, munepa onisuweliha ekeekhai, onimookhaliheryani wiiwexexa saana ekeekhai. Masi namakhaliherya owo khonrowa olavula itthu sinikhuma mmuruni mwawe. Owo onrowa olavulaka itthu onimwiiwa awe Muluku. Nave-tho, onrowa woohimeeryani itthu sinrowa okhumelela.
14 Namakhaliherya owo onookivuwiha, okhala wira onrowa wooleelani itthu okiiwale awe.
15 Sotheene siri sa Atiithi, nave-tho ti sawaka. Tivo kiirale aka wira: ‘namakhaliherya owo onrowa wooleelani itthu okiiwale awe’.
16 Mwa okathi vakhaani, nyuwo khamunrowa-tho okiweha. Nave-tho, mwa okathi vakhaani, nyuwo munrowa okiweha”.
17 Nto awiixutti awe akina, yaanikohana ariki: “Oniphavela ohimya exeeni, aalavulaka wira: ‘Mwa okathi vakhaani, nyuwo khamunrowa-tho okiweha. Nave-tho, mwa okathi vakhaani, nyuwo munrowa okiweha’, nave aahimyaka wira, ‘mwaha woowi kinrowa wa Tiithi’?”
18 Tivo awo yaanikohana wira: “Oniphavela ohimya exeeni iiraka, ‘okathi vakhaani’? Hiyo khaninsuwela etthu enihimya awe”.
19 Yesu aahisuwela wira yaaniphavela omukoha, nto aahaahimeerya wira: “Nyuwo munikohana mwaha woowi koohimya wira: ‘Mwa okathi vakhaani, nyuwo khamunrowa okiweha. Nave-tho, mwa okathi vakhaani, nyuwo munrowa okiweha’?
20 Tthiri, kinooleelani ekeekhai wira, nyuwo munimunla ni wiikhupanyerya, masi atthu a olumwenku ola anrowa otteeliwa murima. Nyuwo munooriipiwa murima, masi oriipiwa wanyu murima onootatuxiwa, okhale otteeliwa murima.
21 Okathi muthiyana oniyara awe, onnihaawa vanceene okhala wira yoophiya ewoora awe. Masi nuumala omuyara mwanawe, khonuupuwela-tho ohaawa iwo. Owo onnitteeliwa murima, maana ooyariwa mutthu moolumwenkuni.
22 Siiso-tho, nyuwo munniriipiwa murima okathi ola. Masi kinrowa woowehani-tho, nto munootteeliwa murima. Nave khuuvo onrowa owaakhani otteeliwa wanyu murima.
23 Nihiku nlo, khamunrowa-tho okikoha etthu. Tthiri, kinooleelani ekeekhai wira, khula etthu munrowa anyu waavekela Atiithi mwa nsina naka, awo animoovahani.
24 Mpakha-va, khiivo etthu evekenle anyu mwa nsina naka. Nvekeleke, nto munoovahiwa, wira mutepe otteeliwa murima.
25 “Kinnooleelani itthu iya ni malikanyiho. Enoophiya ewoora kihinrowa aka wooleelakani ni malikanyiho, masi kinrowa wooleelakani oratteene itthu sinipaka aya Atiithi.
26 Nihiku nlo, nyuwo munrowa waavekelaka Atiithi mwa nsina naka, masi eyo khemphavela ohimya wira ti miyo kinrowa woovekelelakani.
27 Mweekeekhai, Atiithi annoophentani, maana nyuwo munnikiphenta ni munnikupali wira kirummwale ni Muluku.
28 Miyo kirummwale ni Tiithi, khurwa moolumwenkuni. Vano kinookhuma moolumwenkuni-mu, kiroweke wa Tiithi”.
29 Nto awiixutti awe yaahihimya wira: “Pwiya, vano ninniiwexexa etthu munihimya anyu, okhala wira khamunilavula ni malikanyiho.
30 Noosuwela wira nyuwo munnisuwela itthu sotheene, nto khuuvo a hiyo oniphavela wookohani etthu. Tivo, ninnikupali wira nyuwo mukhumme wa Muluku”.
31 Siiso, Yesu aahiwaakhula wira: “Vano munnikupali?
32 Mwiiwe! Ennaattamela ewoora muniira anyu mmwara-mwariwe, khula mmosa otthyaweleke owannyawe, nave munrowa okihiya mekhaka. Masi miyo nkikhanle mekhaka, okhala wira Atiithi ari ni miyo.
33 Kinoohimeeryani itthu iya wira mukhalane murettele mwaha wa miyo. Nyuwo munookhalana maxakha moolumwenkuni-mu, masi, mulipihe murima! Miyo kooxintta olumwenku”.
Inoota
^ Nwehe Moolumo Ootthokiheriwa.
