Yohani 19:1-42
19 Vano Pilato aahimukuxa Yesu, khiruma owaxuliwa.
2 Atoropa yaahipaka ekhara ya miiwa, khunwariha mmuruni. Nave yaahinwariha ekuwo yooxeerya,
3 anarowa ohoolo wawe ariki: “Ihaali, nyuwo Mwene a ayuda!” Nave-tho, yaanimmana owiitho.
4 Pilato aahikhumela-tho vate, onaaleela ayuda wira: “Mwiiwe! Miyo kinoomukumiherya vate wira musuwele wira nkinimphwanyana mulattu”.
5 Siiso, Yesu aahikhumela vate, owanre ene ekhara ya miiwa ni ekuwo yooxeerya. Nave Pilato aahaahimeerya wira: “Mmooneke mulopwana ola!”
6 Masi, okathi makhulupale a anamukuttho ni makwarta yaamoonale aya Yesu, yaahikhuwela ariki: “Okhomeliwe vamwirini! Okhomeliwe vamwirini!”* Pilato aahaaleela wira: “Mmukuxeke yeenyu mwamukhomeleke,* okhala wira miyo nkinimphwanyana mulattu”.
7 Ayuda yaahimwaakhula Pilato wira: “Hiyo nookhalana nlamulo. Nto natthara nlamulo nlo, owo ohaana okhwa, maana onniihimya okhala mwaana a Muluku”.
8 Okathi Pilato aiwale awe moolumo aya, aahitepa woova,
9 nto aahikela mpaani onamukoha Yesu wira: “Nyuwo munikhuma vai?” Masi Yesu khaamwaakhunle etthu.
10 Tivo, Pilato aahimukoha Yesu wira: “Khamunikaakhula etthu? Khamunisuwela wira miyo kookhalana owerya wa wootaphulani ni owerya wa wookhomelani?”*
11 Yesu aahimwaakhula oriki: “Nyuwo khimwaarowa okhalana owerya wookiiriha etthu, mwahaavahiwe ni Muluku. Tivo, ole okivaherenrye wa nyuwo, ookhalana etampi yuulupale”.
12 Mwaha wa yeeyo, Pilato aaniphavela enamuna ya omutaphula Yesu, masi ayuda yaanikhuwela ariki: “Mwamutaphula mulopwana ola, khamuhiyo mpatthani a Seesari. Otheene ale aniikhaliha mwene, anninvirikanya Seesari”.
13 Vano Pilato, vaiwale awe moolumo awo, aahimukumiherya Yesu vate, ni aahikilaathi opuro waaphukiwa milattu, waihaniwa Nipuro Nowaapatthiwa ni Maluku, nenlo nttaava na eheeberi niihaniwa Gabatha.
14 Nihiku nno naari nihiku na omulokiherya Paasikha. Yaari etthu yoowiiraka 12 oora.* Nave Pilato aahaahimeerya ayuda wira: “Mmooneke mwene anyu!”
15 Masi, awo yaahikhuwela ariki: “Iiviwe! Iiviwe! Okhomeliwe vamwirini!”* Pilato aahaakoha wira: “Kiireke kihaana omwiiva mwene anyu?” Makhulupale a anamukuttho yaahaakhula ariki: “Khanrina mwene mukina, ohikhanle Seesari”.
16 Nto Pilato aahaavahererya Yesu wira yamukhomele vamwirini.
Vano awo yaahimukuxa, anarowa.
17 Nave, Yesu aahikuxa mwiri wa nihaaxeryo* onarowa opuro waihaniwa Muru Ohanle Makhuva-ru, yoowo nttaava na eheeberi oniihaniwa oGolgotha.
18 Weiwo, awo yaahimukhomela Yesu vamwirini. Yesu owo, aakhomeliwe eriyari ya alopwana anli, mmosa aari moono awe woolopwana, mukina aari moono awe woothiyana.
19 Nave-tho, Pilato aahiruma olempwa vanipaweni wira nithomeiwe vamwirini wa nihaaxeryo.* Nipawe nlo, naalempwe so: “Yesu munazarethi, mwene a ayuda”.
20 Ayuda anceene yaahisoma nipawe nne, maana opuro aakhomeliwa awe Yesu, waattamenle oYerusalemu. Nave nipawe nne naalempwale mattaava mararu: eheeberi, elatino ni ekereku.
21 Makhulupale a anamukuttho a ayuda, yaahimuhimeerya Pilato wira: “Muhilepe ‘Mwene a ayuda’, masi mulepe wira mulopwana ola aaniihimya oriki: ‘Miyo ka mwene a ayuda’”.
22 Pilato aahaakhula wira: “Etthu kilempe aka, koolepa”.
23 Nuumala omukhomela Yesu vamwirini, atoropa ale yaahikawanya malaya awe a ota mipantta mixexe, khula toropa aahikuxa epantta awe, ni yaahikuxa nlaya nawe na muhina. Masi nlaya nlo na muhina khinaattotthiwe, ohiya-vo naarootthaviwa okhuma osulu mpakha vathi.
24 Nto, atoropa ale yaahihimeeryana wira: “Nihikhere nlaya nna, masi naavererye eparakha wira nimoone onrowa ohalana”. Eyo yaahiiraneya wira emaliheriwe yoolempwa eni: “Awo aakawana malaya aka ni ahaavererya eparakha ikuwo saka”. Vano, ele atoropa yaapanke aya, ti yeeyo soolempwa saahimmye aya wira yaamwiiraneya.
25 Waattamela mwiri wa nihaaxeryo* waari Yesu, aaheemela maama awe Yesu ni munnawe maama awe. Nave-tho, aaheemela vaavale, Maria mwaara a Kolopha ni Maria Madalena.
26 Okathi Yesu anwenhe awe maama awe ni mwiixutti amphenta awe, yeemenle ene vakhiviru vaavale, aahimuhimeerya maama awe wira: “Mwaninyu owo-vo!”
27 Nuumala-vo, aahimuleela mwiixutti owo wira: “Maama anyu owo-vo!” Nave okhuma ewoora ele orowa ohoolo, mwiixutti ole aahaakuxa amamawe, onaaroiha owannyawe.
28 Okathi Yesu aasuwenle awe wira itthu sotheene saahiiraneya, wira omaliherye soolempwa, aahihimya wira: “Koovoliwa ntthona”.
29 Waahikhala vaavale, murinki waasareyale eviinyu yoonyuunya. Akina yaari vaavale, yaahikuxa exiponxa,* aruweya nviinyuni-mme, atthukwelela vamutathini,* anaroiha mwaano mwa Yesu.
30 Okathi Yesu aavahiwe awe eviinyu eyo yoonyuunya, aahihimya wira: “Itthu sotheene soomaliheriwa”. Nuumala-vo, aahuurama, khukhwa.*
31 Okhala wira naari nihiku naalokiheriwa aya esaabadu,* ayuda khiyaaphavela wira mirutthu sihale vamwirini wa nihaaxeryo sikhomeliwe ene esaabadu (esaabadu eyo, yaari yuulupale). Tivo, ayuda yaahinvekela Pilato wira orume wuntakasiwa metto sa alopwana ale yaakhomeliwe vamwirini ni sikuruxiwe mirutthu.
32 Siiso, atoropa yaahirwa yintakasa metto sa alopwana ale anli yaakhomeliwe vamosa ni Yesu.
33 Masi okathi yaaphiyale aya vaari Yesu, yaahoona wira owo iira okhwiiye ene. Tivo, khiyaamuntakanse metto.
34 Vano, toropa mmosa aahimuhoma mpararini ni nivaka, niinaano-ru yaahikhuma ephome ni maasi.
35 Ole aawenhe eyo, onnikhalela onamoona. Nto onamoona awe ti weekeekhai, nave onnisuwela wira itthu sinihimya awe ti seekeekhai, wira nyuwo-tho mukupali.
36 Tthiri, itthu iyo saahiiraneya wira emaliheriwe yoolempwa enihimya wira: “Khaninrowa wuntiwa* nikhuva nawe, nnakhala nimosa”.
37 Nave yoolempwa ekina enihimya wira: “Anonweha yoole amuhomme aya”.
38 Nuumala itthu iya, Yosefe a wArimathaya, aahinvekela Pilato wira omweemererye okuxa murutthu wa Yesu. Nto, Yosefe owo aari mwiixutti awe Yesu, masi voohisuweliwa,* okhala wira aaniwoova ayuda. Pilato aahimweemererya. Siiso, Yosefe aahirowa okuxa murutthu wa Yesu.
39 Nave Nikodemo, yoowo khalai aaronwe okumana ni Yesu ohiyu, aahirwa okunxe ene makhura oowunkhela a miira, ni makhura a alowe, etthu yoowiiraka ikiilu 33.*
40 Nto awo yaahikuxa murutthu wa Yesu, avitikelela ni ekuwo ya eliinyu yooreera, yiitthela makhura oowunkhela, anarowa ovitha ntoko yaalimalenle aya ayuda.
41 Vano, opuro waakhomeliwe awe* Yesu, yaahikhala exarti. Nto, exarti ele yaahikhala mahiye masya, yaahatonko ovithiwa mutthu.
42 Okhala wira naari nihiku ayuda yaalokiherya aya esaabadu, ni mwaha woowi mahiye ale yaahikhuveela, awo yaahivitha murutthu wa Yesu mmahiye-mme.
Inoota
^ Aahiiso, “Iiviwe vamwirini. Iiviwe vamwirini”.
^ Aahiiso, “mwamukhomeleke vamwirini”.
^ Aahiiso, “wookhomelani vamwirini?”
^ Ekereku, “ewoora ya neethanu namosa [nuumala nsuwa okhuma]”.
^ Aahiiso, “Mmukhomele vamwirini!”
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Etthu enlikana ni munyeenyere woowuuma, yeeyo ennuula maasi.
^ Ekereku, “hisopo”. Waanyiheryasa onihimmwa mwiri wa oPalestina, waarakamela osulu imeeturu 1.8.
^ Aahiiso, “khihiya omumula”.
^ Eyo piiyo, “Namathanu”.
^ Aahiiso, “opwexiwa”.
^ Aahiiso, “wiiphiini”.
^ Aahiiso, “iliipara 100”, eyo piiyo, iliipara sa aroma.
^ Aahiiso, “waakhomeliwe awe vamwirini”.
