Yoobi 1:1-22
1 Aahikhala mulopwana mmosa a elapo ya wUsi aihaniwa Yoobi.* Owo aari mulopwana oororomeleya* ni a xariya. Nave aanimoova Muluku ni aanikhootta itthu sootakhala.
2 Aahaayara anaawe axilopwana 7 ni axithiyana 3.
3 Mihuwo sawe saari ipwittipwitthi 7.000, ikamelo 3.000, ipooyi 1.000 soolopwana ni soothiyana, apuuru* 500. Aahikhalana-tho arumeyi anceene. Tivonto, owo aari mutthu oothaaciri waavikana atthu ootheene yaakhala mpantta wa elapo onikhuma nsuwa.
4 Khula mwaana mwaamulopwana, aanipaka efesta vatthokoni vawe nihiku naathanleliwe awe. Yaanaalattula axirokoraya ooraaru wiira yalyeeke ni yawuryeke hoothe.
5 Nuumala anamwane ootheene opaka efesta, Yoobi aaniruma wiihaniwa wiira aareerihe. Owo aanivenya voosiisu, onanvaha Muluku mukuttho woopahiwa, para khula mwaana. Yoobi uupuwela so: “Woonasa wene mwanaka mmosa oottheka aahiiso onveeha Muluku vamurimani vawe”. Ti siiso Yoobi aamakela awe wiira.
6 Vano naahiphiya nihiku anamwane a Muluku eekeekhai* yaaronwe aya wiixooniherya ohoolo wa Yehova. Nave-tho, Satana aahirwa vaavo.
7 Vano Yehova aahimukoha Satana iiraka: “Munikhuma woowi?” Nto Satana aahimwaakhula Yehova oriki: “Kaaronwe weetteetta mulaponi, ni owehaweha mulaponi-mmo”.
8 Yehova aahimukoha Satana wiira: “Kiira monweha* murumeyi aka Yoobi? Muhoona wiira khuuvo onlikana nuuwo mulaponi? Owo mulopwana oororomeleya* ni a xariya, onimoova Muluku ni onikhootta itthu sootakhala”.
9 Satana aahimwaakhula Yehova wiira: “Munoona wiira Yoobi owo onimoova Muluku mahala ene?
10 Nyuwo munnimwaakiherya itthu sootheene. Vanikhala ntoko wiira mmutekelenle ekintaali owo ni emusi awe, ni itthu sootheene sirina awe. Nave mooreeliha miteko sawe, ni mihuwo sawe sinnimwareela mulaponi.
11 Masi, mookole ntata nanyu, mukuxe itthu sootheene sirina awe. Nto munimoona akhala wiira khonrowa wooveehani ohoolo* wanyu”.
12 Nuumala-vo, Yehova aahimuleela Satana wiira: “Itthu sootheene sirina awe siri mmatatani mwanyu. Masi muhimwiirihe etthu yoootakhala!” Siiso, Satana aahikhuma ohoolo* wa Yehova.
13 Vano, nihiku anamwane axilopwana ni axithiyana a Yoobi yaalya aya ni owurya eviinyu vatthokoni va muulupale aya,
14 aahirwa murumeyi mmosa a Yoobi, onahimya wiira: “Ipooyi saamulima mmatta, nave-tho apuuru yiira alyaaka malaxi vakhiviru vaya,
15 okathi owo, yaahirwa atthu a oSebayini atuphela ni akuxa. Nave aawiiva arumeyi anyu ni espaata.* Miyo paahi kooponwe wiira kooleeleni”.
16 Olavulaka siiso, aahiphiya murumeyi mukina onahimya wiira: “Mooro onikhuma wa Muluku* wookhuruwa wiirimu, opaha ipwittipwitthi sanyu ni waapaha arumeyi anyu, ni waapwetexa! Miyo paahi kooponwe wiira kooleeleni”.
17 Olavulaka siiso, aahiphiya murumeyi mukina onahimya wiira: “Ikurupu tthaaru sa akhaldeya, aatuphela ikamelo ni aakuxa. Nave-tho, awo aawiiva arumeyi anyu ni espaata. Miyo paahi kooponwe wiira kooleeleni”.
18 Olavulaka siiso, aahiphiya murumeyi mukina onahimya wiira: “Aniinyu axilopwana ni axithiyana yiira alyaaka ni awuryaka eviinyu vatthokoni va muulupale aya.
19 Niinaano-ru, yaahoopa epheyo yuulupale ekhumaka moothakoni, nto epheyo eyo yaahimana ikantu sooxexe sa empa eyo, nto eyo yaahaamorela amiravo awo, ewiiva. Miyo paahi kooponwe wiira kooleeleni”.
20 Nuumala wiiwa itthu iyo, Yoobi aahivenya, okhera ikuwo sawe ni omettha ikharari sawe. Nuumala-vo, aahikokhora uurama mpakha vathi,
21 onahimya wiira:
“Kikhumme mmirimani mwa amaama kihiwanre etthu,Nave kinootthikela vatthayani kihiwanre etthu.
Yehova tokivanhe, nave Yehova tokunxe.
Nto nsina na Yehova nlelo nittottopeliweke”.
22 Nnaamwi Yoobi saamwiiranenle itthu iyo sootheene, owo khaatthenke nnakhala khaamoothenrye Muluku opaka etthu yootakhala.*
Inoota
^ Woonasa wene, nintaphulela: “mutthu oothanyiwa”.
^ Aahiiso, “ohirina mulattu”.
^ Eheeperi, “apuuru oothiyana”
^ Nuulumo na eheeberi nnihimya malaikha a Muluku.
^ Eheeperi, “monvarexexa vamurimani vanyu”.
^ Aahiiso, “ohirina nthowa ni ohirina mulattu”.
^ Eheeperi, “owiitho”.
^ Eheeperi, “owiitho”.
^ Aahiiso, “xoowa”.
^ Aahiiso, woonasa wene: “Overunya”.
^ Aahiiso, “khaamuhimyanne Muluku etthu yoohikhalela”.
