Yoobi 12:1-25
12 Vano Yoobi aahaakhula wiira:
2 “Mweekeekai nyuwo mwa atthu oosuwela,Nave ankhili anrowa okhwa ni nyuwo!
3 Masi, ni miyo-tho kinnisuwela itthu.
Nkihiyo ooyevexa woovikanani nyuwo.
Ti pani ohinisuwela itthu iya?
4 Miyo kinnitheiwa ni apatthani aka,Okhala wiira kinnimwiitthana Muluku, kilipelelaka okaakhula.
Atthu annimutheya naxariya ni ohitthenke etthu ntoko miyo.
5 Mutthu ohinixikha etthu, onnithanya ehasara,Uupuwelaka wiira eyo enaaphwanya atthu yaale inawu saya sihilimpe.*
6 Alatarau annikhala ni murettele mmaitthokoni mwaya,Ale animpaca Muluku annikhala ahoovaka etthu,Ti yaawo arina muluku aya mmatatani mwaya.
7 Masi, xontte, mwaakohe axinama, nto awo anoowiixuttihani;Nave mwaakohe axipalame anivava musulu, nto awo animooleelani.
8 Aahiiso nwehe* elapo, nto eyo enoowiixuttihani;Nave ihopa sa mphareya sinimooleelani.
9 Mwa itthu iya sootheene,Tisivi sihinisuwela wiira Yehova topattunxe itthu iyo?
10 Okumi wa itthu sootheene sinimumula, ori mmatatani mwawe,Ni iphumu sa apinaatamu ootheene.
11 Kiira moolumo anlawihiwa ni maaru,Siisaale ntoko nlumi ninlawiha aya eyoolya?
12 Kiira atthu oowuuluvala tarina ankhili,Ni atthu arina iyaakha sinceene tarina osuwela?
13 Muluku torina ankhili ni torina owerya;Owo ookhalana miruku ni osuwela.
14 Apwexa etthu, khuuvo-tho oniwerya oteka;Etthu oniwala awe, khuuvo mutthu oniwerya ohula.
15 Okathi onitthukwa awe epula, elapo ennuuma;Okathi onihula awe epula eyo, ennisareya mulaponi.
16 Owo toowerya ni ookhalana ankhili;Ole onihapuwa ni ole onihapuxa, ootheene tawawe;
17 Owo onniwiiriha alipa-oovaha miruku, weetta ahiwanre ixapattho,*Onniwiiriha alipa-oophuka milattu okhala alolo.
18 Onniwaakha okhulupale mamwene,Ni onnaakhaliha ipottha.
19 Onniwiiriha anamukuttho weetta ahiwanre ixapattho,Ni onnaakumiha makhulupale arina owerya wuulupale.
20 Owo onniwala iyano sa alipa-oovaha miruku oororomeliwa,Onniwaakha ankhili atthu oowuuluvala.
21 Owo onnaathanya makhulupale,Ni onniwiiriha atthu oowerya okhala ootteettheya;*
22 Owo onnisuweliha itthu sivithiwe weepiphini,Onniiriha muthuko waarya weepiphini.
23 Owo onniiriha maloko okhala oowerya, wiira opwetexe;Onniiriha okhala oowaatta, wiira oroihe weepotthani.
24 Owo onniwaakha ahooleli a atthu osuwela* waya,Nave onniwiiriha weettakasa moothakoni, muhikhanle ephiro.
25 Awo annaapapela mweepiphini, memmo muhikhanle muthuko;Onniwiiriha weetteetta ntoko anamuhapaliwa.
Inoota
^ Aahiiso, “anitherekuwa”.
^ Aahiiso, woonasa wene: “mulavulane”.
^ Aahiiso, “waakhiwa itthu sootheene”.
^ Eheeperi, “onnineriha esintu ya atthu oowerya”.
^ Eheeperi, “murima”.
