Yoobi 13:1-28
13 “Aayo, maitho aka aaweha itthu iya sootheene,Maaru aka ahiiwa ni aasuwela.
2 Etthu munisuwela anyu, miyo-tho kinnisuwela;Nkihiyo ooyevexa woovikanani nyuwo.
3 Fataari kilavule ni Muluku Oowerya Sootheene;Kiniphavela wiixaakiha ohoolo wa Muluku.
4 Masi nyuwo munninanariha nsina naka ni moolumo oowootha;Ootheene anyu mwa mameetiku ahirina efaita.
5 Fataari mwahaalavulanse etthu,Siiso, mwaamooniherya wiira mookhalanasa ankhili.
6 Xontte, nwiriyane wiixaakiha waka,Nave nvahe ephoole okathi kinilavulaka mulattu aka.
7 Kiireke munilavula voohixariya mwa nsina na Muluku,Nave munootha mwa nsina nawe?
8 Kiireke muri mpantta awe,Wala muneererya omwaakiha Muluku eekeekhai?
9 Muluku atokosa mirima sanyu ni miteko sanyu, onoophwanya etthu yooreera?
Niireke munoowerya onwoka, ntoko mwaarowa anyu onwoka pinaatamu?
10 Mweekeekhai, owo onimoopwapwelani,Mweererya omwaakiha Muluku voohixariya ni mwiipithihaka.
11 Niireke ovuwa wawe khoniwoopihani,Nave woopiha wawe khonoorweelani?
12 Moolumo anyu a ankhili kharina efaita, ari ntoko ettuurwa;Wiixaakiha wanyu khorina efaita ntoko mapasuwela a oloko.
13 Mmaale wiira miyo kilavule.
Nuumala-vo, ekikhumeleleke ele entthuna okikhumelela!
14 Xeeni kinihela aka okumi aka mmaxakhani,Ni kinipweha aka okumi aka mmatatani mwaka?
15 Hata aarowa okiiva, nlelo kanwehererya;Kaamwiixaakiha* ohoolo wawe.
16 Nto owo aamukhala moopoli aka,Okhala wiira khuuvo mutakhali* onimwaattamela.
17 Mwiiwe saana moolumo aka;Nvahe ephoole etthu kinihimya aka.
18 Vano kihiilokiherya wiira kiixaakihe mulattu aka;Miyo koosuwela wiira kookhalana erasau.
19 Ti pani onrowa waakhulana ni miyo?
Miyo kaamookhwa, vaakhanle wiira koomaala!*
20 Khoo Muluku, mukiirele itthu piili paahi,Siiso miyo nkinrowa owiipithani:
21 Muhikikumiherye-tho mixankiho,*Muhitthikele-tho okoopopiha.
22 Mukiitthane, miyo kinimwaakhula,Aahiiso mukihiye kilavule, nto nyuwo mukaakhuleke.
23 Kitthenke-ni, ni etampi aka tiivi?
Mukooniherye etthu kitthenke aka ni etampi aka.
24 Xeeni muniipithiha anyu owiitho wanyu,Ni munikithokorerya anyu ntoko nwanani anyu?
25 Niireke munimweererya woopopiha nikukhu ninvavihiwa ni epheyo,Aahiiso woomola nlaxi noowuuma?
26 Nyuwo munimakela osuka itthu sootakhala kinootheriwa aka,Nave munnikivaha ehukhumu mwaha wa itampi kiirale aka kiri ene mmiravo.
27 Nyuwo munnitthukwa metto saka, mulipihaka ni ithaapwa,*Munnivarerya iphiro saka sootheene,Munnitthara-tthara mapuro ootheene kininyakela aka.
28 Siiso, mutthu* onnihononeya ntoko etthu yoowuntta,Ntoko ekuwo ekhuuriwe ni oweexe.
Inoota
^ Aahiiso, “kamwaakiha iphiro saka”.
^ Aahiiso, “namavirikanya”.
^ Aahiiso, woonasa wene: “akhala mutthu oniwerya waakhulana, miyo kammaala ni kaamookhwa”.
^ Eheeperi, “Mukumihe ntata nanyu vasulu vaka, muroihe ottaiwene”.
^ Nwehe Moolumo Ootthokiheriwa.
^ Eheeperi, “owo”, woonasa wene, onihimmwa Yoobi.
