Yoobi 14:1-22
14 “Pinaatamu, yoowo oyariwe ni muthiyana,Onikhala mahiku vakhaani ni khoreerane mixankiho.
2 Owo onnikhumelela ntoko efilori, nuumala-vo onninyaala;*Onnitthimaka ntoko eruku ni onnivira.
3 Aayo, nyuwo munnithipelela onwehexexa,Munnimukuxa,* munamuroiha otripunaale.
4 Niireke mutthu orina etampi onoowerya omuyara mutthu ohirina etampi?
Nnaari!
5 Mahiku a pinaatamu aathanliwa,Nave nummeru na miyeeri sawe nri mmatatani mwanyu;Nyuwo moohela mukano wiira yena ohivikane.
6 Muhiye onwehexexa wiira owo ophumurye,Mpakha omaliha nihiku nawe, siisaale ntoko namuteko oniliviwa.
7 Hata mwiri wookhalana nlipelelo.
Owo wiikitthiwa, onootthikela ophuwa,Nave iritta saya saamukhaani sinootthikela wunnuwa.
8 Vakhala wiira mutathaari aya onnuuluvala vatthayani,Ni exa aya ennuuma,
9 Onaanihiwaka-ru ni maasi vakhaani, owo onoophuwa;Nave onoophuwa iritta ntoko mwiri musya.
10 Masi, mutthu onnookhwa, ikuru sawe sinamala;Okathi pinaatamu onikhwa awe, onirowa woowi?
11 Maasi annilakaseya mphareya,Nave muro onniwelela, onuuma.
12 Siiso, apinaatamu annimpaathi, khuhiyavenya.
Yaanahale ovenya, erimu yoolakaseya,Nnakhala khanrowa ovenxiwa vaarupa aya.
13 Khoo, kaanitthuna mwaakiipithinhe Mmahiye,*Mwaakivinthe mpakha ovira onanariwa wanyu,Mwaahenle mukano okathi aka wiira mukuupuwele!
14 Mutthu okhwiiye, onootthikela-tho okhala mukumi?
Kinoowehererya mahiku ootheene a muteko aka wookhanyereriwa,Mpakha otaphuliwa.
15 Nyuwo munookiihana, nto miyo kinoowaakhulani.
Munimunkheliwa ni miyo, okhala wiira ti nyuwo mukuupale ni matata anyu.
16 Masi vano, nyuwo munimakela owehexexa khula etthu kinivara aka;Muniwehexexa itampi saka paahi.
17 Etampi aka erootthukiwa mmurupani,Munnittiyela etampi aka ni ekoola.
18 Ntoko mwaako onimora ni onipwexakaseya,Ni mwala onikhuma nipuro naya,
19 Ntoko maasi anikuttha aya maluku,Ni maasi manceene anikhupa aya mihaava,Siiso, nyuwo munnimala-maliha nlipelelo na pinaatamu.
20 Nyuwo munnithipelela onwerya mutthu owo mpakha okhwa;Nyuwo munnituruka mukhalelo wa mutthu owo, ni munnimuroiha omahiye.
21 Anaawe annittittimihiwa, masi owo khonisuwela etthu;Awo khanooneliwa vatthu, masi owo khonisuwela etthu.
22 Ori ene mukumi paahi,Owo tonoona awe owereya ni toninla awe”.
Inoota
^ Aahiiso, woonasa wene: “ni onniikitthiwa”.
^ Eheeperi, “munnikikuxa”.
^ Nwehe Moolumo Ootthokiheriwa.
