Yoobi 15:1-35
15 Elifaazi a oTemaani, aahaakhula iiraka:
2 “Niireke wiira mutthu orina ankhili onimwaakhula ni moolumo eethiru?Aahiiso onoovona ni epheyo enikhuma mpantta onikhuma nsuwa?
3 Khuuvo onrowa ottottela mureerelo akhala wiira onnipwapwa ni moolumo eethiru,Ni khuuvo onrowa ottottela mureerelo alavula moolumo ahirina efaita.
4 Nyuwo munniwiiriha atthu akina ohimoova-tho Muluku,Ni munniwiiriha atthu akina ohimuupuwela-tho Muluku.
5 Mwaha wa etampi anyu, nyuwo munnilavula siisa,Munnithanla moolumo a olavilavi.
6 Eyano anyu tenoophukelani, ohiya miyo;Eyano anyu tenihimya wiira mookhalana mulattu.
7 Niireke mulopwana oopacerya oyariwa ti nyuwo?Aahiiso ti nyuwo mpacenrye opattuxiwa ahinatthi opattuxiwa mattumuxa?
8 Niireke munniiwa isiiri sa Muluku,Aahiiso ti nyuwo paahi murina ankhili?
9 Etthu xeeni nyuwo munisuwela anyu, hiyo nihinsuwela ahu?
Etthu xeeni nyuwo munisuwela anyu saana, hiyo nihinsuwela ahu saana?
10 Hiyo nookhalana ipwi nave nihuuluvala,Nihinnuwa waavikana apapinyu.
11 Niireke moolumo oolipiha a Muluku khanoophiyeryani,Nnakhala moolumo oomaaliha?
12 Xeeni munihiya anyu murima anyu wookuxakani,Xeeni munniweha anyu munanariwe ene?
13 Nyuwo munninanariwa ni Muluku,Tivonto munilavula anyu moolumo ootakhala mmuhimyaka yena.
14 Vaniweryaneya sai pinaatamu okhala ooloka?Vaniweryaneya sai pinaatamu okhala naxariya?
15 Mwiiwe! Muluku khonroromela malaikha awe oowaarya,Hata erimu khelonke vamaithoni vawe.
16 Vaatepa mutthu onivara itthu soonanara, ni itthu Muluku oninyokha awe,Mutthu yoowo oniwurya itthu sootakhala ntoko maasi!
17 Mukiwiriyane, kinimooleelani etthu!
Kinimooleelani etthu koonale aka,
18 Etthu asuweli ahimmye aya,Yeeyo aleeliwe aya ni axipaapa aya ni ahivinthe aya.
19 Awo paahi ti yaavahiwe elapo,Nave khuuvo namurwa aavira eriyari aya.
20 Mutakhali, onnihaawa mahiku ootheene a okumi awe,Owo onniweha mixankiho iyaakha sootheene sa okumi awe.
21 Owaruni wawe onniiwa itthu soowoopiha;Okathi wa murettele, alavilavi annimutuphela.
22 Owo khonikupali wiira onimoopowa mweepiphini;Owo oosukiwa wiira iiviwe ni espaata.*
23 Owo onneettakasa ophavelaka eyoolya,* okohaka wiira: “Eri woowi?”
Onnisuwela saana wiira nihiku na epiphi nri vakhiviru.
24 Owo onrowa woovaka mwaha wa oxanka ni woona owereya;Sinrowa omoopopihaka ntoko mwene iilokihenrye wiira omutuphele.
25 Owo onnivenxa ntata nawe wiira onvirikanye Muluku,Ni onneererya onvaanyiha Muluku Oowerya Sootheene;
26 Onninvirikanya iisoonaka,Okunxe ene nikula nawe noowiisaakiha,* noolipa ni noolemela;
27 Owiitho wawe ti wooneneva,*Nave erukulu awe ti yuulupale;
28 Owo onikhala ipooma sinrowa opwexakasiwa,Ipa sihinrowa okhaliwaka,Seiyo sinrowa okhalaka ntoko maluku oowuukeliwa.
29 Owo khonrowa othaaciri, nave mihakhu sawe khasinrowa waatta,Nnakhala mireerelo sawe khasinrowa omwareela mulaponi.
30 Khonrowa woopowa mweepiphini;Onrowa okhalaka ntoko mwiri, yoowo iritta saya saamukhaani sipahiwe ni mooro,*Nave onoolakaseya ovavihiwaka ni iphumu sa Muluku.
31 Muhimuhiye ohapuxiwaka mwaha wa waamini itthu seethiru,Okhala wiira owo khonrowa ophwanya etthu;
32 Eyo enoomwiiraneela voohipisa,Nave onrowa olikanaka ni mwiri yoowo iritta saya sihiniphuwa ifilori.
33 Owo onrowa okhalaka ntoko mwiri wa ewuuva, yoowo mihokorokho saya simonre sihittokontthe,Nave onrowa olikanaka ni mwiri wa olivera, yoowo ifilori saya simonre.
34 Okhala wiira ekurupu ya atakhali* kheniyara,Nave mooro onoopaha itenta* sa atthu yaale aneemererya okunyariwa.
35 Awo annirupala maxakha, enayara itthu sootakhala,Mmirimani mwaya moosareya-mo wootha”.
Inoota
^ Aahiiso, “xoowa”.
^ Eheeperi, “ephaawu”.
^ Aahiiso, “eskuutu”.
^ Aahiiso, “owo onniixinnuwiha”.
^ Eyo piiyo, ohirina nlipelelo na woopowa.
^ Aahiiso, “anamavirikanya”.
^ Aahiiso, “iheema”.
