Yoobi 17:1-16
17 “Nkirina-tho ikuru, nave kihanle okhwa;Mahiye anookilipelela.
2 Alipa-ooveeha aakirukurerya,Nave maitho aka anniweha mweettelo aya wootakhala.
3 Xontte mwaakhele neemexeryo naka, musuke.
Ti pani onrowa okivaha ntata ni okeemelela?
4 Nyuwo munniwiiriha ohikhalana ankhili,Tivonto muniwiiriha anyu ohiweettela saana itthu.
5 Awo annikawana itthu saya ni apatthani aya,Variki maitho a anaaya yiixeryaka mwaha wa ovoliwa etala.
6 Muluku ookiiriha oveehiwaka* ni atthu,Nave atthu awo annikisenela owiitho.
7 Maitho aka khanoona saana mwaha wa oriipiwa murima,Miyoono saka ni metto saka siri muthala ene.
8 Anaxariya anniweha etthu ela atikinihiwe ene,Atthu ooreera murima annixanka vanceene mwaha wa atthu ootakhala.*
9 Naxariya khonrowa ohiya weettela exariya,Nave ole ooreera murima, onrowa otepaka okhalana ikuru wiira ovareke itthu sooreera.
10 Masi, nyuwo pooti orwa, mutthikeleke okivaanyiha,Okhala wiira mpakha-va, khuuvo a nyuwo olavunle etthu ya miruku.
11 Mahiku aka aamala;Apalano aka aahononiwa, itthu siniphavela murima aka, soomala.
12 Awo animakela orantteliha ohiyu ni othana,Ahimyaka wiira: ‘Vahanle oxa, okhala wiira vaariipa’.
13 Akhala wiira kinoolipelela, Mahiye* tanrowa okhala empa aka;Kinrowa waatala ekhaama aka weepiphini.
14 Miyo kinimwiirela mahiye wiira: ‘Nyuwo mwa apaapa!’
Nave kinimwiirela miyunku wiira: ‘Nyuwo mwa amaama ni mwa murokora aka!’
15 Nto nlipelelo naka nri woowi?
Ti pani oniwerya oweha nlipelelo naka?
16 Nlo* nnoorowa mpakha mikhora sootthukiwa sa oMahiye,*Okathi ootheene ahu ninrowa ahu okhuruwela hoothe muntthupini”.
Inoota
^ Eheeperi, “okhala muhapo”.
^ Aahiiso, “anamavirikanya”.
^ Nwehe Moolumo Ootthokiheriwa.
^ Eyo piiyo, nlipelelo naka.
^ Nwehe Moolumo Ootthokiheriwa.
