Yoobi 24:1-25
24 “Xeeni Muluku Oowerya Sootheene ohithanlaka nihiku?
Xeeni ale animusuwela, ahiniweha aya nihiku nlo?*
2 Atthu annixoviha mikano;Anniiya ipwittipwitthi sa atthu akina anatakanxa ni sawaya.
3 Annimukuxa puuru a anamwane ahirina apapaya,*Nave annikuxa epooyi ya muthiyana naamukhweli, ntoko neemexeryo na etthu okomphe awe.
4 Awo anniwoomola alipa-oohaawa wiira aheetteke mustaraatani;Atthu oohaawa ahaana owiipitha.
5 Alipa-oohaawa annaavya eyoolya ntoko apuuru a mutakhwani anikhala moothakoni;Awo annaavya eyoolya para anaaya moothakoni.
6 Annirowa imatta sa atthu akina* ephavelaka eyoolya,Nave annitthikela ottotta ewuuva ya atakhali.
7 Anniviriha ohiyu ahiwanre etthu, ahirina ikuwo;Kharina etthu yoowiikhuneela okathi wooriirya.
8 Awo aanaana mwaha wa epula ya omiyaakoni;Annivara myala okhala wiira kharina opuro wookhala.
9 Anamwane ahirina apapaya, annikuxiwa vapeeto va amamaya;Nave ikuwo sa atthu oohaawa, sinnikuxiwa ntoko neemexeryo.
10 Annikhanyereriwa weetta ahiwanre etthu, ahirina ikuwo,Nave anniteexa mavisi a etiriku, avoliwe ene etala.
11 Awo annivara muteko woolipa mukerekhere mwa mwaako nsuwa nivihaka;*Anninyakatta ewuuva, masi annivoliwa ntthona.
12 Ale anihala okhwa annithipelela wunla mpooma;Ale avulanle vanceene annikhuwela avekelaka nikhaliheryo,Hata vari siiso, Muluku khonoona okhala etthu yootakhala.*
13 Aakhala aninyokha waarya;Annikhootta iphiro sa waarya iwo,Nave khanitthara iphiro iyo.
14 Nawiive onnivenya oxaaka;Onniwiiva atthu oothoiwa ni amasikhini,Vano ohiyu onniiya.
15 Mulopwana namararuwa onnilipelela wiila,Onahimya wiira: ‘Khuuvo onrowa okiweha!’
Nave onnikhuneela owiitho wawe.
16 Ohiyu, alopwana annikela mpaani mwa aneene;Othana anniiwalela mpa mwaya.
Awo annisyaka okokola.
17 Voosiisu, onniwoopiha ntoko atthu akina anoova aya epiphi;Awo annisuwela itthu soowoopiha sinaakhumelela atthu ohiyu.
18 Masi awo annikhumpwa moowaakuveya ni maasi.
Etthaya aya enootakhalihiwa.
Awo khanrowa otthikela-tho imatta saya sa ewuuva.
19 Siisaale ntoko wuuma ni oviha onivaviha aya eneevi yootothowa,Mahiye* annaakuxa ale atthenke!
20 Maama aya* onimwaaliyala; miyunku sinimwaakhuura.
Awo khanrowa wuupuweliwa-tho.
Atakhali animuntakasiwa ntoko mwiri.
21 Awo annimwiiyerya muthiyana ohiniyara,Ni annimuhaaxa muthiyana naamukhweli.
22 Muluku* onoorumeela ikuru sawe wiira aamala-malihe atthu oowerya;Nnaamwi arowaka ovenya, khanisuwela yaarowaka okhala akumi wala nnaari.
23 Muluku* onnaahiya wiira yiiroromeleke ni yooneke okhala wiira ari oovareleleya,Masi maitho awe anniweha itthu sootheene anivara aya.*
24 Awo annivuwihiwa okathi vakhaani, nuumala-vo khanikhala-tho.
Ari ntoko makala a ipyo oowiikitthiwa ni oothukumanyiwa;Annikuruxiwa ni annookhwa ntoko aniira aya atthu akina.
25 Vano, ti pani oniwerya wooniherya wiira miyo ka nawoothe,Aahiiso ovaanyiha moolumo aka?”
Inoota
^ Eyo piiyo, nihiku nawe na ophukela.
^ Aahiiso, “Ikwaasuni”.
^ Aahiiso, woonasa wene: “ottotta malaxi mmatta”.
^ Aahiiso, woonasa wene: “anniwama makhura mukerekhere mwa mwaako”.
^ Aahiiso, woonasa wene: “Muluku khoninvaha nthowa mutthu”.
^ Nwehe Moolumo Ootthokiheriwa.
^ Eheeperi, “Erukulu”.
^ Eheeperi, “Owo”.
^ Eheeperi, “Owo”.
^ Eheeperi, “iphiro saya”.