Yoobi 27:1-23
27 Yoobi aahitthikela olavula mwaha* awe, oriki:
2 “Kinnimulaphela Muluku mukumi, yoowo okithokorenrye voohikhala exariya,Kinnimulaphela Muluku mukumi Oowerya Sootheene, yoowo iirinhe okumi aka okhala wooxankiha.
3 Kaamumulaka-ru,Nave iphumu sa Muluku saakhalaka-ru ni miyo,
4 Eyano aka khenrowa olavula itthu sootakhala;Nnakhala nlumi naka khaninrowa olavula itthu soowootha!
5 Miyo nkinikhala-khala koohimyasakani okhala anaxariya!
Mpakha okhwa waka, nkinihiya* okhala oororomeleya!
6 Kinoothipelela okhala naxariya, ni nkinikhala-khala kihiyereryaka;Okumi aka wootheene,* murima aka khonrowa okiphukela.*
7 Awanani aka yiirihiwe ntoko atthu anipaka itthu sootakhala,Ale anikituphela yiirihiwe ntoko mutthu ootakhala murima.
8 Nlipelelo xeeni mutakhali* onikhalana awe okathi onipwetexiwa awe,Okathi Muluku onimwaakha awe okumi awe?
9 Niireke wiira Muluku onimwiiwa okhuwela wawe,Okathi anrowa aya omukhumelela maxakha?
10 Aahiiso mutthu owo onoosiveliwaka ni Muluku Oowerya Sootheene?
Wala ononvekelaka Muluku okathi wootheene?
11 Miyo kinoowiixuttihani owerya* wa Muluku;Nkinrowa owiipithihani etthu ya Muluku Oowerya Sootheene.
12 Mukiiwe! Akhala wiira ootheene anyu muhoonihiwa itthu moolohani,Xeeni moolumo anyu ari aya eethiru?
13 Etthu mutakhali onaakhela awe wa Muluku,Etthu mutthu onaahaaxa akhwaawe onaakhela awe wa Muluku Oowerya Sootheene, ti ela:
14 Akhalana anamwane oowaatta, awo animwiiviwa ni espaata,*Nave osuulu awe khonrowa okhalana eyoolya.
15 Ale anrowa ohala ari ene akumi, animookhwa eretta, evithiwe,Nave axaaraya atthu awo akhwiiye, khanrowa owunlela.
16 Hata uukelaka eparatha ntoko etthaya,Ni uukelaka ikuwo sooreera ntoko oloko,
17 Masi atthu ooreera murima tanrowa owaraka ikuwo iyo uukenle awe,Nave ale ahirina mulattu, tanrowa okawana eparatha awe.
18 Empa oniteka awe ti yoowaakuva ohononeya ntoko empa ya eworo-woro,Ntoko muxaxa wa mulipa-oowehaweha.
19 Onoorowa wummaathi ori ene thaaciri, masi mihakhu sawe khasinrowa othukumanyiwa;Okathi onrowa awe ovenya, khonrowa ophwanya etthu.
20 Woova ononwerya ntoko maasi oowaatta,Ohiyu, onookuxiwa ni munamukhaya.
21 Epheyo ya mpantta onikhuma nsuwa enoomuroiha ottaiwene, nto owo onoolakaseya;Enonvaviha emukumihe owannyawe.
22 Epheyo eyo enommorela ehimoonelaka othunku,Onimweereryaka otthyawa mahala ene wiira ohivavihiwe.
23 Eyo ennimutheya,Ni enninveeha, opuro eri aya.*
Inoota
^ Eheeperi, “muhapo”.
^ Aahiiso, “kinoothipelela”.
^ Aahiiso, “Mahiku aka ootheene”.
^ Aahiiso, “okitheya”.
^ Aahiiso “namavirikanya”.
^ Aahiiso, woonasa wene: “ni ntata”.
^ Aahiiso, “xoowa”.
^ Aahiiso, woonasa wene: “annimmanela makuphi ni annimoopela muturi opuro ori aya”.
