Yoobi 31:1-40
31 “Miyo koovarihana ni maitho aka.
Nto kinrowa onwehexexa sai muthiyana ni muupuwelo woohikhalela?
2 Vaakhanle wiira kihiira siiso, etthu xeeni Muluku, yoowo ori wiirimu, aarowa awe okivaha?Muluku Oowerya Sootheene, yoowo ori osulu, aarowa okivaha exeeni?
3 Kiira ehasara enaalipelela atakhali?Ni maxakha anaalipelela ale anipaka itthu sootakhala?
4 Kiira Muluku onniweha itthu kinivara aka,Ni onnikontari mavalo aka?
5 Kiireke wiira kootoko wootha?*
Kiireke kootoko onwoka mutthu?
6 Muluku okiphime ni epalansa yeekeekhai;Nto owo onoosuwela wiira ka mutthu oororomeleya.
7 Vakhala wiira mavalo aka annihapuwa ephiro yooreera,Aahiiso murima aka onnitthara maitho aka,Wala matata aka aavara etthu yoonanara,
8 Weeso miyo kaale epyo mutthu mukina olyeeke,Nave ele enaala aka, epheliwe.*
9 Vakhala wiira murima aka waahihapuxiwa ni muthiyana mukina,Ni kaahihala kiwehawehaka mukhora wa namwaattamanani aka,
10 Weeso mwaaraka oxile ipyo para mulopwana mukina,Nave alopwana akina amurupihe.*
11 Eyo yaarowa okhala etthu yoowuuliha muru,Etampi yeeyo alipa-oophuka milattu yaarowa aya okihukhumu.
12 Yaarowa olikanaka ni mooro waarowa opaha ni opwetexa,*Opahaka itthu sootheene kihaawenle aka.
13 Vakhala wiira kaahikhootta waawiriyana arumeyi aka alopwana ni athiyana,Okathi yaakileela aya mulattu kaarina aka naawo,
14 Kinrowa opaka exeeni okathi Muluku onrowa awe okikoha etthu kipanke aka?
Kinrowa omwaakhula exeeni okathi onrowa awe okikoha?
15 Kiira ole okipanke mmirimani, ti yoowo-tho aapanke atthu awo?
Kiira ootheene ahu nipakiwe ni yoowo mmirimani mwa aximamihu?
16 Akhala wiira kaanikhootta waavaha atthu oohaawa etthu yaaphavela aya,Aahiiso kootoko omwiiriha muthiyana naamukhweli ohikhalana nlipelelo;*
17 Akhala wiira kihoolya eyoolya aka mekhaka,Kiwiimana anamwane ahirina apapaya;*
18 Okhuma omiravo aka, anamwane ahirina apapaya yaaninnuwa ni miyo, okhalaka ntoko kaari paapa aya,Nave okhuma enamwane aka* kinnaakhaliherya athiyana anaamukhweli.
19 Akhala wiira konweha mutthu okhwaaka mwaha wooriiriwa maana khorina ikuwo,Aahiiso konweha mutthu oohaawa ohirina etthu yoowiikhuneela;
20 Akhala wiira miyo nkaavaha manri a ipwittipwitthi saka,Wiira yiikhuneeleke, yooneke oviha ni akixukhureleke;
21 Akhala wiira kootoko owoopopiha anamwane ahirina apapaya,Okathi yaaphavela aya nikhaliheryo naka vamukhora va epooma;*
22 Weeso, moono aka okhonyowe mmakhatani,Nave moono aka wunteye mweekookhunoni.*
23 Okhala wiira miyo kaanoova okiphwanya ihasara sinikhuma wa Muluku,Nave nkaakhanle ooweemela ohoolo wawe woovuwa.
24 Akhala wiira kaahiroromela eweero,Aahiiso kaahihimeerya eweero yooreera wiira: ‘Miyo kinoororomelani nyuwo!’
25 Akhala wiira kaahitteeliwa murima mwaha wookhalana mihakhu soowaatta,Ni mwaha wa mireerelo soowaatta kaarina aka;
26 Akhala wiira kaaniweha nsuwa naaryaka,Aahiiso mweeri weettaka opuro aya;
27 Nave murima aka waahiwokiwa,Kinakokhorela itthu iyo, kipexaariki ntata naka;
28 Eyo yaarowa okhala etampi yaaphwanela ohukhummwa ni alipa-oophuka milattu,Okhala wiira kammukhootta Muluku eekeekhai a wiirimu.
29 Niireke kootoko ohakalala ni opwetexiwa wa nwanani aka?Aahiiso kootoko ohakalala mwaha wa etthu yootakhala yamphwannye?
30 Nkitonko omutakhaliha nwanani aka wiira okhwe,Nkinapake etampi eyo.
31 Niireke atthu a etthoko aka khakonhe wiira:‘Ti pani oniwerya omphwanya mutthu ohivonne eyoolya awe?’*
32 Khuuvo namurwa onirwa ohiyu, khurupa ota;Miyo koohula mikhora saka para mulipa oneetta mikwaha.
33 Niireke koomananiha ovitha soottheka saka ntoko aniira aya atthu akina,Kivithaka etampi aka mpolsuni mwa nlaya naka?
34 Niireke kihoova moonelo wa muttitthi,Aahiiso kihoova othanyiwa ni imusi sikina,Ekiirihaka omaala ni woova okhumela ota?
35 Kaaniphavela wiira aakhanle mutthu onikiwiriyana!
Miyo kaamwaakhulela wiira moolumo kilavunle aka teekeekhai.
Muluku Oowerya Sootheene okaakhule!
Kaaniphavela wiira ole onikootherya aalempe itthu iyo mutukumentoni!
36 Miyo kammukuxa mmakhatani mwaka,Kaamumpweha vamuru vaka ntoko ekhara.
37 Miyo kammuliva moovarihana ni mavalo aka ootheene;Kammwaattamela voororomeleya, ntoko mukhulupale.
38 Akhala wiira kinoowaakha atthu ematta aya, nto awo aniikhupanyerya mwaha wa miyo,Nave-tho matthuulu aya ananla;
39 Akhala wiira kihoolya mihokorokho saya voohiliva,Aahiiso akhala wiira kihaaxankiha axineene,
40 Weeso, mmatta mwaka siphuwe miiwa ohiya etiriku,Nave aphuwe malaxi oowunkha ohiya esevaata”.
Moolumo a Yoobi animalela vaava.
Inoota
^ Aahiiso, woonasa wene: “weetta ni atthu oohiroromeleya?”
^ Aahiiso, “osuulu aka omalamalihiwe”.
^ Eheeperi, “alopwana akina akokhore ohoolo wawe”.
^ Eheeperi, “aamoolya (ohopela) mpakha opwetexa”.
^ Eheeperi, “wiiriha maitho a muthiyana naamukhweli ohoona”.
^ Aahiiso, “ikwaasuni”.
^ Eheeperi, “okhuma okathi kaari aka mmirimani mwa amaama”.
^ Aahiiso, woonasa wene: “okathi kaaweha aka wiira naahikhala nikhaliheryo vamukhora va epooma”.
^ Aahiiso, “opheleye opuro omenle awe”.
^ Eheeperi, “enama”.
