Yoobi 32:1-22
32 Vano, alopwana ale araru yaahihiya omwaakhula Yoobi, okhala wiira owo aanikupali wiira aari naxariya.*
2 Masi Elihu, mwaana a Barakeyeli a oBuxi, a nihimo na Rami, aahinanariwa vanceene. Owo aahinanariwa ni Yoobi, mwaha woowi Yoobi owo aaneererya wooniherya wiira aahikhalana erasau onvikana Muluku.
3 Nave owo aahinanariwa vanceene ni apatthani araru a Yoobi, okhala wiira khiyaawerya omwaakhula oratteene, nave-tho yaahimuhimya Muluku okhala mutakhali.
4 Elihu aahilipelela wiira omwaakhule Yoobi, okhala wiira ootheene aya yaari aalupale onvikana yena.
5 Okathi Elihu oonale awe wiira alopwana ale araru khiyaarina-tho etthu yoohimya, owo aahinanariwa vanceene.
6 Tivonto Elihu mwaana a Barakeyeli, a oBuxi, aahipacerya olavula, oriki:
“Miyo ka mmiravo,*Nave nyuwo mwa alopwana aalupale.
Tivonto kahaalavula aka etthu mwaha wa woottittimihani,Nave kaanoovelela wooleelani etthu kinisuwela aka.
7 Kaahuupuwela vamurimani vaka, kiiraka: ‘Kaahiye atthu aalupale alavule,Ale arina iyaakha sinceene yaahimye ankhili’.
8 Masi, ti ikuru soowaarya Muluku onaavaha awe atthu,Ni ti iphumu sa Muluku Oowerya Sootheene, sinaavaha osuwela.
9 Iyaakha paahi khasinimwiiriha* mutthu okhalana ankhili,Nnakhala khahiyo atthu oowuuluvala paahi anisuwela etthu yooreera.
10 Tivonto kinihimya aka wiira: ‘Mukiwiriyane,Nave kinimooleelani etthu kinisuwela aka’.
11 Moone! Miyo kihoolipelelani wiira muhimye etthu mwaarina anyu para ohimya;Kaaniwiriyana miyuupuwelo sanyu,Okathi mwaavya anyu itthu soohimya.
12 Miyo kihoowiriyanani oratteene,Masi khuuvo a nyuwo owenrye wooniherya wiira Yoobi oottheka,Aahiiso waakhula moolumo awe.
13 Nto muhihimyeke wiira: ‘Hiyo nihaaphwanya ankhili;Owo onipwapweliwa ni Muluku, ohiya ni pinaatamu’.
14 Yoobi kholavunle ni miyo,Tivo miyo nkinrowa omwaakhula ntoko nyuwo mmwaakhunle anyu.
15 Alopwana ala aaxanka, khanoona yoowaakhula;Kharina-tho etthu yoohimya.
16 Miyo kihaalipelela, masi awo khanilavula-tho etthu;Arimweemela paahi, ahirina-tho etthu yoowaakhula.
17 Tivo, ni miyo-tho kinimwaakhula;Kinoohimya etthu kinisuwela aka,
18 Okhala wiira kookhalana moolumo manceene;Ikuru soowaarya sinnikiiriha olavula.
19 Kinniphavela vanceene olavula,*Kaahilavule murima aka onoophuleya.
20 Mukihiye kilavule, wiira kimumule!
Kinoohula eyano aka ni kinimwaakhula.
21 Nkinrowa omuthanla mutthu;Nnakhala nkinrowa omunyoholela pinaatamu,
22 Okhala wiira miyo nkinsuwela omunyoholela mutthu;Kiira siiso, Mpattuxa aka onookipwetexa voowaakuveya.
Inoota
^ Aahiiso, “okhala wiira owo aari naxariya vamaithoni vawe”.
^ Eheeperi, “kirina mahiku vakhaani”.
^ Aahiiso, “mahiku manceene khanimwiiriha”.
^ Eheeperi, “Mmirimani mwaka ori ntoko eviinyu yoottiyeliwa, ehinivira epheyo”.