Yoobi 33:1-33
33 “Vano nyuwo Yoobi, xontte, nwiriyane moolumo aka;Nwiriyane itthu sootheene kinihimya aka.
2 Xontte, mukiwiriyane! Kihaana olavula;Eyano aka ehaana olavula.
3 Moolumo aka annooniherya exariya ya vamurimani vaka,Nave eyano aka, ennilavula mweekeekhai etthu kinisuwela aka.
4 Muluku ookuupa ni ikuru sawe,Muluku Oowerya Sootheene, ookivaha okumi ni iphumu sawe.
5 Mwaaweryaka mukaakhule;Mwiilokiherye, ni muhimye mulattu anyu ohoolo waka.
6 Mwiiwe! Miyo ni nyuwo nnoolikana ohoolo wa Muluku;Ni miyo-tho kuupiwe ni oloko.
7 Tivonto, muhikoove,Nave moolumo aka ahoolemeleni.
8 Masi miyo koowiiwani mulavulaka,Aayo, koowiiwani ikwaha sinceene mulavulaka moolumo ala:
9 ‘Miyo ka mutthu ooreera murima, nkitthenke;Miyo ka mutthu ooloka, nkirina mulattu.
10 Masi Muluku onnaavya mathowa para okilupattha;Onnikithokorerya ntoko nwanani awe.
11 Owo onnitthukwa metto saka olipihaka ni ithaapwa,*Onnivarerya iphiro saka sootheene’.
12 Masi nyuwo khamurina erasau para olavula siiso, tivo kinoowaakhulani:
Muluku ti muulupale onvikana mutthu.
13 Xeeni munimukhupanya anyu?
Niireke nthowa noowi khaakhunle moolumo anyu ootheene?
14 Muluku onnilavula ekwaha emosa, ni onnitthikela ekwaha ya nenli,Masi khuuvo oninwiriyana,
15 Owo onnilavula moolohani, ni onnooniherya itthu ohiyu,Okathi atthu anirupa aya ikhove suulupale,Okathi anirupa aya vakhaamani vaya.
16 Onnilavula owaruni waya,Onnaavaha malakiheryo,
17 Wiira aahiihe atthu opaka itthu sootakhala,Ni aakhapelele wiira ahiixinnuwiheke.
18 Muluku onnaakhapelela atthu awo wiira ahimorele mulittini,*Onnikhapelela okumi aya wiira ahiiviwe ni espaata.*
19 Mutthu onoowerya wiixutta etthu okathi onimmaathi awe vakhaamani vawe oonaka owereya,Ni okathi makhuva awe aninwereya aya imaara sootheene.
20 Tivo, owo onnithanya eyoolya,Ni onnikhootta hata eyoolya yoomusivela.
21 Erutthu awe ennootta,Nave makhuva awe, yaawo yahooneya, vano annooneya.
22 Okumi awe onnaattamela nlitti;*Onniwaattamela ale aniwiiva atthu.
23 Akhala namuhupi mmosa* para yena,Nave eriyari ya atthu 1.000, akhala mutthu mmosa onimwaakiha,Onamuleela mutthu owo etthu yooreera opaka,
24 Nto Muluku onoomureerela murima,Ni onoohimya wiira: ‘Muhimuhiye orowaka mulittini!*
Koophwanya enamuna ya omoopola!
25 Erutthu awe ekhale ekumi, ovikana okathi aari awe mmiravo;Otthikele-tho okhalana ikuru sa omiravo awe’.
26 Mutthu owo onoomuxonttela Muluku, nto Muluku onoomweemererya,Mutthu owo onooweha owiitho wa Muluku otteeliwe ene murima,Nave Muluku onoomwiiriha mutthu owo okhala ooloka vamaithoni va Muluku owo.
27 Nto mutthu owo onimwaleela* atthu wiira:‘Koottheka, ni koonanariha etthu yooreera,Masi nkaakhenle ele kaareerela aka waakhela.*
28 Owo ookoopola wiira kihirowe mulittini,*Nave okumi aka onooweha waarya’.
29 Mweekeekhai, Muluku toniira itthu iya sootheene,Onnimwiirela siisa mutthu, vanli hata vararu,
30 Onoomoopola wiira ohirowe mulittini,*Siiso, mutthu owo onookhalaka mukumi.
31 Nyuwo Yoobi, nwiriyane oratteene moolumo aka! Mukiiwe!
Mmaale, miyo nlelo kinoolavulaka.
32 Mwaarina ene etthu yoohimya, mukaakhuleke.
Mulavule, okhala wiira kimphavela woona mwahaarina mulattu.
33 Mwahaarina etthu yoohimya, weeso muhaana okiwiriyana;Mmaale, nto kinoowiixuttihani ankhili”.
Inoota
^ Nwehe Moolumo Ootthokiheriwa.
^ Aahiiso, “mmahiye”.
^ Aahiso, “xoowa”.
^ Aahiiso, “mahiye”.
^ Aahiiso, “Nakhala nlaikha nimosa”.
^ Aahiiso, “mmahiye”.
^ Eheeperi, “wiipa”.
^ Aahiiso, woonasa wene: “eyo khekiphwanyinhe mureerelo”.
^ Aahiiso, “mmahiye”.
^ Aahiiso, “mmahiye”.
