Yoobi 38:1-41
38 Vano, Yehova aahilavula ni Yoobi, eriyari ya epheyo yuulupale, onamukoha wiira:
2 “Ti pani ola onivaanyiha miruku saka,Ni onilavula ohisuwelaka etthu?
3 Xontte, mwiilipihe ntoko mulopwana;Kinimookohani, nto nyuwo mukaakhule.
4 Okathi kaapattuxa aka elapo, mwaari woowi?
Mukileele, mwaasuwelaka.
5 Niireke munnimusuwela ti pani ophimme elapo eyo,Aahiiso ti pani ophimme orumeelaka mukhoyi?
6 Ipilaari sa elapo sithipeliwe vaavi?Aahiiso ti pani eemenxe nluku nuulupale na alisenso aya?
7 Mwaari woowi okathi itheneeri sa voosiisu saatthapa aya vamosa,Nave anamwane ootheene a Muluku,* yaamana aya makuphi akhuwelaka?
8 Ti pani owalenle ephareya?Ti pani ohenle mikano ephareya okathi yaayariwe aya?*
9 Okathi kaakhunenle aka ephareya ni meeku,Ni okathi kuupanyenrye aka ni meeku ooriipa?
10 Okathi kaahelenle aka mukano aka,Ni kaahelenle aka itaranka ni mikhora?
11 Nave kaahimenrye aka wiira: ‘Murweeke mpakha-va, masi muhivikane;Mawimpi anyu maalupale, anrowa weemelaka va’?
12 Niireke mootoko oruma wiira ekhumelele evoosiisu?Aahiiso mootoko* osuweliha oxaka opuro aya,
13 Wiira evarelele elapo mponta mwaya,Ni yaatathe atakhali?
14 Waarya onnitatuxa makhalelo a elapo, siisaale eseelu etthittiwe voolokoni,Nave mukhalelo aya onnooneya siisaale ntoko mukhalelo wa ekuwo.
15 Masi atakhali annaakhiwa muthuko aya,Nave miteko saya sootakhala sinnimala.
16 Niireke mootoko orowa vathi opuro oniphattuwa ephareya,Aahiiso weetteetta vathi va ephareya yoowiixa?
17 Niireke mootoko osuwelihiwa mikhora sa wookhwaani,Aahiiso mootoko woona mikhora sa epiphi yuulupale?
18 Niireke munnisuwela mapuro ootheene a elapo?
Mukileele, mwaasuwelaka mapuro ootheene.
19 Waarya onikhala opuro xeeni?
Nave epiphi enikhala opuro xeeni?
20 Niireke munoowerya oroiha opuro enikhala aya,Nave munnisuwela ephiro eniroiha owannyeya?
21 Niireke munnisuwela itthu iya mwaha woowi mwiira muyariwe ene?Wala iyaakha* sanyu ti soowaatta?
22 Niireke mootoko okela opuro onisukiwa aya eneevi,Aahiiso mooweha opuro onisukiwa aya maralala,
23 Yaawo kisunke aka para okathi wa mixankiho,Para nihiku na ekhotto?
24 Muthuko* onimwareela mpantta xeeni?Nave mpantta xeeni wa elapo onipacerya aya woopa epheyo, enirwa mpantta onikhuma nsuwa?
25 Ti pani otthukunle ephiro para maasi a epula ari osulu?Nave ti pani opanke meeku anikukutteya a epula ya munamukhaya?
26 Wiira orupiheke epula opuro ohinikhaliwa,Ni orupiheke epula moothakoni memmo ohinikhala mutthu,
27 Wiira onaaniheke mapuro oowuuma,Ni omeliheke malaxi?
28 Niireke epula yookhalana paapa aya,Aahiiso ti pani ori paapa a okame?
29 Exeelu ekhumme mmirimani mwawani?Nave ti pani oyanre etthapwe yooriirya?
30 Ti pani oniiriha maasi okhala oolipa ntoko nluku,Nave ti pani oniiriha vasulu va maasi oowiixa okhala ntoko exeelu?
31 Niireke munoowerya otthukwa mikhoyi sa ekurupu ya itheneeri eniihaniwa Khiima,*Aahiiso, otaphula mikhoyi sa ekurupu ya itheneeri eniihaniwa Khesiili?*
32 Niireke munoowerya okumiherya ota ekurupu ya itheneeri* waphiya okathi aya?Aahiiso weettiha ekurupu ya itheneeri eniihaniwa Aaxi,* vamosa ni axaana aya?
33 Niireke munnisuwela malamulo aneettiha erimu,Aahiiso munniwerya wiiriha malamulo awo* weettihaka itthu mulaponi?
34 Niireke munoowerya oruma meeku,Wiira ekhumelele epula yoorupeeni?
35 Niireke munoowerya oruma etari?
Niireke eyo enimoorwa wooleelani wiira: ‘Miyo kiri-va!’
36 Ti pani aapwenhe ankhili mmeekuni,Aahiiso ovanhe osuwela itthu sa osulu?*
37 Ti pani orina ankhili para okontari meeku,Aahiiso oniwerya opittula mirinki sa maasi a wiirimu,
38 Okathi etthaya enipakeya aya nttophe,Nave nttoku noowuuma ninvaraana aya?
39 Niireke munniwerya oxaya enama para kharamu?Aahiiso omaliha etala ya axaana a kharamu,
40 Okathi animpaathi aya mukhukuni mwaya,Aahiiso aniipitha aya mmuttuphani mwaya?
41 Ti pani onaavaha eyoolya anakhuku,Okathi axaana aya animukhuwelela aya Muluku anvekelaka nikhaliheryo,Ni aneettakasa aya mwaha wa ohikhalana etthu yoolya?
Inoota
^ Nuulumo na eheeperi nnihimya malaikha a Muluku.
^ Aahiiso, “okathi yaakhumme aya mmirimani”.
^ Eheeperi, “mahiku anyu”.
^ Eheeperi, “mahiku”.
^ Aahiiso, woonasa wene: “etari”.
^ Woonasa wene, sinihimmwa itheneeri siniihaniwa Pleiades, sa ekurupu ya itheneeri eniihaniwa Taurus.
^ Woonasa wene, ekurupu ya itheneeri eniihaniwa Orioni.
^ Eheeperi, “Masarooti”. Eliivuru ya 2 Ma 23:5, ennirumeela nuulumo ninhimya ekurupu ya itheneeri siniihaniwa sotiiyaku.
^ Woonasa wene, ekurupu ya itheneeri eniihaniwa Ursu Muulupale.
^ Aahiiso, woonasa wene: “malamulo a Muluku”.
^ Aahiiso, woonasa wene: “muupuwelo”.
