Yoobi 4:1-21
4 Nto, Elifaazi, a oTemani, aahilavula wiira:
2 “Akhala wiira mutthu onimweererya olavula ni nyuwo, niireke munompixerya murima wiira munwiriyane?
Ti pani oniwerya ohilavula etthu?
3 Ekeekhai wiira nyuwo mwaanaattaruxa atthu anceene,Nave mwaanilipiha matata ootteettheya.
4 Moolumo anyu yaanaavenxa ale yaamora,Mwaanaalipiha atthu ootteettheya makutha.
5 Masi okhala wiira eniiraneya ni nyuwo, mookhulumuwa;Ennoovarani nyuwo, nto munnixanka.
6 Omoova wanyu Muluku khoniwiirihani omuroromela yoowo?
Ororomeleya wanyu khonoovahani nlipelelo?
7 Niireke munnimuupuwela mutthu ohitthenke, yoowo okhwiiye ohinatthi ophiya okathi awe?
Aahiiso anaxariya apwetexiwe?
8 Miyo kooweha wiira ale anlima sootakhala,Nave ale anaala soonanara anrowa ohepha seiyo.
9 Annookhwa mwaha wa wiiseeleliwa ni iphumu sa Muluku,Nave annimala-mala mwaha wa onanariwa wawe.
10 Kharamu onnoopa murukulu, nave axaana a kharamu anninla,Masi hata maino a akharamu ootupa, anniphweeya.
11 Kharamu onnookhwa mwaha woohikhalana enama yookhuura,Nave axaana a kharamu annimwara-mwariwa.
12 Vano kooleeliwa moolumo a mwiitiho,Nave maaru aka ahiiwa moolumo awo.
13 Ohiyu, okathi kaarina aka ikhove suulupale,Kaahoonihiwa itthu saaxankinhe muupuwelo aka,
14 Kaahithukumela vanceene,Nave makhuva aka yaahisareya woova.
15 Yookhala etthu* yaavinre owiitho waka;Manri a erutthu aka yaahikeemela.
16 Nto etthu eyo yaaheemela,Masi miyo nkaasuwenle makhalelo aya.
Etthu eyo yaari ohoolo waka;Nto vaahimaaleleya, nuumala-vo kaahiiwa nsu naahimya wiira:
17 ‘Niireke pinaatamu onoowerya okhala naxariya onvikana Muluku?
Niireke pinaatamu onoowerya okhala ooloka onvikana Mpattuxa awe?’
18 Moone! Owo khonaaroromela arumeyi awe,Nave malaikha* awe onniphwanyana mathowa.
19 Aatepa atthu yaale anikhala ipa sitekiwe ni etthaya,Seiyo alisenso aya ari vatthayani,Sininyaanyiwa moowaakuveya ni oweexe!
20 Iyo sinninyaanyiwa voomalela, okhuma voosiisu mpakha ohiyu.Sinnirimeela, nto khuuvo oniweha.
21 Niireke khanlikana ni etenta* enipheliwa mikhoyi saya?
Awo annookhwa ahirina miruku.
