Yoobi 40:1-24
40 Yehova aahitthikela-tho olavula ni Yoobi, iiraka:
2 “Kiireke mutthu onoowerya ovaanyihana ni Muluku Oowerya Sootheene, uupuwelaka wiira Muluku owo oottheka?
Akhala mutthu oniphavela onvaanyiha Muluku, olavuleke niinaano-va”.
3 Nto Yoobi aahimwaakhula Yehova wiira:
4 “Miyo nkiniphwanelela.
Kinrowa owaakhulani exeeni?
Kinniphuta eyano aka.
5 Koolavula ekwaha emosa, masi nkintthikela-tho olavula;Koolavula vanli, masi nkinrowa-tho ohimya etthu”.
6 Vano, Yehova aahilavula ni Yoobi eriyari ya epheyo yuulupale, iiraka:
7 “Xontte, mwiilipihe ntoko mulopwana;Kinimookohani, nto nyuwo mukaakhule.
8 Niireke wiira munoovaanyiha wiira miyo ka naxariya?
Niireke munookiphukela, wiira mukhalane erasau?
9 Niireke mookhalana moono woowerya onlikana ni moono wa Muluku eekeekhai?Aahiiso nsu nanyu pooti okukutteya ntoko nsu nawe?
10 Xontte, mwiiphwanelihe ni ovuwa ni okhulupale;Nware nttittimiho ni oreera;
11 Mukumiherye ota onanariwa wanyu wuulupale;Mwaawehe atthu ootheene oowiixinnuwiha, ni mwaayeveihe.
12 Mwaawehe atthu ootheene oowiixinnuwiha ni mwaayeveihe,Mwaanyakelase atakhali opuro ari aya.
13 Mwaavithe ootheene aya vatthayani;Mwaatthuke* nipuro noowiipitheya,
14 Nto hata miyo kaamookupalini,*Wiira ntata nanyu noolopwana ninniwerya owoopolani.
15 Vano nkanweheeni Behemoothi,* yoowo kimpattuxale aka ntoko koopattuxalyaakani nyuwo.
Owo onnoolya malaxi ntoko epooyi.
16 Nkawehani ikuru sirina aya eyuunu awe,Nave owerya orina aya mitika siri veerukuluni vawe!
17 Mwiila awe ti woolipa ntoko mwiri wa eseeturu;Mitika sa itara sawe sinkhala ntoko sirootthaviwa.
18 Makhuva awe anlikana ni mipompe sa ekoopiri;Metto sawe sinlikana ni ikopo sa eyuuma yoolipihiwa.
19 Owo ori nipuro noopacerya,* eriyari ya miteko sa Muluku;Mpattuxa awe paahi toniwerya omwaattamela ni espaata.*
20 Eyoolya awe eniphwanyaneya omwaako,Weiwo axinama ootheene a mutakhwani anithweela aya.
21 Owo onimpaathi vathi va ekhokowa,Vamuuttutthini va nammese.*
22 Ekhokowa ennimukhuneela ni muuttutthi aya,Nave miri sininnuwa vakhatoni, sinnimurukurerya.
23 Okathi muro onitupa aya, owo khonoova.
Owo khonoova, hata maasi a oYordani ammanaka owiitho.
24 Niireke ookhala oniwerya onvara otthukunle ene maitho awe,Aahiiso ohoma ephula awe ni coolo?*
Inoota
^ Eheeperi, “Owiitho waya”.
^ Aahiiso, “kaamoottottopelani”.
^ Woonasa wene, enihimmwa Etthomotto (Hipopootamo).
^ Eheeperi, “topacenrye”.
^ Aahiiso, “xoowa”.
^ Aahiiso, “ttiili”.
^ Eheeperi, “muraakho”.
