Yoobi 42:1-17
42 Nuumala-vo, Yoobi aahimwaakhula Yehova, iiraka:
2 “Vano koosuwela wiira munniwerya opaka itthu sootheene,Ni wiira khiivo etthu munuupuwela anyu, muhiniwerya anyu opaka.
3 Nyuwo mookoha wiira: ‘Ti pani ola onivaanyiha miruku saka, ohisuwelaka etthu?’
Tivonto miyo koolavula, masi kihirina ankhili,Koolavula kihimyaka itthu sootepa otikiniha, seiyo kihinisuwela aka.
4 Nyuwo moohimya wiira: ‘Miyo kinoolavula, xontte mukiwiriyane.
Kinimookohani, nto nyuwo mukaakhule’.
5 Miyo kihiiwa mulavuliwaka,Masi vano kinnoowehani ni maitho aka.
6 Koothanana ni moolumo alavunle aka,Tivonto, kookilaathi vantthupini ni vattuurwani”.
7 Nuumala Yehova olavula moolumo ala ni Yoobi, Yehova aahimuleela Elifaazi a oTemaani wiira:
“Koonanariwa vanceene ni nyuwo ni apatthani anyu anli, okhala wiira khimulavunle ekeekhai mukihimyaka miyo, ntoko iirale awe murumeyi aka Yoobi.
8 Nto, mukuxe ipooyi 7 ni ipwittipwitthi soolopwana 7. Murowe wa murumeyi aka Yoobi, wiira mwavahe mukuttho woopahiwa mwaha wa etampi anyu. Vano Yoobi owo, onrowa woovekelelani. Miyo kinimweemererya etthu onrowa awe ovekela. Nto nkinirowa woovahani ehukhumu mwaha wa ololo anyu, okhala wiira khamulavunle ekeekhai mukihimyaka miyo, ntoko iirale awe murumeyi aka Yoobi”.
9 Tivo, Elifaazi a oTemaani, ni Bilidaadi a oXuuwa, ni Sofaari a oNaama, yaahirowa opaka etthu Yehova aarumme awe. Nto Yehova aahiiwa nivekelo na Yoobi.
10 Nuumala Yoobi waavekelela apatthani awe, Yehova aahimaliha maxakha a Yoobi, ni aahimuttikiherya muhakhu awe. Yehova aahinvaha Yoobi ikwaha piili mireerelo aarina awe khalai.
11 Axinnawe ni axirokorawe ootheene, ni apatthani awe ootheene a khalai, yaahirwa owannyawe analya nuuwo. Awo yaahimukhupanyerya ni yaahimulipiha mwaha wa maxakha ootheene Yehova eemerenrye awe omphwanya. Khula mmosa aahinvaha musurukhu ni anela a eweero.
12 Siiso, Yehova aahimureeliha vanceene Yoobi ovikana woopaceryani. Yoobi aahikhalana ipwittipwitthi 14.000, ikamelo 6.000, ipooyi 2.000 soolopwana ni soothiyana, ni apuuru 1.000 oothiyana.
13 Aahikhalana-tho anamwane axilopwana 7 ni axithiyana araru.
14 Mwaana mwaamuthiyana oopacerya oyariwa, aahinvaha nsina noowi Yemima, a nenli Keziya, ni a neeraru Kereni-Hapuki.
15 Mulaponi mootheene, khuuvo mwaana mwaamuthiyana aareerale ntoko anamwane axithiyana a Yoobi. Nave paapa aya, aahaahiyerya etthu awo ni axirokoraya.
16 Nuumala-vo, Yoobi aahikhala iyaakha 140. Owo aahaaweha anaawe ni axisulwaawe, mpakha nloko na neexexe.
17 Yoobi aahikhala iyaakha sinceene ni aanihakalala.* Nto wookiseryani waya, aahikhwa.
Inoota
^ Eheeperi, “uuluvanle ene ni orina ene mahiku manceene”.
