Yoobi 6:1-30
6 Yoobi aahaakhula iiraka:
2 “Vaaweryaneya, kaaniphavela ophima olemela wa oriipiwa waka murima,Ni opweha vapalansani vamosa ni maxakha aka!
3 Oriipiwa waka murima waarowa olemelaka ovikana mihaava sa ophareya.
Tivonto moolumo aka ari aya a ololo.
4 Mattheere a Muluku Oowerya Sootheene, aakihoma,Awo aakhalana eveneno yeeyo kiniwurya aka,Muluku ookituphela ni koosareya woova.
5 Niireke wiira puuru a mutakhwani onninla orina ene malaxi,Aahiiso epooyi enninla erina ene malaxi?
6 Niireke wiira eyoolya yoohisiva ennilyiwa ehiheliwe maakha,Aahiiso epantte yootteela ya nooce ennisiva?
7 Miyo nkiniphavela ovara itthu iyo.
Sinlikana ni eyoolya yooheliwa eveneno.
8 Khoo, vaakhanle wiira kihaakhuliwa etthu kivenke aka,Nave vaakhanle wiira Muluku ookivaha etthu kiniphavela aka!
9 Vaakhanle wiira Muluku oolakela okinyakatta,Nave aakookolenle ntata nawe, okipwetexa!
10 Hata vari siiso, eyo yaamukimaaliha;Miyo kaamutupha kitteeliwe ene murima, hata koonaka owereya vanceene,Okhala wiira nkikhontte moolumo a Muluku Oowaarya.
11 Niireke wiira kookhalana ikuru wiira nlelo kilipeleleke?
Niireke yookhala etthu kinilipelela aka, vanireerela aya nlelo okhala mukumi?*
12 Niireke wiira olipa waka onoolikana ni mwala?
Aahiiso erutthu aka epakiwe ni ekoopiri?
13 Niireke kinoowerya wiikhaliherya mmansaka,Variki kaakhiwe ene mireerelo saka sootheene?
14 Mutthu yoole onikhootta omooniherya mukhwaawe ophenta weekeekhai,Onoohiya omoova Muluku Oowerya Sootheene.
15 Axinnaka annikiwoka ntoko muro ohinipisa wuuma,Ntoko maasi a miro sinuuma okathi wa elimwe.
16 Miro iyo sinniriipa mwaha wa exeelo,Nave eneevi yootothowa enniipitha memmo.
17 Masi waphiya okathi aya, miro iyo sinnihala sihirina maasi,Ni sinnimala-mala. Waphiya okathi wooviha, iyo sinnuuma.
18 Miro iyo sinnihapuxiwa;Sinnirowa woothakoni sinamala-mala.
19 Alipa-ooweetta mikwaha anikhuma oTema, annaavya miro iyo;Alipa-ooweetta mikwaha anikhuma oSebayini, annilipelela seiyo.
20 Awo ahuuliwa muru, okhala wiira aaroromela ethiru;Aaphiya weiwo, anyoonyiheya.
21 Nyuwosa munlikana ni muro owo, khamunroromeleya;Muhoona maxakha akikhumelenle, masi nyuwo munnoova.
22 Kiireke kootoko oveka kiiraka: ‘Mukivahe etthu’,
Aahiiso kihoovekelani wiira mukumihe etthu eriyari ya muhakhu anyu,
wiira munvahe mutthu mukina mukiirelaka miyo?
23 Kiireke koovekela wiira koopoliwe mmatatani mwa nwanani,Aahiiso koopoliwe mmatatani mwa atthu oohaaxa?
24 Mukiixuttihe, nto miyo kinoomaala;Mukikhaliherye osuwela saana etthu kitthenke aka.
25 Ekeekhai kheniwereya!
Masi opwapwela wanyu oniphwanyiha-ni?
26 Niireke munimpaka palano wiira mukipwapwele mwaha wa moolumo aka,Moolumo a mutthu oxankale, yaawo anivavihiwa ni epheyo?
27 Nyuwo mwanwerya waavererya eparakha ekwaasuni,Wiira mmusuwele ole aarowa okuxa wiira ekhale epottha awe,
Hata mwammutumiha mpatthani anyu.
28 Vano, murukunuwe mukiwehe,Miyo nkikhanle oowootha owiitho wanyu.
29 Xontte muupuwele saana, muhikiphukele,Aayo, muupuwele saana, okhala wiira nlelo miyo ka naxariya.
30 Kiireke nlumi naka ninlavula itthu sootakhala?
Munuupuwela wiira nkinsuwela wiira yookhala etthu ehilonke?
Inoota
^ Aahiiso, “vanireerela aya wuncererya okumi aka”.
