Yoobi 7:1-21
7 “Kiira pinaatamu mulaponi-mu onnivara muteko woolipa, siisaale ntoko mutthu onivara muteko wookhanyereriwa?Nave kiira mahiku awe anoolikana ni mahiku a namuteko oniliviwa?
2 Ntoko epottha, owo onniphavela vanceene muuttutthi,Nave ntoko namuteko oniliviwa, onnilipelela musurukhu awe.
3 Tivo, mwa miyeeri sinceene, okumi aka ti weethiru,Nave kooviriha mahiku manceene kixankaka ohiyu.
4 Okathi kinimmaathi aka, kinniikoha so: ‘Kinrowa ovenya silini?’
Okathi vanitepa aya wiila, kimmakela orukunuwa vakhaamani mpakha oxa.*
5 Erutthu aka yootheene yoosareya miyunku ni etthaya,Nave yoosareya makhwatta ni oru.
6 Mahiku aka annivira moowaakuveya,Nave annimala kihirina nlipelelo.
7 Muupuweleke wiira okumi aka ori ntoko epheyo,Ni wiira maitho aka khanrowa-tho woona itthu sooreera.
8 Maitho a atthu anikiweha vano, khanitthikela-tho okiweha,Maitho anyu anoorowa okaavya, masi nkinrowa okhala.
9 Ntoko neeku ninlakaseya,Ole onrowa Mmahiye* khonikhuma-mo.
10 Owo khonitthikela-tho owannyawe,Nave atthu a vatthokoni vawe anoomuliyala.
11 Tivonto, miyo nkinrowa omaala.
Mwaha wa owereya kinoona aka vamurimani vaka,Kinrowa wiikhupanyeryaka mwaha wa ohaawa waka!
12 Kiireke ka ephareya, aahiiso ka enama yuulupale ya mphareya,Wiira mukiwehaweheke?
13 Okathi kinihimya aka wiira: ‘Ekhaama aka enookimaaliha;Nave enookikhaliherya ovukula ohaawa waka’,
14 Nyuwo munnikoopopiha ni sooloha,Ni munnikooniha itthu soowoopiha.
15 Tivonto, fataari kikhwe mwaha wa ohiwerya omumula.Aayo, fataari okhwa ohiya erutthu aka okhala siisa.
16 Kinnithanya okumi aka, nkiniphavela-tho okhala mukumi.
Mukihiye mekhaka, okhala wiira mahiku aka annivira moowaakuveya ntoko omumula.
17 Pinaatamu ti pani wiira mmuxankeleke yoowo,Ni wiira mmuupuweleleke vamurimani vanyu?
18 Xeeni muninwehaweha anyu khula voosiisu?Ni omweehererya khula okathi?
19 Xeeni muhinihiya anyu okiwehexexa?Ni okihiya okathi vakhaani wiira kiwerye omirya isene?
20 Akhala wiira koottheka, kiireke eyo ennoovarani nyuwo, Mulipa-onaawehaweha atthu?
Xeeni muhalaka okiluluwanya miyo?
Kiireke kinimoolemelani?
21 Xeeni muhinikilevelela anyu etampi aka,Ni muhinihiya anyu eviraka?
Miyo kinimookhwa voohipisa-va, kitthikeleke vatthayani,Munrowa okaavyaka, masi nkinrowa-tho okhala”.
