Yoobi 9:1-35
9 Yoobi aahaakhula wiira:
2 “Mweekekhai miyo koosuwela wiira ti siiso.
Niireke pinaatamu pooti wiihimya okhalana erasau ohoolo wa Muluku?
3 Akhala wiira mutthu oniphavela omuroiha Muluku otripunaale,Mutthu owo khaarowa owerya waakhula nnakhala nikoho nimosa wa makoho awe 1.000.
4 Owo toosuwela vanceene ni owerya wawe ti wuulupale.
Ti pani okhanle oowana nuuwo, ohivulala?
5 Owo onnithaamiha miyaako, ohikhala mutthu osuwenle;Ni onanariwa wawe, onnipwexakasa miyaako.
6 Owo onnixekexa elapo, enakhuma opuro aya,Siiso, ipilaari saya sinnittettemela.
7 Owo onniruma nsuwa wiira nihipatte,Nave onnittiyelela waarya wa itheneeri;
8 Onnaatala erimu mekhawe,Ni onneetta vasulu va mawimpi maalupale a mphareya.
9 Owo oopaka ekurupu ya itheneeri eniihaniwa Axi,* ekurupu ya itheneeri eniihaniwa Khesil* ni ekurupu ya itheneeri eniihaniwa Khima,*Nave-tho oopaka ekurupu ya itheneeri ya osuuli.*
10 Owo onnipaka itthu suulupale ni soovila wiiwexexa,Itthu sootikiniha ni sihiniweryaneya okontariwa.
11 Owo onnivira vari aka, masi miyo nkinwerya omoona;Onnivira vakhiviru vaka, masi miyo nkinsuwela.
12 Akhala wiira onnivara etthu, ti pani okhanle oomukhoottiherya?
Ti pani okhanle oomuleela wiira: ‘Exeeni eyo munipaka anyu?’
13 Muluku ananariwa, khontthikela ottuli;Hata anamakhaliherya a Rahabi* animuurama ohoolo wa Muluku.
14 Vaakhanle wiira miyo kammwaakhula,Kaahaana othanla saana moolumo aka wiira kivaanyihane nuuwo!
15 Hata kaarina erasau, miyo nkaarowa omwaakhula.
Kaarowa onvekela okimorela ikharari, mukhulupale aka oniphuka milattu.*
16 Kiireke kamwiihana, owo onookaakhula?
Nkinkupali wiira onoowiriyana nsu naka.
17 Owo onnikintakasa ni epheyo yuulupale,Onnincererya makhwatta aka vahikhanle nthowa.
18 Owo khonikihiya wiira kiitthe iphumu,Onimakela wuncererya mixankiho saka.
19 Wakhala mwaha wa ikuru, Muluku torina owerya.
Wakhala mwaha wa exariya, Muluku onihimya wiira:
‘Ti pani okhanle oohimya wiira miyo koottheka?’*
20 Vaakhanle wiira miyo kookhalana erasau, eyano aka yaamukiphukela;Hata kihirina mulattu, owo onookiphwanyana mulattu.
21 Hata kihirina mulattu, nkinsuwela etthu enrowa okiiraneela;Kinnithanya okumi aka ola.
22 Itthu sootheene sinoolikana. Tivonto, kinihimya aka wiira:‘Owo onnaapwetexa atthu ahirina mulattu* hoothe ni atakhali’.
23 Vaakhanle wiira atthu annookhwa vootutuxerya mwaha wa ehasara,*Owo ammutheyaka mutthu ohitthenke etthu ni ovelavenle.
24 Elapo yoovahereriwa atakhali;Owo onniwala maitho* a alipa-oophuka milattu,
Aahikhale yoowo, nto ti pani?
25 Mahiku aka annivira moowaakuveya ntoko mutthu onitthimaka;Awo annivira kihiwehaka etthu yooloka.
26 Awo annivira ntoko pakiti ooveya,Ntoko murumaasi* onikhuruwa ovavaka wiira ovare etthu.
27 Kahimya wiira: ‘Kinooliyala wiikhupanyerya waka,Kinooturuka oxanka waka wiira kitteeliwe murima’,
28 Miyo nlelo kaarowa woovaka, mwaha wa itthu sootheene sinikiwereya,Nave koosuwela wiira nkaarowa othokoreriwa ntoko mutthu ohirina mulattu.
29 Miyo kaarowa othokoreriwaka ntoko mutthu orina mulattu.*
Nto xeeni kahaarowa aka okhulumuwa?
30 Hata miyo kairapinhe ni maasi a eneevi yootothowa,Nave kaareerinhe matata aka ni esapau,
31 Nyuwo mwaamukirihela mulittini muri mattophe,Hata ikuwo saka saarowa okithanyaka.
32 Owo khahiyo pinaatamu ntoko miyo, wiira kimwaakhule,Wala wiira niroihane otripunaale.
33 Khuuvo okhanle oonaakiha,Nave khuuvo oniwerya okhala mulipa-oophuka mulattu ahu.
34 Vaakhanle wiira oohiya okimana,*Ni okoopopiha,
35 Nto miyo kammulavuliha kihoovaka,Okhala wiira, okhala wene nkinoovelela olavula.
Inoota
^ Woonasa wene, ekurupu ya itheneeri eniihaniwa Ursu Muulupale.
^ Woonasa wene, ekurupu ya itheneeri eniihaniwa Orioni.
^ Woonasa wene, sinihimmwa itheneeri siniihaniwa Pleiades, sa ekurupu ya itheneeri eniihaniwa Taurus.
^ Eheeperi, “ikwaartu sa osuuli”.
^ Woonasa wene, enihimmwa enama yuulupale ya mphareya yoowoopiha.
^ Aahiiso, woonasa wene: “nwanani aka otripunaale”.
^ Eheeperi, “okilattula”.
^ Aahiiso, “ale oororomeleya”.
^ Aahiiso, “osareya maasi”.
^ Eheeperi, “owiitho”.
^ Aahiiso, “xaaka”.
^ Eheeperi, “mutakhali”.
^ Eheeberi, “ookumiha ekopo awe vasulu vaka”.
