Anna ni Arokora Oophentiwa:

Eseekulu 7 AEC, profeta Ezekiyeli aahooniheriwa etthu yootikiniha. Aahiweha ekaaro yuulupale ya wiirimu, yeeyo yeettihiwa ni Mwaneene olumwenku wotheene. Etthu yootepa otikiniha ni ekaaro eyo, yaari enamuna yeetta aya. Yeetta mowaakuveya ntoko overunya wa etari, hata okathi yaahapuwela aya mpantta mukina. Eyo yaaniwerya ohapuwa ehivukulaka wuupa waya wala khiyaatthuneya okottoopiha maroota aya!—Ezek. 1:4, 9, 12, 14, 16-27.

Yowoona ele ennuupuxerya wira mpantta wa wiirimu wa mutthenkeso wa Yehova, khonimaala weetta. Ankhi mpantta wa valaponi? Mwaakha wa muteko ovinre onnooniherya saana wira Yehova nave-tho onneettiha mowaakuveya mpantta wa valaponi wa mutthenkeso awe!

WEstados Unidos, emusi ya oBetheli yoopacerya othaama oBrooklyn erowaka eseedi esya ya olumwenku wotheene, oWarwick, oNova York, nave-tho athaamelaka inupa sikina sa obetheli. Nave akina anithanleliwa orowa ovaraka muteko woolaleerya. Anna ni arokora a ibetheli sikina olumwenku wotheene nave-tho aaluttuweliwa avaraka miteko ntoko oteka ifiliyaali saya, olokiherya, wuuraaniha, aahiiso othaamela mapuro makina masya. Ankhi nyuwo? Hata muhithaamelaka opuro mukina, masi mohaaniherya munniluttuweliwa ovara miteko sikina.

Nikhuuru Noolamulela ninnihakalala vanceene oweha wira arumeyi a Muluku olumwenku wotheene annitepa oluttuweliwa miteko sa Muluku vano, ni anneetta mowaakuveya vamosa ni mutthenkeso wa Yehova. Anamunceene annithaamela mapuro oothowa anamalaleerya. Akina aarowa okhaliherya mapuro anilavuliwa nttaava na elapo ekina. Nave-tho akina anneererya enamuna esya ya olaleerya, yeeyo yahaalimalenle aya. Anamunceene ahincererya muteko aya woolaleerya arumeelaka inamuna sikina. MaKristau otheene oororomeleya, waahela muhina ale oowuuluvala ni aniwereyasiwa, annivikaniha otthimakela etthuvo ya okumi woohimala. Awo anneetta moororomeleya ni mutthenkeso wa Yehova ni annikhaliherya wooniherya wira Satana tthiri nawoothe!—1 aKor. 9:24.

Mukupaliki wira Yehova onnivaha efaita wiimananiha wanyu. (aHéb. 6:10) Eyo ennuupuxerya Abrahamu ni Sara. Okathi aarina awe iyaakha 70, Abrahamu aahithaama elapo awe, wUri, khiyarowa ni emusi awe oKanani, weiwo aarowa awe okhalaka muheemani okumi awe wotheene. Tthiri owo ni mwaarawe yahooniherya munepa wowiivahererya!—Maph. 11:31; Mit. 7:2, 3.

Niireke munnooniherya munepa mmosaru? Otheene anyu munivikaniha ororomeleya mahiku ala  ooxankiha, munnipaka ele Yesu onirumme awe. Owo ohimmye so: “Vano, murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni na eroho yowarya”.—Math. 28:19.

Nwehe wira nuulumo Yesu orumenle awe, noowi “murowé”, nnooniherya wira nihaana weetta, ohiya wiikhalela paahi. Tthiri ti voohakalaliha oweha wira mwaakha ovinre atthareli a Kristu ahiilipiha vanceene wira avare muteko wa Muluku! Ninnoona wira Yehova onnireeliha muteko woolaleya ihapari soreera sa Omwene mulaponi motheene.—Mar. 13:10.

Atthu anceene annaakhela saana ni weettela ele enilaleerya ahu. Mwaakha ovinre, nummuru nuulupale na anamalaleerya naari 8.340.847, nave khuta mweeri naahiiriha soosoma sa Biibiliya siniphiyerya 10.115.264. Tthiri ekaaro ya wiirimu enneetta, ni nyuwo munnitthara ekaaro eyo! Nvikaniheke ovara muteko owo wooloka okathi ola vakhaani ohanle, ehinatthi ophiya ewoora Yehova onrowa awe owala mukhora wa woopowa.

Tivonto, vanniphwanelela yoolepa ya mwaakha wa 2017 ohimyaka so: ‘Mwaroromele Apwiya Yehova: mwireke sorera’! (Esal. 37:3) Vaavo vaniiwelela anyu moolumo awo, munvarelaka muteko wooloka Yehova, nyuwo munooniherya wira munnimuroromela Yehova. Xontte, muhiliyale wira khamukhanle mekhinyu. Muupuweleke masu a Yesu ani: “Vano miyo kinokhala ni nyuwo mahiku othene, mpakha elapo omala”.—Math. 28:20.

Musuweleke wira Yehova onoovikaniha oreeliha muteko anyu woororomeleya. Hata mukhaliheryaka vakhaani wala vanceene, Yehova onnivaha efaita akhala wira munivaha ele eniwerya anyu ni murima wotheene. Soovaha iyo sinnimusivela Muluku. (2 aKor. 9:6, 7) Tivonto, nvikaniheke omwaattamela Tiithi anyu oophenta, munvekelaka, musomaka Nuulumo nawe, muhicompelaka mithukumano ni mukhalelaka nthiti muteko woolaleerya.

Ohinatthi omala “okathi vakhani pahi” Satana ovahiwe awe, owo onrowa wiimananihaka orumeela khula etthu eniwerya awe wira onihapuxe ni nihiye okhala atthu oororomeleya. (Wis. 12:12) Mmwaattameleke Yehova, nto Satana khonikhala-khala ooweryakani. (Esal. 16:8) Xontte, musuweleke wira ninnoophentani vanceene ni ninnixukhurela onikhaliherya okhapelela mireerelo sa Omwene wa Pwiya, mahiku ala ookiserya.

Anninyu,

Nikhuuru Noolamulela na Anamoona a Yehova