1-3. Exeeni Yesu aapanke awe okathi aaphwanye awe etemplo enanarihiwaka?

YESU aanittittimiha vanceene etemplo oYerusalemu maana aanisuwela ele yaataphulela aya. Okhuma khalai etemplo yaari opuro muulupale wa okokhorela wekeekhai valaponi. Masi okokhorela iwo, eyo piiyo, omukokhorela Muluku oowaarya Yehova, ohaana okhala wooloka ni wootteelihiwa. Nkahaya muupuwele, moota Yesu oonenle awe okathi waaphiyale awe otemplo 10 a Nisani 33 EC, nto khuphwanya enanarihiwaka. Exeeni yiiraneya?​—Mmusome Matheyo 21:12, 13.

² Vanivateni na Amalapo, alipa-anakoso ananrima ni ale yaakakhanya musurukhu yaaniwiiyerya atthu yaarwa onvaha mikuttho Yehova. * Yesu “ahiwomola-mo atthu yatumiha ni yathuma mpani memmo. Ahipittula mesa a àlipa-òwakakhanya musurukhu ni minyukhu s’ale yatumiha ipomba”. (Mulikanyiherye ni Nehemiya 13:7-9.) Owo aahaapwapwela atthu ale a nrima yaapaka empa ya Tiithi awe okhala “nikhuku n’anawiye”. Tthiri Yesu aanittittimiha etemplo ni ele yaataphulela aya. Okokhoreliwa Tiithi awe, waahaana okhala wooloka!

³ Iyaakha sinceene, nuumala Yesu othanliwa okhala Mwene a oMesiya, aahitthikela oreeriha etemplo. Eyo enaahela muhina atthu otheene aniphavela wira omukokhorela waya Yehova okhale wooloka. Nto etemplo xeeni Yesu oreerinhe awe?

4, 5. (a) Moota xeeni atthareli a Yesu oowoottihiwa yaakhalihiwe aya ooloka okhuma mwaakha wa 1914 mpakha wanipacerya wa 1919? (b) Niireke olokiheriwa wa atthu a Muluku waamalenle vaavale paahi? Mutthokiherye.

⁴ Ntoko niwenhe ahu Muru 2 wa eliivuru ela, nuumala ovahiwa emwene eyaakha ya 1914, Yesu aahirwa ni Tiithi awe wira owehe etemplo ya omunepani, eyo piiyo, malokiheryo a okokhorela wekeekhai. * Okathi owo, Mwene aahoona wira maKristau oowoottihiwa, niire so, “ana a Levi”, yaanitthuneya oreerihiwa ni otteelihiwa. (Mal. 3:1-3, BE) Okhuma eyaakha ya 1914, mpakha wanipacerya wa 1919, ‘Namareriha’, niire so, Yehova, aaheemererya wira atthu awe saakhumelele mixankiho ni soweeha soovirikana seiyo saakhanle ntoko oreerihiwa ni otteelihiwa. Moohakalaliha, alipa-oowoottihiwa yaahikhuma nipuro naarapihiwa aya ni mooro, aryeene ooloka, oolikanela okhaliherya Omwene wa Mesiya!

 ⁵ Niireke olokiheriwa ni orapihiwa wa atthu a Muluku waamalenle vaavo? Nnaari. Mahiku ala ookiserya, Yehova orweela mwa Mwene Mesiya onnivikaniha waakhaliherya arumeyi awe, okhala ooloka wira avikanihe okhala etemplo awe ya omunepani. Mwa miru miili sinittharelana, ninrowa woona moota owo aareerinhe awe voohimya sa mweettelo ni otthokiheya waya. Wanipacerya, nrowe nithokorerye oreerihiwa wa omunepani. Waamini wahu onnilipa vaavo ninthokorerya ahu ele Yesu opanke awe, mwa inamuna sowooneya ni inamuna soohooneya, wira aakhaliherye atthareli awe okhala ooloka momunepani.

6. Moota xeeni malakiheryo Yehova aavanhe awe aYuda yaari weepotthani, annikhaliherya aya wiiwexexa ele enitaphulela aya okhala ooloka?

⁶ Oreerihiwa wa omunepani onitaphulelani? Wira naakhule nikoho nlo, niwehe masu yaawo Yehova aahimenrye awe aYuda yaari weepotthani yaahala vakhaani okhuma oBabilonia eseekulu 6 AEC. (Mmusome Yesaya 52:11.) Etthu yuulupale yaawiirinhe atthu ale okhuma weepotthani arowaka oYerusalemu elapo aya, waari otthikela oteka etemplo ni ottikiherya okokhorela wekeekhai. (Ézi. 1:2-4) Yehova aaphavela wira atthu awe ahiye itthu sotheene soohiloka sa itiini sa oBabilonia. Moone wira owo aahaavaha sooruma soovirikana: “Muhivaré itthu sa mwikho” “mukhumeke o Babilonia”, ni “mwirerihe”. Okokhorela wooloka wa Yehova khonitakaaheriwa ni okokhorela wowootha. Nto eyo enihimya exeeni? Oreerihiwa wa omunepani onihela muhina okhootta sowiixuttiha ni sowiira sa etiini yoowoka.

7. Ephiro xeeni Yesu onirumeela awe wira aakhaliherye atthareli awe okhala ooloka omunepani?

⁷ Moohipisa nuumala othanliwa okhala Mwene, Yesu aahikumiherya ephiro yowooneya saana yeeyo yaakhalihenrye atthareli awe okhala ooloka momunepani. Ephiro eyo ti murumeyi oororomeleya ni ankhili, yoowo othanliwe ni Kristu mwaakha wa 1919. (Math. 24:45) Okhuma eyaakha yeeyo, Alipa-oomusoma Biibiliya yahireerihiwa voohimya sa sowiixuttiha sinceene sa itiini soowoka. Masi nlelo yaanitthuneya oreerihiwa momunepani muhoolo. Orweela mwa murumeyi awe oororomeleya, Kristu aahaamwaleela atthareli awe voohimya sa soolema ni sowiira saareerela ohiya. (Mir. 4:18) Nrowe nithokorerye matakiheryo vakhaani.

8. Exeeni Alipa-oomusoma Biibiliya yaasuwela aya voohimya sa Natali, masi xeeni yahaawerya aya woona saana otakhala waya omwiira Natali?

⁸ Alipa-oomusoma Biibiliya, yaanisuwela okhuma khalai wira Natali khonivarihana ni eKristau mwaha woowi Yesu khaayariwe va 25 a Dezembro. Erevista Zion’s Watch Tower (Owehaweha) ya Dezembro 1881 englexi yaahimya so: “Atthu anceene yaawo akenle mukerexa yaari mapagau. Masi etthu eturunke aya ti nsina paahi, okhala wira makhulupale a epagau aakela ekhulupale mukerexa, nave iferiado sa epagau soovahiwa masina a eKristau. Mwa ntakiheryo, Natali onniirela mpantta iferiado iyo”. Mwaakha wa 1883, erevista Watch Tower (Owehaweha) yaahikumiherya muru waahimya so: “Yesu Oyariwe Liini?” Mwaha owo waahitthokiherya wira  Yesu aayariwe wanipacerya wa Outubro. * Masi Alipa-oomusoma Biibiliya nlelo khiyaawerya woona otthuneya waya ohiya omwiira Natali. Owo aahivikaniha wiiriwa hata ni anna a emusi ya oBetheli, oBrooklyn. Nuuvira mwaakha wa 1926, nto itthu saahipacerya oturukeya. Mwaha wa xeeni?

9. Exeeni Alipa-oomusoma Biibiliya, yaiwexenxe aya voohimya sa Natali?

⁹ Mwaha wa otokosa wa nthiti, Alipa-oomusoma Biibiliya yaahoona wira iphattuwelo sa Natali ni itthu sikina siniiriwa okathi owo tthiri saanimunyohola Muluku. Erevista The Golden Age (Despertai!) 14 a Dezembro, 1927, yaahikumiherya muru waahimya so: “The Origin of Christmas (Iphattuwelo sa Natali)”. Eyo yaahihimya wira Natali ti niira na epagau, ninttittimiherya wiihakalaliha paahi, ni nniirela mpantta waakokhorela amuluku eethiru. Mwaha owo waahooniherya saana wira Kristu khorumme wuupuweleliwa Natali. Nto mwaha ole waamalihenrye oriki: “Okhala wira niira nlo nnivarihana ni olumwenku, itthu sa werutthuni ni Diabo . . . ninniweha wira atthu antthuna omurumeela moomalela Yehova ahaana osyaka omwiira Natali”. Tivo vahinixankiha aya wiiwexexa wira emusi ya oBetheli khiyampanke-tho Natali mwaakha yoole wala muhoolo!

10. (a) Malakiheryo xeeni owiiwanyeya voohimya sa Natali yaalaleiwale Dezembro a 1928? (Nwehe-tho ekaaxa eni “ Yoolakela ni Opuro Okhumme awe Natali”.) (b) Moota xeeni atthu a Muluku yaalopoliwe aya voohimya sa ifesta ni iferiado saatthuneya okhoottiwa? (Nwehe ekaaxa eni “ Wooniheriwa Okhala Ethiru wa Iferiado Sikina Sinitthapeliwa”.)

¹⁰ Mwaakha waattharelana, Alipa-oomusoma Biibiliya yaahaakhela soolopola sikina voohimya sa Natali. Nihiku na 12 a Dezembro a 1928, munna Richard H. Barber yoowo aavara muteko oseedi mundial, aahilavula mwaha muraadioni yoowo aatthokiherya iphattuwelo sa eferiado ela. Nto atthu a Muluku yoonenle sai malakiheryo awo yaakhuma oseedi mundial? Munna Charles  Brandlein vamosa ni emusi awe onnuupuwelela okathi aamuhiyale omwiira Natali, oriki: “Niireke naahixankiheya mwaha woomuhiya omwiira Natali? Nnaari! . . . Eyo yaamulikana ni orula ikuwo soowuntta nto khurihela otakhwani”. Nave Munna Henry A. Cantwell yoowo muhoolo mwaya aari mutokweene ooweetteetta aahimmye so: “Hiyo naahihakalala mwaha woohiya opaka etthu yoohiloka wira nooniherye omphenta wahu Yehova”. Tthiri atthareli oororomeleya a Kristau yaaheemererya opaka mirukunuxo saatthuneya wira ahiirele mpantta niira na okokhorela weethiru. *​—Yoh. 15:19; 17:14.

11. Ninrowa wooniherya sai wira ninnikhaliherya Omwene wa Mesiya?

¹¹ Tthiri Alipa-oomusoma Biibiliya oororomeleya aanivaha ntakiheryo nooloka! Nuupuwelaka ntakiheryo naya, vanooreerela wiikohaka so: ‘Kinoonela sai malakiheryo anikhuma oseedi mundial? Kinneemererya moohakalala ni ottharihela ele eniixutta aka?’ Ophavela wahu wiiwelela onnooniherya wira ninnimukhaliherya Mwene Mesiya yoowo onimuruma murumeyi oororomeleya wira onivaheke yoolya okathi wooreerela.​—Mit. 16:4, 5.

12. Mwa iyaakha sinceene Alipa-oomusoma Biibiliya yoonela sai mwiikimanyo?

¹² Mwa iyaakha sinceene, Alipa-oomusoma Biibiliya yuupuwela wira mwiikimanyo ti ethoonyeryo enireerela orumeeliwa ni maKristau. Ekeekhai wira awo khiyuupuwela wira mwiikimanyo ohaana okokhoreliwaka, okhala wira yaanisuwela wira opaka eyo waari waakokhorela amuluku eethiru. (1 aKor. 10:14; 1 Yoh. 5:21) Wanipacerya wa mwaakha wa 1883, erevista Watch Tower (Owehaweha) yaahihimya wira “okokhorela ilatarato sa khula enamuna  onninveeha Muluku”. Hata vari siiso, Alipa-oomusoma Biibiliya, khiyoona onanara waya orumeela mwiikimanyo. Mwa ntakiheryo, awo yaanisiveliwa orumeela mwiikimanyo waarina ethoonyeryo ya ekorowa wira asuweliweke okhala maKristau. Atthu ale yoona wira yakhala oororomeleya mpakha okhwa yaamwaakhela ekorowa ya ekumi. Okhuma mwaakha wa 1891, ethoonyeryo ya mwiikimanyo yaarina ekorowa yaahipacerya oheliwa vakaapani ya erevista Watch Tower (Owehaweha).

13. Malakiheryo xeeni yaavahiwe aya atthareli a Kristu voohimya sa mwiikimanyo? (Nwehe-tho ekaaxa eni “ Otthokiheriwa Wowiiweya Voohimya sa Owara Mwiikimanyo”.)

¹³ Tthiri Alipa-oomusoma Biibiliya yaanivaha efaita ethoonyeryo ya mwiikimanyo waarina ekorowa. Masi, okhuma wanikisa wa 1920, atthareli a Kristu yaahipacerya wiiwexexa saana voohimya sa orumeela mwiikimanyo. Uupuwelaka muthukumano waapakiwe oDetroit, oMichigan, EUA, mwaakha wa 1928, munna Grant Suiter, yoowo muhoolo mwaya ari a Nikhuuru Noolamulela aahimyale so: “Muthukumano ole waahooniherya wira orumeela ethoonyeryo ya mwiikimanyo waarina ekorowa waari etthu yoothanyeya”. Muhina mwa iyaakha vakhaani ohoolo waya, waarya wahooneya-tho. Nto vahooneya saana wira mwiikimanyo khorina opuro muhina mwa okokhorela wa ekeekhai ni wooloka.

14. Atthu a Muluku yaakhenle sai malakiheryo yaavahiwe aya voohimya sa mwiikimanyo?

¹⁴ Atthu a Muluku yoonenle sai omwaleeliwa iwe voohimya sa mwiikimanyo? Niireke yaahivikaniha orumeela mwiikimanyo ole waarina ekorowa yoowo waasivela vanceene? Murokora oniitthaniwa Lela Roberts, yoowo onimurumeela Yehova okhuma khalai ohimyale so: “Nuumala osuwela ele yaataphulela aya mwiikimanyo, naahihiya orumeela moohipisa”. Murokora mukina ororomeleya oniitthaniwa Ursula Serenco, aahooniherya moonelo wa anamunceene oriki: “Hiyo naahisuwela wira etthu yeele yaanisivela, noona ahu okhala nthoonyeryo na okhwa wa Pwiya ahu ni okhala wahu maKristau yaari ya mapagau. Moovarihana ni eliivuru ya Miruku 4:18, hiyo naahixukhurela mwaha wa wooniheriwa oratteene mwaha ole ntoko ephiro yoomwaleeliwa saana”. Atthareli oororomeleya a Kristu khiyaaphavela wiirela mpantta itthu soothanyeya sa etiini yoowoka!

15, 16. Hiyo ninrowa wooniherya sai wira nnoovikaniha okhaliha wooloka okokhoreliwa wa Yehova mutemplo mwawe momunepani epantte ya vathi?

¹⁵ Hiyo nave ninniphavela waatakiha anna awo olelo-va. Hiyo ninneemererya wira Kristu onnirumeela ephiro emosa yoowoneya, niire so: murumeyi oororomeleya ni ankhili, yoowo onaakhaliherya atthu a Muluku okhala ooloka momunepani. Tivonto, vakhala wira yoolya enivahiwa ahu enninlopola voohimya sa iferiado, sowiira wala soolema sa etiini yoowoka, hiyo moohipisa ninniiwelela. Moolikanasa ni annihu ale yaakhala wanipacerya wa okhala-vo wa Kristu, hiyo noolakela otteeliha nivate na valaponi na etemplo yomunepani ya Yehova.

¹⁶ Mahiku ala ookiserya, Yesu onnivara muteko hata ohooneyaka wira aakiherye miloko sa atthu a Yehova, voohimya sa atthu yaale akhanle oowaapahula akina omunepani. Owo onipaka sai eyo? Nrowe niwehe.

17, 18. Voohimya sa ntakiheryo na ntthavi ontaphulelani (a) oriheliwa ntthavi mmaasini, (b) “ovariwa wa ihopa sa khula muxovo”, (c) oheliwa muthokwani ihopa, ni (d) orihiwa wa ihopa soohiloka?

¹⁷ Mwene Yesu Kristu, onniwehexexa ni maitho awe miloko sa atthu a Muluku anikhala valaponi. Mwa enamuna ehiniwerya ahu woona, Kristu ni malaikha aniira avaraka muteko wa waavalaanya atthu. Yesu aahitthokiherya muteko owo vaavo aahimmye awe nlikanyiho na ntthavi ninvara ihopa sa khula muxovo. (Mmusome Matheyo 13:47-50.) Nintaphulela exeeni nlikanyiho nlo?

¹⁸ “Ntthavi ninriheliwa mphareya”. Ntthavi nlo ninthoonyerya olaleiwa wa Omwene oniiraneya mwa ephareya ya apinaatamu. Ovariwa “ihopa sa khula muxovo”. Onitaphulela ihapari sa omwene sinaasivela atthu a khula muxovo, eyo piiyo, atthu aniimananiha wira akhale maKristau a ekeekhai, vamosa ni ale anooniherya osiveliwa paahi, masi ahinimananiha weettela ekeekhai eniixutta aya. * Othanliwa wa “ihopa sorera ni oheliwa muthokwani”. Onitaphulela atthu a murima saana, anithukumanyiwa anaheliwa muthokwani wala mmulokoni weiwo onimukokhorela aya Yehova mwa enamuna yooloka. Orihiwa wa ihopa “sonanara”. Onitaphulela wira mahiku ala ookiserya, Yesu ni malaikha awe onnivara muteko wa wavalaanya ‘atthu ootakhala ni atthu a xariya’. * Nto mwaha wa yeeyo, ale ahirina murina saana, niire so, ti atthu yaale anikhootta ohiya soowiira ni sookupali soohiloka seiyo sikhanle oopahula muloko. *

19. Munoonela sai muteko Yesu onivara awe wa waakhapelela atthu a Muluku ni olokiherya okokhorela wekeekhai?

¹⁹ Nto khahiyo voolipiha osuwela wira Mwene ahu, Yesu Kristu onnaakhapelela atthu awe? Nave, khamunihakalala osuwela wira Yesu onnikhalela nthiti okokhorela wa ekeekhai, vamosa ni ale ari anamakokhorela eekeekhai, ntoko saaluttuweliwe awe eseekulu yoopacerya EC okathi aareerinhe awe etemplo? Tthiri ninnixukhurela vanceene mwaha woowi Kristu onnivara muteko wa waakhapelela atthu a Muluku ni okokhorela wekeekhai wira okhaleke wooloka! Nto hiyo nnimooniherya omukhaliherya wahu Mwene ni Omwene awe, nikhoottaka itthu sotheene sa etiini yoowootha.