EPANTTE 6
Okhaliherya Omwene—Ipa Sinirumeeliwa Okathi Woolompa ni Waakhaliherya Ale Aniphwanyiwa ni Ihasara
NIIRE nyuwo muneetta murowaka Empa ya Omwene opuro onimakela anyu othukumana, masi vannoovilani okupali etthu enoona anyu. Empa ele ya Omwene ennitepa woosivelani. Owehasa wene munnuupuwela wira iyaakha vakhaani ottuli nyuwo mookhaliherya okathi waatekiwa aya. Masi vano ennitepa woosivelani mwa enamuna ekina, maana Empa anyu ya Omwene yoopakeya okhala opuro onitthokihiwa aya inamuna sa waakhaliherya atthu aphwanyiwe ni ehasara. Nuumala orupa epula yuulupale yookhumelela ehasara yuulupale ya maasi ni onyaanya inupa sa opuro owo, nto Ekomisau ya eFiliyaali mowaakuveya ennilokiherya wira akhaliheriwe atthu ale aphwanyiwe ni ehasara eyo evahiwaka yoolya, ikuwo, maasi oowurya ni nikhaliheryo nikina. Nto soovaha sinnitthokihiwa saana. Anna ni arokora annirowa nipuro nle wira yavahiwe ele enaathowa, anamunceene amoroxaka maithori mwaha wootteeliwa murima.
Yesu aahihimya wira etthu yaarowa waasuwanyeihaka atthu awe waari ophentana waya mukina ni mukhwaawe. (Yoh. 13:34, 35) Mpantta ola ninrowa othokorerya moota ophenta wa eKristau onooniheriwa aya okathi onitekiwa ipa ni okathi Anamoona a Yehova aniimananiha aya waakhaliherya atthu aphwanyiwe ihasara sa ephattu. Niphento nlo nootheene yowooniherya yoowi Omwene wa Yesu onnilamulela.
EPANTTE ELA
MURU 18
Onikhuma Vai Musurukhu Onivareliwa Miteko sa Omwene?
Onikhuma vai musurukhu onivareliwa miteko sa omwene? Onirumeeliwa sai musuruku owo?
MURU 19
Muteko Wooteka Ipa Sinninvuwiha Yehova
Mapuro a ookokhorela khaninvuwiha Muluku paahi, masi yookhala-tho etthu ekina yuulupalexa.
MURU 20
Muteko Onaakhaliherya Ale Axankale Oninvuwiha Yehova
Hiyo ninsuwela sai wira muteko wowaakhaliherya atthu oniirela mpantta miteko sa Muluku?