1, 2. (a) Exeeni yaawiiriha arummwa a Yesu oxankiheya? (b) Yesu aahimya ohepha wa muthinto xeeni?

AWIIXUTTI ari ootikinihiwa. Yesu aahaahimeerya wira: “Muttukhule maitho, nwehé imatta, mihokorokho sottokottha, [wira] sihemphweke”. Nto awiixutti anniweha epantte Yesu onithoonya awe, masi awo khanoona imatta sirina mihokorokho soottokottha; masi anoona imatta sa etrigu ekithi ekhumenle niinano. Woonasa wene awo anuupuwela so: ‘Ohepha xeeni onihimya awe?’ Soohala myeeri sinceene wira ophiye okathi woohepha’.​—Yoh. 4:35.

² Nto Yesu khonihimya ohepha wa mmatta wa werutthuni. Owo onnirumeela ntakiheryo na ematta wira owiixuttihe atthareli awe itthu piili sootthuneya voohimya sa ohepha wa omunepani, eyo piiyo, waalaleerya atthu. Nto sowiixutta xeeni? Wira nisuwele, nrowe nithokorerye saana masu ale a Yesu.

3. (a) Owehasa wene exeeni yaamwiirinhe Yesu ohimya masu oowi: “mihokorokho sottokottha, sihephiweke”? (Nwehe enoota.) (b) Yesu aiwanyeihale sai masu awe ale?

³ Ovaanela nno wa Yesu ni awiixutti awe wiiraneyale wanikisa wa mwaakha wa 30 EC, waattamela oSamariya epooma ya oSikari. Okathi awiixutti awe yaavolowa aya mpooma mme, Yesu aahihala veehimeni opuro yoole aamulenle awe ikeekhai sa omunepani muthiyana mmosa yoowo mowaakuveya aiwexenxe otthuneya waya ele Yesu aixuttiha awe. Okathi awiixutti yaatthikenle aya opuro waari Yesu, muthiyana ole aahitthimaka orowaka oSikari wira aaleele anamwaattamanani awe, itthu soohakalaliha aaxuttale awe. Ele yaahimyale awe yahaasivela atthu ale, nto naawo khutthimaka arowaka weehimeni wira yamoone Yesu. Owehasa wene okathi ene yoowo, Yesu aahiweha imatta saari ottaiwene, nto aahoona muttitthi wa atthu a oSamariya omwaattamelaka, tivonto aahimyale awe so: “Nwehé imatta: mihokorokho sottokottha, [wira] sihemphweke”. * Nto wira aiwanyeihe wira khaahimya ohepha wa werutthuni, masi wa omunepani, Yesu ahincererya oriki: ‘Mulipa-òhepha . . . onnithukumanya mihokorokho [sa] ekumi yohimala’.​—Yoh. 4:5-30, 36.

4. (a) Iponto xeeni piili Yesu aixuttinhe awe voohimya sa muteko woohepha? (b) Makoho xeeni anrowa ahu othokorerya?

⁴ Sowiixutta xeeni piili sootthuneya voohimya sa ohepha wa omunepani Yesu aattittimihenrye awe? Yoopacerya, muteko owo ohaana ovariwa mowaakuveya. Masu awe oowi “mihokorokho sottokottha, [wira] sihemphweke”, aaphavela waatumererya awiixutti awe wira avareke muteko. Wira owooniherye awiixutti awe otthuneya waya waakuvela muteko owo, Yesu aahimmye so: ‘Mulipa-òhepha  ohaakhela musurukhu awe’. Muteko woohepha waahipacerya, nto khivaatthuneya opiserya! Yanenli, anamuteko ari oohakalala. Yesu aahimyale wira alipa-owaala ni alipa-oohepha yaarowa ‘otteeliwa murima vamosa’. (Yoh. 4:35b, 36) Ntoko siisaale Yesu waaniheryasa aahakalanle awe okathi aawoonale awe ‘aSamariya anjene amwaminiki’, nto awiixutti awe yaarowa ohakalala vanceene okathi yaarowa aya ovaraka muteko woohepha ni murima wotheene. (Yoh. 4:39-42) Yowiiraneya ele ya eseekulu yoopacerya, enniniixuttiha etthu, maana enithoonyerya ele eniiraneya mahiku ala okathi wa ohepha wuulupale womunepani. Nto ohepha nno wa mahiku ala opacenrye liini? Ti pani anivara muteko owo? Mireerelo xeeni sikhumelenle?

5. Ti pani onihoolela muteko woohepha onivariwa olumwenku wotheene, ni moota xeeni yoowonihiwa ya Yohani enooniherya aya wira muteko ohaana waakuveliwa ovariwa?

⁵ Yehova aahimooniherya murummwa Yohani wira oomuthanla Yesu ohoolela muteko woohepha, eyo piiyo, waalaleerya atthu olumwenku wotheene. (Musome Wisupulula 14:14-16.) Yowoonihiwa ele enihimya wira Yesu owanre ekhara ya eweero mmuruni ni okunxe mwaalo. “Ekhara ya wero mmuruni [mwa Yesu]” enitaphulela wira owo Mwene onilamulela. “Mwalo woononiwa mmatatani”, onitaphulela wira owo oovahiwa muteko okhala Mulipa-oohepha. Yehova onnittittimiherya wira muteko ola ohaana ovariwa mowaakuveya vaavo aalavula awe orweela mwa nlaikha oriki: “Ipyó solikana wira sihattiwe”. Tthiri “wophiya okathi w’ohepha”; nto ola khahiyo okathi woopiserya! Yesu aiwelelaka yooruma ya Muluku ya ‘okuxa mwalo, wira ohepheke’, onnikuxa mwa ikuru nto khiyahepha elapo, eyo piiyo, ohemphwa wa atthu ari valaponi. Nto yowoonihiwa ela yoohakalaliha enninuupuxerya-tho wira “imatta . . . sottokottha, [wira] sihemphweke”. Niireke yowoonihiwa ela enninikhaliherya osuwela okathi ene opacenrye aya ohepha wa olumwenku wotheene? Aayo!

6. (a) Opacenrye liini “okathi w’ohepha”? (b) Nto muteko “w’ohepha etthaya” onivariwa olelo-va opacenrye liini? Mutthokiherye.

⁶ Okhala wira yowoonihiwa ya Yohani mwa eliivuru ya Wisupulula ekapitulu 14 enimooniherya Yesu, Mulipa-oohepha, owanre ene ekhara (eversu 14), nto othanliwa wawe wira okhale Mwene ohiiraneya mwaakha wa 1914. (Dan. 7:13, 14) Nuuvira okathi vakhaani, Yesu onnirummwa opacerya muteko woohepha (eversu 15) Wiiraneya wa itthu iyo onnooneya mwa nlikanyiho na Yesu voohimya sa ohemphwa wa etrigu vaavo vanihimya awe so: “Okathi w’ohepha, ti [omala ya mikhalelo sa itthu]”. Nto, okathi woohepha ni omala wa mikhalelo sa itthu opacenrye okathi omosaru, eyo piiyo, mwaakha wa 1914. Muhoolo mwaya nlelo “okathi wa ohepha”, waahipacerya ohepha wa vano. (Math. 13:30, 39) Vaavo vaniweha ahu ottuli, ninnoona wira muteko woohepha opaceriwe sivinre ene iyaakha vakhaani nuumala Yesu opacerya olamulela ntoko Mwene. Wanipacerya, okhuma mwaakha wa 1914 mpakha wuupaceryani wa mwaakha wa 1919, Yesu aahivara muteko wa waareeriha atthareli awe oowoottihiwa. (Mal. 3:1-3; 1 Ped. 4:17) Nuumala-vo, wookiseryani wa mwaakha wa 1919, ‘ohephiwa wa elapo’ waahipaceriwa. Moohipisa, Yesu aahimurumeela murumeyi oororomeleya yoole aamanle awe  omuthanla wira aakhaliherye annihu woona wira muteko woolaleerya waahaana ovariwa ni mowaakuveya. Nrowe niwehe ele yaakhumelenle.

7. (a) Exeeni yaakhalihenrye anna woona wira muteko woolaleerya ohaana waakuveliwa ovariwa? (b) Nto exeeni anna ale yaatumereriwe aya opaka?

⁷ Mweeri wa Julyo 1920, The Watch Tower (Owehaweha) yaahimmye so: “Orweela mwa otokosa Soolempwa vannooneya wira ekerexa yoovahiwa eparakha yuulupale ya olaleya ihapari voohimya sa omwene”. Mwa ntakiheryo, masu a eprofesia ya Yesaya yahaakhaliherya anna woona wira ihapari sa Omwene saahaana olaleiwa olumwenku wotheene. (Yes. 49:6; 52:7; 61:1-3) Awo khiyaasuwela moota muteko ole waarowa aya ovariwa, masi yaaniroromela wira Yehova aamwaatthukulela ephiro. (Mmusome Yesaya 59:1.) Mwaha wa wiiwexexa saana wira muteko ole wahaana ovariwa mowaakuveya, anna ale yaahitumereriwa wuncererya muteko woolaleerya. Nto anna yaapanke exeeni?

8. Mwaakha wa 1921, iponto xeeni piili voohimya sa muteko woolaleerya annihu yaawenrye aya wiiwexexa saana?

⁸ Mweeri wa Dezembro 1921, The Watch Tower (Owehaweha), yaahimyale so: “Ola mwaakha wootepexa oreera ovikana iyaakha sotheene; nto atthu anceene ahiiwa ihapari sa ekeekhai mwaakha wa 1921 ovikana iyaakha sotheene sivinre”. Erevista ele yaanihimya-tho so: “Nlelo wookhala muteko munceene onitthuneya ovariwa . . . Vano nrowe nivare muteko owo moohakalala”. Moone moota anna ale yaiwexenxe aya iponto iye piili sootthuneya voohimya sa muteko woolaleerya seiye Yesu aahimeeryale awe arummwa awe wira: Muteko ti wowaakuveya, nto anamuteko ari oohakalala.

9. (a) Mwaakha wa 1954, exeeni erevista yaalavunle aya voohimya sa muteko woohepha, ni nthowa xeeni?  (b) Wuncerereya xeeni wiiraneyale wa anamalaleerya mwa iyaakha 50 sivinre? (Nwehe egrafiku “ Wuncerereya Olumwenku Wotheene”.)

⁹ Iyaakha sa 1930, nuumala anna wiiwexexa wira muttitthi muulupale wa ipwittipwitthi sikina waarowa waakhulela ihapari sa Omwene, muteko woolaleerya wahincerereya. (Yes. 55:5; Yoh. 10:16; Wis. 7:9) Nto exeeni yaakhumelenle? Nummuru na ale yaalaleya ihapari sa Omwene nahincerereya okhuma 41.000 mwaakha wa 1934 khukhala 500.000 mwaakha wa 1953! Erevista The Watchtower (Owehaweha) ya 1 a Dezembro, 1954, mookhalela yaahihimya so: “Ti munepa wa Yehova ni owerya wa Nuulumo nawe okhalihenrye muteko ola woohepha onivariwa olumwenku wotheene”. *​—Zak. 4:6, NM.

10, 11. Mwa nlikanyiho na epyo ya mostarda, munnuwelo xeeni onittittimiheriwa wa epyo?

¹⁰ Mwa malikanyiho awe a Omwene, Yesu aahihimya vahinatthi sa yookhumelela ya muteko woohepha. Nrowe nithokorerye nlikanyiho na epyo ya mostarda ni nlikanyiho na miropo. Ninrowa oweha moota malikanyiho awo yiiraneyale aya okathi wookiserya.

¹¹ Nlikanyiho na Epyo ya Mostarda. Mulopwana mmosa onnaala epyo ya mostarda. Vano eyo enninnuwa khiyakhala mwiri muulupale nto axipalame anniteka ipuru saya. (Mmusome Matheyo 13:31, 32. Biblia Solempwa sa Muluku.) Mikhalelo xeeni sa munnuwelo wa epyo sinittittimiheriwa ni nlikanyiho nla? (1) Wunnuwa waya ti wootikiniha. Epyo eyo “yamukhanixa yovikana iphyó sothene sa vathí”, ennikhala mwiri orina “iritta sulupale”. (Mar. 4:31, 32) (2) Munnuwelo aya ti woolipiheriwa. “Yamelá, [epyo ene] enninnuwa”. Yesu khonihimya wira “owehasa wene eyo enimunnuwa”. Masi, owo onihimya wira eyo “enninnuwa”. Khiivo etthu eniwerya okhoottiherya wunnuwa. (3) Mwiri ole onnaasivela aletto ni onniphwanyiha opuro woomumula. “Murittani-mmwe axipalame anniteka ipuru saya”. Inamuna iya tthaaru sinivarihana sai ni muteko woohepha womunepani olelo-va?

12. Moota xeeni nlikanyiho na epyo ya mostarda nnivarihana aya ni muteko woohepha onivariwa olelo-va? (Nwehe-tho egrafiko “ Wunnuwa wa Nummuru na Soosoma sa Biibiliya”.)

¹² (1) Wunnuwa waya: Nlikanyiho nle ninttittimiherya wunnuwa wa ihapari sa Omwene ni muloko wa eKristau. Okhuma eyaakha ya 1919, alipa-oohepha ooluttuweliwa annithukumanyiwa mmulokoni mooreerihiwa mwa eKristau. Okathi ole, mwaattelo wa anamuteko waari vakhaani, masi waahinnuwa moohipisa. Tthiri wunnuwa waya okhuma wanipacerya wa iyaakha sa 1900 mpakha olelo-va, ti wootepexa. (Yes. 60:22) (2) Olipiheriwa: Khiivo etthu enikhoottiherya wunnuwa wa muloko wa eKristau. Nnaamwi epyo ela yaalupatthiwe vanceene ni awanani a Muluku, eyo yaahivikaniha wunnuwa. (Yes. 54:17) (3) Opuro woomumula: “Axipalame” yaawo aniphwanya opuro woomumula mmwirini mme anithoonyerya imilyau sinceene sa atthu ooreera murima yaawo anikhala ilapo sowiiraka 240, yeemerenrye ihapari sa Omwene nto khukela mmulokoni mwa eKristau. (Ezek. 17:23) Mmulokoni mmo awo annivahiwa yoolya ya omunepani, omumula ni okhapeleliwa.​—Yes. 32:1, 2; 54:13.

13. Nlikanyiho na miropo ninttittimiherya enamuna xeeni ya wunnuwa?

¹³ Nlikanyiho na miropo. Nuumala muthiyana mmosa otakaaha miropo ni otthu, nto otthu wotheene woweetheiwa onniipelana. (Mmusome Matheyo 13:33.) Mikhalelo xeeni sa munnuwelo sinittittimiheriwa ni nlikanyiho nla? Nrowe niwehe inamuna piili. (1) Wiipelana wa otthu onnikumiherya mirukunuxo. Miropo iye sinniphiya mapuro otheene mpakha ‘otthu wothene wipelana’. (2) Wiipelana wa otthu onikhala wowuulaana. Miropo iye sinniruruvaliha “miphimo miraru s’otthu”, niire so, otthu wotheene. Nto moota xeeni inamuna iya piili sinivarihana aya ni muteko woohepha womunepani olelo-va?

14. Moota xeeni nlikanyiho na miropo nnivarihana aya ni muteko woohepha onivariwa olelo-va?

¹⁴ (1) Mirukunuxo: Miropo sinitaphulela ihapari sa Omwene, nto otthu woweetheiwa onitaphulela apinaatamu. Ntoko siisaale  miropo sinipaka aya mirukunuxo nuumala otakaahiwa ni otthu, nto ihapari sa Omwene sinnikumiherya mirukunuxo vamurimani va atthu nuumala weemererya ihapari iyo. (aRom. 12:2) (2) Wuulaana: Omwara-mwareya wa miropo onitaphulela wuulaana wa ihapari sa Omwene. Miropo sinnivara muteko aya mpakha otthu wotheene woweetheiwa wuulaana. Vamosaru, ihapari sa Omwene sihuulaana “mpakha omalenle elapo”. (Mit. 1:8) Makhalelo a nlikanyiho nla ninnooniherya wira hata ilapo seiye muteko ahu onikhoottihiwa aya, ihapari sa Omwene sinimuulaana, nnaamwi muteko ahu woolaleerya ipantte iyo sa elapo ohooniwaka ni anamunceene.

15. Moota xeeni masu ari va Yesaya 60:5, 22 anaakhwanela aya? (Nwehe-tho ekaaxa “ Yehova ti Wiirinhe Okhumelela”, epaaxina 93, ni ‘ Moota Etthoko Yamukhaani’ Ekhanle Aya ‘Muttitthi Muulupale’ ipaaxina 96-97.)

¹⁵ Iyaakha sowiiraka 800 Yesu ohinatthi ohimya malikanyiho ale, Yehova orweela mwa Yesaya, aahihimya vahinatthi sa muteko woohepha womunepani wa mahiku ala ni ohakalala waarowa aya okumiherya. * Yehova onnihimya wira atthu ‘ankhuma ottaiwene’ annoorwa wira yiireleke mpantta nikhuuru nawe nootthokiheya. Olavulaka sa muthiyana yoowo olelo-va onithoonyerya alipa  oowoottihiwa yaale nlelo ari valaponi, owo onihimya so: “Mònakaru siso, munimwarya, murim’anyu onimokhumani, onimunnuwa. Tthiri munoruheliwa mihakhu s’atthu a òphareya, munovahiwa mihakhu sa maloko othene”. (Yes. 60:1, 4, 5, 9) Tthiri masu awo anniiraneya! Olelo-va, anna yaale animurumeela Yehova okhuma khalai annaarya wala ohakalala vanceene, vaavo anoona aya wuncerereya wa anamalaleerya a Omwene okhuma nummuru naamukhaani mpakha ophiya ikonto sene.

16, 17. Exeeni enimwiiriha ‘mulipa owala ohakalala vamosa ni mulipa-ohepha’? (Nwehe-tho ekaaxa “ Moota Ifolyeeto Piili Saavanre Aya Mirima sa Atthu Anli wAmazona”.)

¹⁶ Owehasa wene nyuwo munnupuwela masu ale Yesu aahimenrye awe arummwa awe oriki: ‘Mulipa-òhepha . . . onnithukumanya mihokorokho sa ekumi ehinimala. Siso, mulipa-òwala onnitteeliwa murima vamosá ni mulipa-òhepha’. (Yoh. 4:36) Moota xeeni ‘vanitteliwa ahu murima vamosa’ mwaha wa ohepha oniiraneya valaponi? Mwa inamuna sinceene. Niwehe inamuna tthaaru.

¹⁷ Wanipacerya, hiyo ninnitteeliwa murima mwaha wa woona moota Yehova onikhaliherya awe muteko ola. Okathi onilaleerya ahu ihapari sa Omwene, ninnaala ipyo. (Math. 13:18, 19) Vaavo vanimukhaliherya ahu mutthu wira okhale mutthareli a Kristu, hiyo ninnihepha mihokorokho. Nave otheene ahu ninnihakalala vanceene okathi onoona ahu mootikiniha wira Yehova onniiriha epyo ya Omwene ‘omela ni wunnuwa’. (Mar. 4:27, 28) Ipyo sikina sinaala ahu sinnipisa ophuwa, nto sinihemphwa ni atthu akina. Pooti etonko ene owiiraneelani etthu yaamukhumelenle murokora mmosa oniireliwa Joan, yoowo onikhala oGrã-Bretanha, ovirinhe iyaakha 60 obatiziwe ene. Owo onihimya so: “Kinnikumaana atthu yaawo anikihimeerya wira kaahaala ipyo vamurimani vaya okathi kaalalenrye aka khalai. Anamoona akina ahinaasuwela aka, yahaasomiha Biibiliya muhoolo mwaya, nave ahaakhaliherya okhala arumeyi a Yehova. Murima onnikitteela vaavo vanisuwela aka wira kaahaala ipyo seiyo olelo-va sinnuuwe ni sihemphwale ni atthu akina”.​—Mmusome 1 aKorinto 3:6, 7.

18. Mathowa xeeni anniiriha ohakalaliha aromoliwe va 1 aKorinto 3:8?

¹⁸ Yanenli, hiyo ninnivikaniha okhala anamuteko oohakalala vaavo vanuupuwela ahu masu a Paulo ani: “Khula mmosá onotthuveliwa vophwanela ni muteko ovanryawe”. (1 aKor. 3:8) Moone wira etthuvo enivahiwa moovarihana ni muteko ovariwe, ohiya mwaha wa mireerelo sa muteko owo. Nto masu ala annaalipiha anna yaale anilaleerya mittetthe seiye sinikumiherya mireerelo vakhaani! Vamaithoni va Muluku, khula Namoona yoowo onivara muteko woohepha ni murima wotheene ‘onniima mihokorokho sowatta’. Tivonto ookhalana mathowa animwiiriha otteeliwaka murima.​—Yoh. 15:8; Math. 13:23.

19. (a) Moota xeeni eprofesia ya Yesu eniphwanyaneya va Matheyo 24:14 enivarihana aya ni ohakalala wahu? (b) Exeeni ekhanle ahu owuupuwelaka hata hiyo nihikhumelaka saana mmuteko wowaapaka awiixutti?

¹⁹ Yaneeraru, hiyo ninnihakalala mwaha woowi muteko ahu onnimaleliha iprofesia. Muthokorerye moota Yesu aawaakhunle awe arummwa awe okathi yaamukonhe aya so: “Ethonyeryo y’orwa wanyu [okhala-vo] ni y’omala [makhalelo a itthu] t’ivi?” Owo aahaahimeerya wira ethoonyeryo emosa yuulupale yaarowa okhala muteko  woolaleerya olumwenku wotheene. Niireke owo aahimya muteko wowaapaka awiixutti toko? Nnaari. Owo aahimmye so: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele”. (Math. 24:3, 14) Aayo, olaleya Omwene, niire so, waala epyo, tekhanle ethoonyeryo yuulupale. Tivonto, okathi onilaleerya ahu ihapari sooreera, nihaana wuupuwelaka wira hata nihiweryaka waapaka awiixutti, hiyo ninnikhumela saana mmuteko woolaleerya. * Nto hata atthu ephavelaka, wala ehiphavelaka ihapari, ninnimaleliha eprofesia ya Yesu, ni okhalana eparakha ya ovara muteko vamosa ni “Muluku”. (1 aKor. 3:9) Tthiri aakhala mathowa ooloka anniiriha ohakalala!

20, 21. (a) Moota xeeni masu aniphwanyaneya eprofesia ya Malakhiya 1:11 anaakhwanela aya? (b) Yoolakela xeeni erina anyu voohimya sa muteko wa ohepha onivariwa, nto mwaha wa xeeni?

²⁰ Eseekulu yoopacerya, Yesu aahaakhaliherya arummwa woona wira muteko woohepha waahaana ovariwa mowaakuveya. Okhuma mwaakha wa 1919 orowa ohoolo, Yesu ohaakhaliherya arumeyi awe a mahiku ala wiiwexexa ekeekhai emosaru. Mwaha wa yeeyo, atthu a Muluku ahincererya ovara muteko aya mwa nthiti. Tthiri khiivo etthu eniwerya okhoottiherya muteko woohepha. Ntoko saahimmye awe vahinatthi profeta Malakhiya, olelo-va muteko woolaleerya onnivariwa “okhuma onikhuma nsuwa mpakha onikelaya”. (Mal. 1:11) Tthiri, okhuma onikhuma nsuwa mpakha onikela nsuwa, okhuma onikela epheyo mpakha okuusini, alipa-oowaala ni alipa oohepha annivara muteko vamosa moohakalala. Nave, okhuma onikhuma nsuwa mpakha onikela nsuwa, eyo piiyo, okhuma vasiisu mpakha wiila, wala nihiku notheene, hiyo ninnivara muteko mowaakuveya.

²¹ Vaavo vanuupuwelela ahu ottuli, iyaakha sowiiraka 100 sivinre, nto nnaweha egrupu yaamukhaani ya arumeyi a Yehova yinnuwaka khukhala “muttitthi munjene” mirima sahu sinnitthapa moohakalala. (Yes. 60:5, 22) Nto, ohakalala iwo ni omphenta wahu Yehova “Mwanene ematta”, omwiiriheke khula mmosa a hiyo ovikaniha olaleerya wira nimalihe muteko ola woohepha wootepexa otthuneya!​—Luka 10:2.