Sikhumme wuuwi irimu ni elapo ya vathii? Sikhumelenle sai nsuwa, mweeri ni itheneeri, nave-tho itthu sinceene, mu elapo ya vathii? Biibiliya onnivaha waakhula wekeekhai vaavo vanihimya awe wira iyo sipattuxiwe ni Muluku. Siiso eliivuru ahu enipacerya ni miyaha sa Biibiliya sa maphattuwelo.

Nniixutta wira, oopaceryasa opattuxiwa ni Muluku, yaari atthu oomunepani oolikanasa n’uwo. Awo yaari malaikha. Masi elapo ya vathii yaapattuxeriwe atthu ntoko hiyo. Siiso Muluku aahimpaka mulopwana ni muthiyana yiitthaniwa Adamu ni Eva ni aakuha awo mu ejardim yooreera. Masi awo khiyaamwiiwelenle Muluku tivonto yaahiyeleela ehakhi aya ya ovikaniha okhala.

Mwa sotheene, okhuma opattuxiwa wa Adamu mpakha Epula yuulupale ya Mutaaseke, saari iyaakha 1.656. Eriyari ya okathi ola yaahikhala atthu anceene ootakhala. Wirimu, yaahikhala atthu oomunepani ahinooneya, Satana ni malaikha awe ootakhala. Mu elapo ya vathii, aahikhala Kayini ni atthu akina anceene ootakhala, waahela muhina alopwana akina aikuruu sootepexa. Masi yaahikhala-tho atthu ooloka mu elapo ya vathii—Abeli, Henoki ni Nowee. Mu Mpantta WOOPACERYA hiyo ninrowa osoma sa atthu awo otheene ni sowiiraneya.