Mwaha 6: Mwaana Ooloka Ni Mukina Ootakhala
VANO munweheke Kayini ni Abeli. Oowanli aya ahinnuwasa. Kayini onnikhala mulipa-oolima. Owo oniruwerya ipyo, mihokorokho ni makukhu anlyiwa.
Abeli onnikhala namahuwa a ipwittipwitthi. Owo onnisiveliwa okhapelela ipwittipwitthi saamukhaani. Iya sihinnuwa mpakha okhala ipwittipwitthi suulupale, ni siiso Abeli niinanoru ookhalana ipwittipwitthi nikoto ntero wira oweheryeke.
Nihiku nimosa, Kayini ni Abeli aniruuhasa yoovaha wa Muluku. Kayini oniruuha soolya sikina siruwenrya awe. Nto Abeli oniruuha epwittipwitthi yoolokexa erina awe. Yehova onnisiveliwa ni Abeli vamosaa ni yoovaha awe. Masi owo khonisiveliwa ni Kayini ni yoovaha awe. Munnisuwela nthowa naya?
Ela khahiyo paahi mwaha woowi yoovaha ya Abeli erii yoolokexa ovikana ya Kayini. Nthowa noowi Abeli mulopwana ooreera murima. Owo onnimphenta Yehova ni munnawe. Masi Kayini tootakhala murima; owo khonimphenta munnawe.
Siiso Muluku onimuleela Kayini wira oohaana orukunuxa mikhalelo sawe. Masi Kayini khoniiwelela. Owo oonanariwa vanceene mwaha woowi Muluku aanisiveliwa vanceene ni Abeli. Siiso Kayini onnimuhimeerya Abeli wira, ‘nrowe omatta.’ Iwe, vaavo vaarya aya ekhaya, Kayini onimmana munnawe Abeli. Owo onimmana vanceenexa mpakha omwiiva. Khiyaari etthu yootakhalexa wa Kayini wira opake?
Hata Abeli okhwiiye ene, Muluku nlelo onnimuupuwela. Abeli aari oreera murima, nto Yehova khonkhalakhala omuliyalaka mutthu ntoko yoole. Siiso nihiku nikina Yehova Muluku onrowa omuttikiherya okumi Abeli. Okathi ole Abeli khonkhalakhala okhwaaka. Owo onoowerya okhalaka moohimala mulaponi muumu. Khivanrowa okhala vooreerexa waasuwela atthu ntoko Abeli?
Masi Muluku khonisiveliwa ni atthu ntoko Kayini. Siiso nuumala Kayini omwiiva munnawe, Muluku aahimuhukhumu omuroohaka otteiwene wa emusi awe. Vaavo Kayini vaaronwa awe okhalaka mpantta mukina wa elapo ya vathi, owo aahimukuxa mmosa aaxirokorawe, nto ola aahikhala mwaarawe.
Moovira wa okathi, Kayini ni amwaarawe yaahipacerya okhalana anamwane. Anamwane akina axilopwana ni axithiyana a Adamu ni Eva yaahithelana, nave-tho awo yaahikhalana anamwane. Niinanoru, yaahikhala atthu anceene valaponi. Nrowe niixutte voohimya sa akina a yaawo.
Maphattuwelo 4:2-26; 1 Yohani 3:11, 12; Yohani 11:25.
Makoho
- Miteko xeeni Abeli ni Kayini sinivara aya?
- Soovaha xeeni Abeli ni Kayini siniruuha aya wa Yehova?
- Nthowa xeeni Yehova vanisiveliwa awe ni yoovaha ya Abeli, ni nthowa xeeni vahinsiveliwa awe ni yoovaha ya Kayini?
- Kayini mutthu oowira sai, ni moota xeeni Yehova sineererya awe omulokiherya?
- Exeeni Kayini enivara awe vaavo vary’awe ekhawe ni munnawe mmatta?
- Nkahimyani yiiranen’ye ni Kayini nuumala omwiiva munnawe.
Makoho oowuncererya
- Musome Maphattuwelo 4:2-26.
Yehova aahimmye exeeni sa mukhalelo wowoopiha Kayini waarina awe? (Maph 4:7)
Kayini oonihenrye sai mukhalelo a murima awe? (Maph 4:9)
Tuuvi ori moonelo a Yehova voohimya sa oyiiha ephomee yoohittheka? (Maph 4:10; Yes 26:21)
- Mmusome 1 Yohani 3:11, 12.
Nthowa xeeni onanariwa wa Kayini wannunw’aya, ni moota xeeni ela vanirumeela aya ntoko yoolopola wa hiyo olelo? (Maph 4:4, 5; Mir 14:30; 28:22)
Moota xeeni Biibiliya onooniherya awe wi hata amusi ahu otheene amukhoottaka Yehova, wira hiyo nlelo nnoowerya ovikaniha okhalana ompurukuma? (Sal 27:10; Mat 10:21, 22)
- Mmusome Yohani 11:25.
Yoolipiherya xeeni Yehova enivaha awe wa otheene yaale anikhwa mwaha wa exariya? (Yoh 5:24)
You May Also Like
MUTAKIHEKE WAAMINI WAYA
Abeli
Exeeni ekhanle ahu oowiixutta voohimya sa Abeli ni waamini wawe, nnaamwi sihimmwaka itthu vakhaani paahi mBiibiliyani voohimya sa yena?
