Mwaha 8: Mikwarapasa Mu Elapo Ya Vathii
VAAKHANLEKE wi mutthu mukina oorakamexa ntoko namukattha a empa anyu aahirwa varya nyu, mwaarowa wuupuwela exeeni? Mutthu owo aarowa okhala mukwarapasa! Okathi omosaa saahikhala tthiri mikwarapasa valaponi. Biibiliya onnooniherya wi axitiithi aya yaari malaikha yaakhumme wirimu. Masi eyo yaarowa oweryaneya sai?
Muupuweleke, Satana nlaikha nootakhala, naari nowaatteliwa mwa opaka mixankiho. Nno naheererya-tho wiiriha wi malaikha a Muluku akhalee ootakhala. Moovira wa okathi, akina a malaikha ala yaahipacerya omwiiwelela Satana. Awo yaahihiya muteko yoole Muluku aarinaawe wira avareke wirimu. Nto yaahikhuruwela elapo ya vathii ni yaahiipakela irutthu soopinaatamu. Nyuwo munnisuwela nthowa naya?
Biibiliya onihimya wi mwaha woowi anamwane ala a Muluku yaawonne axithiyana ooreera valaponi nto yaaphavela okhalaka n’awosa. Siiso awo yaahirwa mulaponi ni yaahaathela axithiyana ala. Biibiliya onihimya wira ela yaari yoonanara, okhala wira Muluku aahipaka malaikha wira akhaleke wirimu.
Vaavo malaikha ni axaaraya vaayanry’aya anamwane, anamwane ala yaari oovirikana. Wanipacerya pooti wi khiyaaneya okhala oovirikana vanceene. Masi yaahipacerya okhala aalupale mowuncerereya ni aikuruu mowuncerereya, mpakha okhala mikwarapasa.
Mikwarapasa iya saari sootakhala. Okhala wira saari suulupalexa ni sa ikuruu, iyo saaniwerya waahaaxa atthu. Iyo saaneererya omuthipeleliha ori otheene wira okhalee ootakhala ntoko iyo.
Henoki iira okhwiiye ene, masi vano aahikhala mulopwana mmosaa valaponi yoowo aari ooloka. Nsina na mulopwana ola naari Nowee. Okathi wotheene aavara yeele Muluku yaaphavela awe wira ovareke.
Nihiku nimosaa, Muluku aahimuleela Nowee wira okathi waahiphiya wa Owo wira aapwetexe atthu otheene ootakhala. Masi Muluku aarowa omoopola Nowee, emusi awe ni inamaa sinceene. Nrowee niwehee moota Muluku saapanka awe ela.
Maphattuwelo 6:1-8; Yuda 6.
Makoho
- Exeeni yiiranen’ye vaavo malaikha makina a Muluku vaamwiiwelenly’aya Satana?
- Nthowa xeeni malaikha makina yaahiiya aya muteko aya wirimu ni akhuruwela elapo ya vathii?
- Xeeni vaary’aya voohiloka malaikha okhuruwela elapo ya vathii ni wiipakela irutthu sa opinaatamu?
- Exeeni yaari yoovirikana wa anamwane a malaikha ale?
- Ntoko siniwerya anyu woona valataratoni, anamwane a malaikha ya avara exeeni vaavo yaakhanly’aya mikwarapasa?
- Vattuli va Henoki, mutthu xeeni ooloka aakhanle valaponi, ni nthowa xeeni Muluku vaasiveliwa awe n’uwo?
Makoho oowuncererya
- Musome Maphattuwelo 6:1-8.
Maphattuwelo 6:6 anooniherya exeeni voohimya sa moota mweettelo ahu sinivara aya moonelo a Yehova? (Sal 78:40, 41; Mir 27:11)
- Mmusome Yuda 6.
Moota xeeni malaikha yaawo ‘yahaakhapelenle mukhalelo aya ntoko malaikha’ mmahiku a Nowee anirumeela aya ntoko yowuupuxerya wa hiyo olelo? (1 aKor 3:5-9; 2 Ped 2:4, 9, 10)
