Mwaha 17: Maphapo Yaawo Yaari Oovirikana
AMIRAVO ala va anli arii oovirikana vanceene, khahiyo siiso? Nyuwo munnisuwela masina aya? Muxayi owo ti Esawuu, nto mmiravo onikhapelela ipwittipwitthi ti Yakobe.
Esawuu ni Yakobe yaari anamwane a maphapo a Isakhi ni Rebeka. Isakhi, tiithi aya, aahisiveliwa vanceene ni Esawuu, okhala wira owo aari oosuwela oxaya ni aaniwerya oruuha yoolya wa emusi. Masi Rebeka aahimphenta Yakobe moovikana, okhala wira owo aari oomaala, mmiravo a murettele.
Abrahamu taata aya iira nlelo ori mukumi, nto nnoowerya wuupuwelela tthiri moota Yakobe saasiveliwa awe onwiriyana olavulaka voohimya sa Yehova. Wanikisa waya Abrahamu aahikhwa orina ene iyaakha 175, vaavo maphapo yaarina aya iyaakha 15.
Vaavo Esawuu aarina awe iyaakha 40, owo aahaathela athiyana anli a elapo ya oKanani. Ela yaahimuriipiha murima vanceene Isakhi ni Rebeka, okhala wira athiyana ala khiyaamukokhorela Yehova.
Nuumala vo nihiku nimosaa yaahiiraneya etthu yaamwiirinhe Esawuu okhala oonanariwa vanceene ni munnawe Yakobe. Okathi waahiphiya vaavo Isakhi vaarowa awe omureeliha mwanawe muulupale. Okhala wira Esawuu aari muulupale monvikana Yakobe, Esawuu aaniwehererya waakhela nreeliho nna. Masi Esawuu iira otuminhe ene wa Yakobe ophwanelela wawe wa waakhela nreeliho. Nave-tho, vaavo amiravo ala anli vaayariwa aya Muluku iira ohimmye ene wi Yakobe aarowa waakhela nreeliho. Nto ela ti etthu yiiranen’ye. Isakhi aahivaha nreeliho wa mwanawe Yakobe.
Vattuli vaya, vaavo Esawuu vaasuwenlya awe ela owo aahinanariwa ni Yakobe. Owo aahinanariwa vanceene mpakha ohimya wira aarowa omwiiva Yakobe. Vaavo Rebeka iiwalya awe ela, ola aahixankiheya vanceene. Siiso ola aahimuleela iyawe Isakhi wira: ‘Ela enrowa okhala yootakhala tthiri akhala wira Yakobe onrowa-tho omuthela mmosaa a athiyana ala a oKanani.’
Moowira siiso Isakhi aahimwiihana mwanawe Yakobe ni khimuleela wira: ‘Muhimuthele muthiyana a oKanani. Vahinatthi murowee owannyeya atatinyu a Betuweli oHarani. Mwamuthele mmosaa a anamwane aaxithiyana a Labano mwanawe Betuweli.’
Yakobe aahimwiiwelela tiithi awe, nto moohipisa aahipacerya mukwaha awe woorakama woorowa oHarani weiwe waakhala aya amusi awe.
Maphattuwelo 25:5-11, 20-34; 26:34, 35; 27:1-46; 28:1-5; aHeberi 12:16, 17.
Makoho
- Esawuu ni Yakobe yaari aani, nto awosa yaavirikanne sai?
- Esawuu ni Yakobe yaarina iyaakha kavii vaavo taata aya Abrahamu vaakhwiiya awe?
- Aapanke exeeni Esawuu yaamwiirinhe maama awe ni paapa awe oriipiwa murima vanceene?
- Exeeni yaamwiirinhe Esawuu okhala oonanariwa vanceene ni munnawe, Yakobe?
- Malakiheryo xeeni Isakhi yanvanha awe mwanawe Yakobe?
Makoho oowuncererya
- Musome Maphattuwelo 25:5-11, 20-34.
Exeeni Yehova yaahimmye awe vahinatthi, sa anamwane aaxilopwana anli a Rebeka? (Maph 25:23)
Ovirikana xeeni waakhanle eriyari ya muupuwelelo wa Yakobe ni wa Esawuu voohimya sa ophwanelela wa opacerihiwa oyariwa? (Maph 25:31-34)
- Musome Maphattuwelo 26:34, 35; 27:1-46; ni 28:1-5.
Moota xeeni Esawuu oonihenrya awe othoiwa osiveliwa wa itthu soomunepani? (Maph 26:34, 35; 27:46)
Wira Yakobe aakhele mareeliho a Muluku, Isakhi aamuleelale opaka exeeni? (Maph 28:1-4)
- Mmusome aHeberi 12:16,17.
Ntakiheryo na Esawuu nnooniherya yookhumelela xeeni wa yaale anithanya itthu sa Muluku?
