Mwaha 27: Mwene Mmosa Ootakhala Onilamulela Wejiitu
ALOPWANA ala va anaakhanyererya atthu ovara muteko. Munweheke mulopwana owo onimmana ni murepettho mmosaa aanamuteko! Anamuteko awo arii a emusi ya Yakobe, nto aniihaniwa anaIsarayeli. Nto alopwana awo anaakhanyererya awosa ovara muteko, arii atthu a wEjiitu. AnaIsarayeli yaahikhala ipottha sa atthu a wEjiitu. Ela yiiranen’ye sai?
Mu iyaakha sinceene emusi yuulupale ya Yakobe yaakhala ni murettele wEjiitu. Yosefe, yoowo aari mutthu ootthuneya vanceene wEjiitu ottuli wa mwene Farawoo, ahaathokorerya awosa. Masi nuumala vo, Yosefe aahikhwa. Nto Farawoo a niinano, yoowo ohaaphavela anaIsarayeli, aahikhala mwene a wEjiitu.
Siiso Farawoo ola ootakhala aahaapaka anaIsarayeli okhala ipottha. Nto aahaakuha alopwana ooweherya wa awosa yaawo yaari ootakhala ni oowali. Awo yaakhanyererya anaIsarayeli ovara muteko moohaawelexa amutekelaka mittetthe Farawoo. Masi nlelo nuumuru na anaIsarayeli naanivikaniha wuncerereya. Vattuli va okathi vakhaani atthu a wEjiitu yaahikhala oowoova wira anaIsarayeli yaamukhala oowaatta vanceene ni aikuruu sinceene.
Nyuwo munnisuwela yeeyo Farawoo yaapanka awe? Owo aahilavula ni athiyana yaawo yaakhaliherya aximaama anaIsarayeli vaavo yaayara aya an’aya, wira: ‘Muhaana omwiiva mwaana otheene mwaamulopwana oniyariwa.’ Masi ala yaari athiyana ooreera murima, nto khiyaaphavela owiiva anamwane.
Siiso Farawoo aahilamula wa atthu awe otheene wira: ‘Mwaakuxe anamwane aaxilopwana anaIsarayeli ni nwiive awosa. Paahi mwaahiye anamwane aaxithiyana.’ Ela khiyaahiyo etthu yootakhala olamula? Nrowee niwehee moota mwaana mwaamulopwana mmosaa woopolinwa awe.
Okhuma 1:6-22.
Makoho
- Valataratoni va, tanii mulopwa owo orina murepettho, nto ole onimmana awe tanii?
- Nuumala Yosefe okhwa, exeeni yiiranen’ye wa anaIsarayeli?
- Nthowa xeeni atthu a wEjiitu vaakhanle aya oowoova mwaha wa anaIsarayeli?
- Yooruma xeeni Farawoo yaahimmya awe wa axithiyana yaawo yaakhaliherya axithiyana aIsarayeli oyara?
Makoho oowuncererya
- Mmusome Okhuma 1:6-22.
Moota xeeni Yehova aapacenrya awe omwaakhwaniherya natiri awe wa Abrahamu? (Okhum 1:7; Maph 12:2; Mit 7:17)
Moota xeeni athiyana anamayariha aaHeberi yoonihenrya aya nttittimiho na efaita ya okumi? (Okhum 1:17; Maph 9:6)
Moota xeeni athiyana ala anamayariha yaatthuveliwa aya mwaha wa ororomeleya waya wa Yehova? (Okhum 1:20, 21; Mir 19:17)
Moota xeeni Satana seerenrya awe ovirikanyiha yoophavela ya Yehova ya mmiso waaleiheriwe Abrahamu? (Okhum 1:22; Mat 2:16)
