Mwaha 30: Mwirii Mwaamukhaani Onivarela
MOISE aahirwa mpakha omwaako Horebi wira ophwanye munyepu wa ipwittipwitthi sawe. Va owo aahoona mwirii mwaamukhaani ovarelaka, masi khaavyaa!
‘Ela etthu yootikiniha,’ Moise aahuupuwelela. ‘Kinrowa waattamela wira koone saana.’ Vaavo vaniira awe siiso, naahikhuma nsuu vamwirini mwaamukhaani, nriki: ‘Muhaattamelee. Murulee ixapattho sanyu, okhala wira mweemenle nipuro nootteela.’ Aalavula aari Muluku orumeelaka nlaikha, siiso Moise aahikhuneela owiitho wawe.
Nuumala vo Muluku aahihimya wira: ‘Kihoona ohaawa wa atthu aka wEjiitu. Siiso kinrowa waataphula awosa, nto nyuwo murii mmosaa a yoowo kinrowa aka omuruma waahoolela atthu aka okhuma wEjiitu.’ Yehova aarowa waaruuha atthu awe mu elapo yooreera ya oKanani.
Masi Moise aahihimya wira: ‘Miyo kaapani. Kinrowa opaka sai ela? Masi niire wi koorowa. AnaIsarayeli anrowa ohimya wa miyo wira: “Tanii oorummeni?” Nto kinrowa ohimya exeeni?’
‘Ela ti etthu enrowa anyu ohimya,’ Muluku aahaakhula. ‘“YEHOVA Muluku a Abrahamu, Muluku a Isakhi ni Muluku a Yakobe ookiruma wa nyuwo.”’ Nto Yehova aahincererya: ‘Nna nsina naka mmahiku otheene.’
‘Masi niire wi awo khankikupali vaavo vanrowa aka ohimya wira nyuwo mookiruma,’ aahaakhula Moise.
‘Exeeni eri mmatatani mwanyu?’ Muluku aahikoha.
Moise aahaakhula: ‘Ttootto.’
‘Mmurihele vathii,’ Muluku aahihimya. Nto vaavo Moise vaniira awe siiso, ttootto owo aahithatuwa enowa. Nuumala vo Yehova aahimooniherya Moise mutikiniho mukinaku. Owo aahihimya wira: ‘Muhelee ntata nanyu muhina mwa nlaya nanyu.’ Moise aahiira siiso, nto vaavo vaakuminha awe ntata nawe, nno naari nootteela ntoko nxotte! Ntata naakhala ntoko naarina eretta yootakhala eniihaniwa makokho. Moottharelana Yehova aahinvaha Moise owerya wa opaka mutikiniho wa neeraru. Wanikisa waya owo aahihimya wira: ‘Vaavo munipaka anyu mitikiniho iya AnaIsarayeli anrowa okupali wira miyo koorummeni.’
Vattuli vaya Moise aahirowa owaani ni khimuleela Yeethoro wira: ‘Xontte mukihiye kihokolowele wa amusi aka wEjiitu wira kawehe moota sirya aya.’ Siiso Yeethoro aahihimya wa Moise wira mweette saana, nto Moise aahipacerya mukwaha awe woohokolowela wEjiitu.
Okhuma 3:1-22; 4:1-20.
Makoho
- Tinivi nsina na mwaako ola valataratoni?
- Nkatthokiheryani etthu yoohilimaleleya yeeyo Moise yoonaly’awe vaavo vaaronwa awe omwaako ni ipwittipwitthi sawe.
- Nsuu naakhuma vamwirini aavarela naahimmye exeeni, nto naari nsuu nawani?
- Moise aakhunle sai vaavo Muluku vaamuhimenrya awe wira aarowa waahoolela atthu a Muluku okhuma wEjiitu?
- Exeeni Muluku yaamuleelaly’awe Moise wira ahimye akhala wira atthu yaarowa omukoha tanii aamurumme?
- Aarowa owerya sai Moise wooniherya wira Muluku taamurumme?
Makoho oowuncererya
- Mmusome Okhuma 3:1-22.
Moota xeeni yookumana ya Moise enivaha aya nroromelo wira hataa noonaka wi khinnireerela waakhwaniherya muteko woomuluku, wira Yehova onrowa onikhaliherya? (Okhum 3:11, 13; 2 aKor 3:5, 6)
- Mmusome Okhuma 4:1-20.
Murukunuxo xeeni a mukhalelo a Moise wiiranen’ye eriyari ya iyaakha 40 saavinre oryeene oMadiyani? Nto ale aniphavela ophwanya miritti mmulokoni exeeni aniixutta aya mwa yeela? (Okhum 2:11, 12; 4:10, 13; Mik 6:8; 1 Tim 3:1, 6, 10)
Hataa nlakiwaka ni mulokiheryo a Yehova, nroromelo xeeni ninwery’aya onivaha ntakiheryo na Moise? (Okhum 4:12-14; Sal 103:14; aHeb 12:4-11)
