Mwaha 32: Ihukhumu 10
NKAWEHANI ilatarato iyo. Khuta emosaa enooniherya ehukhumu yeeyo Yehova yaaruuhalya awe wEjiitu. Mu elatarato yoopacerya nyuwo munoowerya omoona Aroni omanaka Muroo Nilo ni ttootto awe. Vaavo viiralya awe siiso, maasi a muroo yaahithatuwa ephomee. Ihopa saahikhwa, nto muroo aahipacerya wunkha.
Moottharelana, Yehova aahiiriha wi akhumele anaphulu mMuroo Nilo. Awo yaahikhala mapuro otheene—vanooxiwa ephaawu, mmakhalakoni, mu ikhaama sa atthu—mapuro otheene. Vaavo anaphulu vaakhwiiya aya, atthu a wEjiitu yahaathukumanya mmattumuxa maalupale, nto elapo yaankha anaphulu.
Nuumala vo Aroni aahimana etthaya ni ttootto awe, nto ntthupi naahithatuwa apwilimwithi. Ala arii axikokho acikhaani anvava yaawo aniluma. Apwilimwithi yaari ehukhumu ya neeraru mu elapo ya wEjiitu.
Ihukhumu sikina soohalela saahaaxale atthu a wEjiitu paahi, ohiya anaIsarayeli. Ehukhumu ya neexexe yaari aphuure aalupale yaawo yaakenle mpaani mwa atthu otheene a wEjiitu. Ehukhumu ya neethanu yaatuphenle inamaa. Inyompe sinceene ni ipwittipwitthi ni ipurii sa atthu a wEjiitu saahikhwa.
Moottharelana, Moise ni Aroni yaahikuxa ettuurwa vakhaani ni yaahivonyerya musuluu. Ela yaahikumiherya makhwatta oowereya wa atthu ni inamaa. Ela yaari ehukhumu ya neethanu na mmosaa.
Vattuli vaya Moise aahittukhulela ntata nawe musuluu, nto Yehova aahirumiha etari ni maralala. Ala yaari maralala ootakhalexa yaawo yahaatonko okhala wEjiitu.
Ehukhumu ya neethanu na tthaaru yaari muttitthi wa nasope. Khonakhale-tho siiso aahiiso khonatthikele okhala nasope oowaatta siiso. Owo aahilya khuta etthu yahaahononiwe ni maralala.
Ehukhumu ya neethanu na xexe yaari epiphi. Mmahiku mararuu epiphi yuulupale yaahikhuneela elapo, masi opuro yoowo waakhala aya anaIsarayeli waari wookokola.
Wanikisa waya, Muluku aahaaleela atthu awe wira yoottowiherye muxerexere mwa mikhora saya ephomee ya mwaapuri aahiiso ya mwaapwittipwitthi. Nlaikha na Muluku naahivira-vira wEjiitu. Vaavo nlaikha noonalya aya ephomee, khinaamwiivale mutthu mu empa ele. Masi ipa sotheene seiyo sihaakhanle ephomee muxerexere mwa mikhora, nlaikha na Muluku naahiwiiva anamwane oopaceriwa a atthu ni inamaa. Ela yaari ehukhumu ya 10.
Vattuli va ehukhumu ela yookiserya, Farawoo aahaaleela anaIsarayeli wira akhumeke. Atthu a Muluku yaari oolikana wira akhumee, nto ohiyu yoole awo yaahipacerya mukwaha aya wookhuma wEjiitu.
Okhuma ikapitulu 7 mpakha 12.
Makoho
- Murumeelaka ilatarato sooniheriwe va, muhimye ihukhumu soopacerya tthaaru seiyo Yehova saaruuhalya awe wEjiitu.
- Exeeni yaavirikanne eriyari ya ihukhumu soopacerya tthaaru ni ihukhumu soohalela iyo?
- Ehukhumu xeeni yaari ya neexexe, ya neethanu ni ya neethanu na mmosaa?
- Muhimye ehukhumu ya neethanu na piili, ya neethanu na tthaaru ni ya neethanu na xexe.
- Exeeni Yehova yaaleelalya awe anaIsarayeli opaka ehinatthi ehukhumu ya namuloko?
- Tiivi yaari ehukhumu ya namuloko, ni exeeni yiiranen’ye nuumala eyo?
Makoho oowuncererya
- Mmusome Okhuma 7:19- 8:19.
Hataa anamaxitta a wEjiitu yaari oowerya otakiherya ihukhumu piili soopacerya sa Yehova, yaakhanyereren’ye waakhulela exeeni nuumala ehukhumu ya neeraru? (Okhum 8:14, 15; Mat 12:24-28)
Moota xeeni ehukhumu ya neexexe yoonihenrya aya owerya wa Yehova mu waakiha nloko nawe, ni osuwela ela eniwiiriha woona sai atthu a Muluku vaavo vanaattamela aya ‘ohaawa wuulupale’ ohimmwale vahinatthi? (Okhum 8:18, 19; Wis 7:13, 14; 2 Wah 16:9)
- Mmusome Okhuma 8:20; 9:3, 6, 10, 11, 14, 16, 23-25; ni 10:13-15, 21-23.
Ikrupu xeeni piili saasuwanyeehiwe ni ehukhumu ya namuloko, ni ela ennivara sai olelo moonelo ahu wa ikrupu iyo? (Okhum 8:6, 14, 15; 9:14)
Moota xeeni Okhuma 9:16 onnikhaliherya awe wiiwexexa nthowa naya Yehova omweemerenrya awe Satana okhalaka mpakha vano? (aRom 9:21, 22)
- Mmusome Okhuma 12:21-32.
Moota xeeni Paasikha wiirinha awe woopola okhala wooweryaneya wa atthu anceene, nto Paasikha aathoonya exeeni? (Okhum 12:21-23; Yoh 1:29; aRom 5:18, 19, 21; 1 Akor 5:7)
