Moise aahaahoolela anaIsarayeli okhuma mweepotthani wEjiitu orowa Omwaako Sinayi, weiwo Muluku aavanha awe malamulo awe. Vattuli vaya, Moise aahaaruma alopwana 12 orowa ohottela elapo ya oKanani. Masi 10 a yaawo yaahitthika ni muhupi woohiloka. Awo yaahiwiiriha atthu ophavela ohokolowela wEjiitu. Mwaha wa othoiwa waya nroromelo, Muluku aahaahukhumu anaIsarayeli owiirihaka weetta puree mothakoni iyaakha 40.

Wanikisa waya, Yoxuwa aahithanliwa waahoolela anaIsarayeli okela elapo ya oKanani. Wira aakhaliherye okuxa elapo, Yehova aahiiriha mitikiniho wiiraneya. Owo aaheemexa maasi a Muroo Yordani, omoroxa ixirii sa Yerikhoo ni weemexa nsuwa mpakha nihiku ntero. Vattuli va iyaakha thanuu na mmosaa, aKaanani yaahaakhiwa elapo.

Opacerya ni Yoxuwa, Isarayeli aahilamuleliwa ni anamaphuka mu iyaakha 356. Ninniixutta sa anceene a yaawo, nimuhelaka muhina Baraki, Gedeyoni, Yefte, Sansoni ni Samuweli. Hiyo nave-tho ninnisoma sa athiyana ntoko Rahabi, Deebora, Yayeli, Ruthi, Nowemi ni Dalila. MPANTTA WA NEERARU wotheene, onihela muhina iyaakha 396 sa soowiiraneya.