Mwaha 35: Yehova Onivaha Malamulo awe
MOOPHIYERYAKA miyeeri miili nuumala okhuma wEjiitu, anaIsarayeli anniphiya oMwaako Sinayi, yoowo oniihaniwa-tho Horebi. Nna nipuro nimosaru nenne Yehova aalavunle awe ni Moise vamwirini mwaamukhaani aavarela. Atthu annimaka va ni annikhala mu okathi vakhaani.
Okathi yoowo atthu aniwehererya aya vathii, Moise oniwela vamwaako. Vamwaako vale vasuluu, Yehova onimuhimeerya Moise wira Owo oniphavela wi anaIsarayeli amwiiweleleke ni wi akhalee atthu Awe avameekh’aya. Vaavo Moise vanikhuruwa awe, owo onnaaleela anaIsarayeli yeeyo Yehova yaahimmya awe. Nto atthu anihimya wira anrowa omwiiwelelaka Yehova, okhala wira aniphavela okhala atthu awe.
Vano Yehova onipaka etthu yoohilimaleleya. Owo onniiriha otthuwa mwiixi vasuluu va mwaako, ni onnikumiherya etari yoorumexa. Owo nave-tho onnilavula ni atthu oriki: ‘Miyo ka Yehova Muluku anyu yoowo ookuminheni elapo ya wEjiitu.’ Nto onnilamula oriki: ‘Muhimukokhorele muluku mukina kihikhanle miyo.’
Muluku onaavaha anaIsarayeli sooruma sikina thanuu na xexee, aahiiso malamulo. Atthu arii oowoova vanceene. Awo annimuleela Moise wira: ‘Munilavuliheke yeenyu, okhala wira nnimoova wi akhala wira Muluku onoolavula ni hiyo khino nnimookhwa.’
Vattuli vaya Yehova onimuleela Moise wira: ‘Nwele mpakha varyaaka va mwaako. Kinrowa woovahani maluku manli oophapateya alempe aka malamulo yaawo kimphavela aka wira atthu asukeke.’ Siiso vasyaa-tho Moise onnirowa omwaako. Aahikhala iwe mahiku 40 othana ni ohiyu.
Muluku aahikhalana malamulo, manceenexa wa atthu awe. Moise onnilepa malamulo ala. Muluku nave-tho onninvaha Moise maluku manli oophapateya. Mmaluku ala, Muluku mwaneene aahilepa malamulo 10 yaawo yaahimmya awe wa atthu otheene. Ala aniihaniwa Sooruma Mulokoo.
Sooruma Mulokoo arii malamulo ootthuneya. Masi arii-tho ootthuneya malamulo makina yaawo Muluku yaavanha awe anaIsarayeli. Nimosaa na malamulo awo ti nna: ‘Muhaana omphenta Yehova Muluku anyu ni murima anyu wotheene, mupuwelelo anyu wotheene, erooho anyu yotheene ni ikuruu sanyu sotheene.’ Nto nikina ti nna: ‘Muhaana omphenta mukhw’inyu ntoko siniiphenta anyu.’ Mwaana a Muluku, Yesu Kristu, aahihimya wira ala arii malamulo manli maalupalexa yaawo Yehova aavanha awe atthu awe aIsarayeli. Muhoolo hiyo ninrowa wiixutta itthu sinceene voohimya sa Mwaana a Muluku ni sowiixuttiha sawe.
Okhuma 19:1-25; 20:1-21; 24:12-18; 31:18; Otumererya 6:4-6; Onamukuttho 19:18; Mateyo 22:36-40.
Makoho
- Nuumala miyeeri soophiyeryaka miili vattuli va okhuma wEjiitu, anaIsarayeli animaka vaavi?
- Exeeni Yehova enihimya awe wira oniphavela wi atthu avareke, nto atthu anaakhula sai?
- Nthowa xeeni Yehova vaninvaha awe Moise maluku manli oophapateya?
- Ohiya Sooruma Mulokoo, malamulo xeeni makina Yehova yaavanha awe anaIsarayeli?
- Malamulo xeeni manli Yesu Kristu yaahimmya awe wira takhanle maalupalexa?
Makoho oowuncererya
- Mmusome Okhuma 19:1-25; 20:1-21; 24:12-18; ni 31:18.
Moota xeeni masuu alempwale mu Okhuma 19:8 annikhaliherya aya wiiwexexa eniheliwa muhina mu opaka wiivahererya w’eKristau? (Mat 16:24; 1 Ped 4:1-3)
- Mmusome Otumererya 6:4-6; Onamukuttho 19:18; ni Mateyo 22:36-40.
Moota xeeni maKristau anooniherya aya omphenta waya Muluku ni namwaattamanani aya? (Mar 6:34; Mit 4:20; aRom 15:2)
