Mwaha 37: Eheema Ya Okokhorela
NYUWO munnisuwela exeeni etthu ela etekiwe? Ela erii eheema ya vameekh’aya ya omukokhorela Yehova. Nave-tho ela eniihaniwa etabernaakulu. Atthu yaahimaliha oteka ela ovinre ene mwaakha mmosaa nuumala okhuma wEjiitu. Munnimusuwela aari mupuwelelo awani a otekiwa ela?
Aari mupuwelelo a Yehova. Moise oryeene va Mwaako Sinayi, Yehova aahimuleela moota wooteka ela. Owo aahimuleela wira opakee ela mmukhalelo vookhweya okakanyula. Mmukhalelo ola mipantta iya sanwerya okuxiwa siroihiwaka nipuro nikinaku, nto iwe khiyarowa othukumanyiwa vasyaa-tho. Siiso vaavo anaIsarayeli vaathaama aya khuta opuro mothakoni, awo yaanikuxa eheema ele.
Akhala wira munooweha muhina mwa ekwaartu yaamukhaani eri wanikisa wa eheema, nyuwo munoowerya woona ekaaxa aahiiso nivuku. Ela eniihaniwa ekaaxa ya wataana. Ela yaahikhalana malaikha manli aahiiso makherubi oopakiwa ni eweero, nimosaa wanikisa wa khuta mpantta. Muluku aahilepa vasyaa-tho Sooruma Mulokoo mmaluku manli oophapateya, okhala wira Moise aahipwexa ale oopacerya. Nto maluku ala yaasukiwa muhina mwa ekaaxa ya wataana. Nave-tho, muhasa mmosaa a emanaa aasukiwa muhina mmo. Nyuwo munnuupuwela emanaa exeeni?
Aroni munnawe Moise orii mmosaa yoole onithanliwa ni Yehova wira okhalee muulupale aanamukuttho. Owo onaahoolela atthu omukokhorela Yehova. Nave an’awe aaxilopwana anamukuttho-tho.
Vano nkawehani ekwaartu eyo yuulupalexa ya eheema. Ehinnuwa ikwaha piili ovikana yaamukhaani. Nyuwo munnoona ekaaxa eyo aahiiso nivuku naamukhaani, yeeyo enitthuwa mwiixi vasuluu vaya? Ela erii altari nipuro nenno anamukuttho naapaha aya etthu yoowunkhela saana eniihaniwa erupani. Nto ookhala mwirii a mithuko orina mithuko mithanuu na miili. Nto etthu ya neeraru eri mukwaartu mmo meesa. Vale sinnisukiwa iphawu 12.
Vanivateni va etabernaakulu ookhala mwaapu muulupale aahiiso ebasiya, yoosariwa maasi. Anamukuttho anivarihela muteko wira yiirapihaseke. Vaakhala-tho altari muulupale. Nipuro nna, inamaa soowiiviwa sinipahiwa ntoko yoovaha wa Yehova. Eheema erii eriyari eenexa ya mixaxa, nto anaIsarayeli anikhala muheemani mwaya moorukurerya ela.
Okhuma 25:8-40; 26:1-37; 27:1-8; 28:1; 30:1-10, 17-21; 34:1, 2; aHeberi 9:1-5.
Makoho
- Etthu ela etekiwe valataratoni va eniihaniwa sai, ni enivariheliwa muteko xeeni?
- Nthowa xeeni Yehova vaamuleelalya awe Moise wira opake eheema mmukhalelo vookhweya okakanyula?
- Eniihaniwa sai ekaaxa ele eri mukwaartu yaamukhaani wanikisa wa eheema, ni exeeni ekhanle mukaaxani?
- Tanii Yehova onimuthanla awe okhala namukuttho muulupale, ni namukuttho ola muulupale onipaka exeeni?
- Muhimye masina aya itthu tthaaru mu ekwaartu yuulupale ya eheema.
- Itthu xeeni piili sikhanle vatee va etabernaakulu, nto iya sinivariheliwa muteko xeeni?
Makoho oowuncererya
- Mmusome Okhuma 25:8-40; 26:1-37; 27:1-8; ni 28:1.
Yaathoonyerya exeeni makherubi mu ‘ekaaxa ya onamoona’? (Okhum 25:20, 22; Moth 7:89; 2 Mam 19:15)
- Mmusome Okhuma 30:1-10, 17-21; 34:1, 2; ni aHeberi 9:1-5.
Nthowa xeeni Yehova vaattittimihenrya awe otthuneya waya ovikaniha okhala ooratta werutthuni wa alipa a mukuttho anirumeela mu etabernaakulu, ni moota xeeni ela yaarowa aya onivara hiyo olelo? (Okhum 30:18-21; 40:30, 31; aHeb 10:22)
Moota xeeni murummwa Paulo onooniherya awe wi etabernaakulu ni nlamulo na wataana saahimala okathi waalempe awe epaphelo awe wa maKristau aHeberi? (aHeb 9:1, 9; 10:1)
