Mwaha 46: Ixirii Sa Oyerikhoo
ENIIRIHA omora ixirii iya sa oYerikhoo exeeni? Vanikhala ntoko wira simoreliwe ebomba yuulupale. Masi mmahiku ale awo khiyaarina ibomba; awo khiyaarina hataa ikapwitthi. Ola mutikiniho mukina wa Yehova! Nrowee niixutte mmoota ela yiiranen’ya aya.
Nkawiriyanani ele Yehova enimuleela awe Yoxuwa: ‘Nyuwo ni anakhotto anyu murukureryeke muttetthe. Murukureryeke emaara emosaa khuta nihiku mpakha mahiku mathanu na mosaa. Muthateke nivuku na wataana. Anamukuttho athanuu nenli ahaana arowaka ohoolo ni woopa malope aya.
‘Nihiku na neethanu nenli nyuwo moohaana orukurerya muttetthe imaara thanuu na piili. Nuumala vo moope moorunya malope awo, ni ori otheene okhuweleleke ekhotto. Nto ixirii sinrowa omorela vathii!’
Yoxuwa ni atthu onnivara yeele Yehova enihimya awe. Ariki orukurerya, ori otheene orii oomaala. Khuuvo onilavula. Aniiwanyeya paahi malope ni ikhitto sa inawu. Anyokhani aatthu a Muluku muYerikhoo yaahikhala tthiri oowoova. Munniwerya woona mukhoi ole ooxeerya othomeiwale vaxanelani? Ti yawani exanela ele? Aayo, Rahabi aahiira yeele anamahottela yaahimmya aya wira iire. Emusi awe yotheene eri mpaani yiikasoopaka n’uwo.
Wanikisa waya, nihiku na neethanu nenli, nuumala orukurerya muttetthe imaara thanuu na piili, malope annoopiwa, anakhotto annikhuwela, nto ixirii sinnimora. Nuumala vo Yoxuwa onnihimya wira: ‘Mmwiive ori otheene mmuttettheni ni mupahee muttetthe owo. Mupahee khuta etthu. Paahi musuke eparatha, ewero, muxukhuma ni eyuuma, nto muroihe iyo munthukumanyiwa muhakhu mu empa ya Yehova.’
Wa anamahottela anli, Yoxuwa onii: ‘Mukele mpaani mwa Rahabi, ni mmukumihe owo ni emusi awe yotheene.’ Rahabi ni emusi awe ahoopowasa, ntoko siisaale anamahottela saamuleihenrya aya.
Yoxuwa 6:1-25.
Makoho
- Yehova onaaleela anakhotto ni anamukuttho opaka exeeni mmahiku mathanuu na mmosaa?
- Alopwana awo anitthuneya opaka exeeni mu nihiku na neethanu nenli?
- Ntoko sinoona anyu valataratoni va, exeeni eniiraneya ni ixirii sa oYerikhoo?
- Nthowa xeeni vale vary’aya mukhoi ooxeerya otthukweleliwe vaxanelani?
- Yoxuwa onaaleela anakhotto wiiriha exeeni muttetthe ni atthu, masi sai voohimya sa eparatha, eweero, muxukhuma ni eyuuma?
- Exeeni enileeliwa aya opaka anamahottela ale anli?
Makoho oowuncererya
- Mmusome Yoxuwa 6:1-25.
Moota xeeni weetta wa anaIsarayeli amurukureryaka Yerikhoo mu nihiku na neethanu nenli ory’aya woolikana ni muteko woolaleerya wa Anamoona a Yehova mmahiku ala a wanikisa? (Yox 6:15, 16; Yes 60:22; Mat 24:14; 1 aKor 9:16)
Moota xeeni eprofecia yoohimmwa mu Yoxuwa 6:26 vaakhwanenlya aya mu iyaakha sowiiraka 500 vattuli vaya, nto ela enniixuttiha exeeni voohimya sa masuu a Yehova? (1 Mam 16:34; Yes 55:11)
