Mwaha 49: Nsuwa Ninneemela
NKANWEHEENI Yoxuwa. Owo onihimya wi: ‘Nsuwa, mweemele!’ Nto nsuwa ninneemela. Ninneemela eriyari ya erimu oratteenexa mpakha nihiku ntero. Yehova toniiriha ela wiiraneya! Masi nrowee noone nthowa naya Yoxuwa vamphavela awe wira nsuwa nivikaniheke waarya.
Vaavo mamwene mathanuu ootakhala a elapo ya oKanani vanipacerya aya owana ni maXibioni, maXibioni annimurumiha mulopwana mmosaa wa Yoxuwa orowa oveka nikhaliheryo. ‘Mwaakuve rwaani wa hiyo!’ owo onnihimya. ‘Munoopole! Mamwene otheene a elapo ya miyaako ahoorwa owana ni arumeyi anyu.’
Okathi ene yoole Yoxuwa ni anakhotto awe otheene annirowa. Awo anneetta ohiyu wotheene. Vaavo vaniphiya aya oXibioni, atoropa a mamwene mathanuu annoova ni annipacerya otthyawa. Nto Yehova onniiriha omora wirimu maluku maalupale a maralala, nto annookhwa atoropa anceene oomaniwa ni maluku a maralala ovikana ale yiiviwe ni anakhotto a Yoxuwa.
Yoxuwa onnoona wi moohilokela nsuwa ninrowa okela. Vanrowa okhala epiphi, nto atoropa anceene a mamwene ale ootakhala mathanuu anrowa otthyawa. Ti nthowa naya Yoxuwa vanivekela awe wa Yehova nto khiyahimya wira: ‘Nsuwa, mweemele!’ Nto vaavo nsuwa vanivikaniha aya waarya, anaIsarayeli arii oolikanana okisiha oxintta ekhotto.
Mukanani aakhala mamwene manceene ootakhala yaawo anaanyokha atthu a Muluku. Vanivira iyaakha soophiyeryaka thanuu na mosaa wira Yoxuwa ni anakhotto awe yaaxintte mamwene 31 mulaponi. Vaavo ela vanipakiwa aya, Yoxuwa onnittittimiherya wira elapo y’oKanani ekawaniwe ni mahimo yaale nlelo yaaphavela opuro.
Iyaakha sinceene sinnivira, nto wanikisa waya Yoxuwa onnookhwa orina ene iyaakha 110. Okathi wotheene iiraawe ori mukumi owo ni apatthani awe, atthu awo annimwiiwelela Yehova. Masi vaavo alopwana ala ooloka vanikhwa aya, atthu annipacerya ovara itthu sootakhala ni okela mmixankihoni. Tivonto awo vaniphavela aya tthiri nikhaliheryo na Muluku.
Yoxuwa 10:6-15; 12:7-24; 14:1-5; Makhulupale 2:8-13.
Makoho
- Valataratoni va, Yoxuwa onihimya exeeni, ni nthowa xeeni?
- Yehova onimukhaliherya sai Yoxuwa ni anakhotto awe?
- Yoxuwa onaaxintta mamwene makavii aanyokhani, ni sinivira iyaakha kavii?
- Nthowa xeeni Yoxuwa vanikawa awe elapo ya oKanani?
- Yoxuwa onikhwa orina iyaakha kavii, ni exeeni eniiraneya wa atthu vattuli vaya?
Makoho oowuncererya
- Mmusome Yoxuwa 10:6-15.
Osuwela wira Yehova aaheemexa nsuwa ni mweeri wa Isarayeli, nroromelo xeeni nrina ahu olelo? (Yox 10:8, 10, 12, 13; Sal 18:4; Mir 18:10)
- Mmusome Yoxuwa 12:7-24.
Tanii tthiri aari mwaneene mu waaxintta mamwene 31 a oKanani, ni nthowa xeeni ery’aya ela yootthuneya wa hiyo olelo? (Yox 12:7; 24:11-13; Otum 31:8; Luk 21:9, 25-28)
- Mmusome Yoxuwa 14:1-5.
Elapo yaakawaniwe sai eriyari ya mahimo a Isarayeli, ni ela enithoonyiherya exeeni voohimya sa waakheliwa wa elapo mParayiisu? (Yox 14:2; Yes 65:21; Ezek 47:21-23; 1 aKor 14:33)
- Mmusome Yoxuwa 2:8-13.
Moolikana ni Yoxuwa wIsarayeli, tanii olelo onirumeela ntoko yookhoottiherya ya omwareya? (Makh 2:8, 10, 11; Mat 24:45-47; 2 aTes 2:3-6; Tito 1:7-9; Wis 1:1; 2:1, 2)
