Mwaha 50: Athiyana Anli Oolipa Murima
VAAVO anaIsarayeli vankela aya mmixankihoni, awo annikhuwela wa Yehova. Yehova onniwaakhula awo aavahaka ahooleli oolipa murima wira yaakhaliheryeke. Biibiliya oniwiitthana ahooleli awo okhala anamaphuka. Yoxuwa aari namaphuka oopacerya, nto anamaphuka akina vattuli vawe, masina aya yaari Otoniyeli, Ehudi ni Xamigari. Masi atthu anli yaawo yaakhalihenrye aIsarayeli athiyana, masina aya yaari Deebora ni Yayeli.
Deebora orii muthiyana mprofeta. Yehova onninvaha soohimmwa sa muhoolo, nuumala vo ola onaaleela atthu yeele Yehova enihimya awe. Deebora orii-tho namaphuka. Owo onikilaathi vathii va mwirii a korooro mu elapo ya miyaako, nto atthu anniphiya wa owo wira aphwanye nikhaliheryo na mixankiho saya.
Okathi ola Yabini tokhanle mwene oKanani. Owo ookhalana ikaaro 900 sa ekhotto. Anakhotto awe t’otupexa tivonto anaIsarayeli anceene annikhanyerereya okhala arumeyi a Yabini. Mukhulupale a anakhotto a Mwene Yabini nsina nawe ti Sisera.
Nihiku nimosaa Deebora onimwitthaniha Namaphuka Baraki, onnimuleela wira: ‘Yehova ohimmye so: “Mwaakuxe alopwana 10.000 ni mwaaroohe oMwaako Tabori. Weiwo kinimooruuhelani Sisera. Nto kinrowa woovahani owo ni anakhotto awe wira mwaaxintte.”
Baraki onnihimya wa Deebora: ‘Kinoorowa akhala wira nyuwo-tho munrowa ni miyo.’ Deebora onnirowa noothe, masi owo onnihimya wa Baraki: ‘Ovuwa mwaha wa oxintta ekhotto khonrowa okhalana ni nyuwo, okhala wira Yehova onrowa omunnyererya Sisera mmatatani mwa muthiyana.’ Nto ela ti etthu eniiraneya.
Baraki onnikhuruwa oMwaako Tabori wira akumane ni atoropa a Sisera. Mootutuxerya Yehova onnikumiherya osarya wa maasi, nto atoropa anceene aanyokhani annimiryeya. Masi Sisera onnikela mukaaroni mwawe ni khiyatthyawa.
Moovira okathi vakhaani Sisera onniphiya vaheemani ya Yayeli. Ola onnimwiirela okela, nto onninvaha eleeti. Ela ennimwiiriha owo ophwanya ikhove, niinanoru onnirupa vaalupalexa. Nuumala vo Yayeli onnikuxa ekhomo ya eheema nto khukhomela vamuruu va mulopwana ola ootakhala. Ovinre ene okathi, vaavo Baraki vaniphiya awe, owo onimooniherya Sisera ookhwa ene! Siiso nyuwo munoowerya woona wi ele yaahimmye Deebora yaahiiraneya.
Wanikisa waya Mwene Yabini onniiviwa-tho, nto anaIsarayeli annikhalana murettele mwa okathi wa vakhaani.
Makhulupale 2:14-22; 4:1-24; 5:1-31.
Makoho
- Anamaphuka tanii, ni masina a akina a yaawo taavi?
- Eparakha xeeni ya vameekh’aya Deebora erina awe, ni exeeni eniheliwa muhina?
- Vaavo Isarayeli vanoopopihiwa awe ni Mwene Yabini ni mukhulupale aanakhotto awe, Sisera, muhupi xeeni onikhuma wa Yehova, Deebora oninvaha awe Namaphuka Baraki? Nto muthiyana owo onihimya wira tanii onrowa ophwanya ovuwa?
- Yayeli onooniherya sai wira orii muthiyana oolipa murima?
- Exeeni eniiraneya nuumala okhwa Mwene Yabini?
Makoho oowuncererya
- Mmusome Makhulupale 2:14-22.
Moota xeeni anaIsarayeli yiiruuhenlya aya ninnyaari na Yehova, ni yowiixutta xeeni nniwerya ahu ophwanya mwa yeela? (Makh 2:20; Mir 3:1, 2; Ezek 18:21-23)
- Mmusome Makhulupale 4:1-24.
Sowiixutta xeeni voohimya sa waamini ni olipa murima mu matakiheryo a Deebora ni Yayeli anwerya aya wiixutta olelo maKristau athiyana? (Makh 4:4, 8, 9, 14, 21, 22; Mir 31:30; 1 aKor 16:13)
- Mmusome Makhulupale 5:1-31.
Voohimya sa ekhotto enirwa ya Harmagedoni, moota xeeni nsipo na oxintta na Baraki ni Deebora ninwerya aya ovariheliwa muteko ntoko nivekelo? (Makh 5:3, 31; 1 Wah 16:8-10; Wis 7:9, 10; 16:16; 19:19-21)
