MBIIBILIYA munrowa ophwanya eliivuru eniitthaniwa Ruthi. Orii mwaha wa emusi yaakhanle okathi yoole aIsarayeli waarina aya anamaphuka. Ruthi mwali onikhuma elapo ya oMowabi; owo khahiyo muIsarayeli nloko na Muluku. Masi vaavo Ruthi vaniixutta awe sa Yehova Muluku eekeekhai, ola onnimphenta owo vanceenexa. Nowemi orii muthiyana oowuuluvala yoowo omukhalihenrye Ruthi wiixutta sa Yehova.

Nowemi orii muthiyana muIsarayeli. Ola ni iyawe ni an’awe aaxilopwana anli yaahithaamela elapo ya oMowabi okathi waarya aya yoolya vakhaani wIsarayeli. Nuumala vo nihiku nimosaa iyawe Nowemi aahikhwa. Vavinre ene okathi an’awe Nowemi aaxilopwana yaahaathela aximwali anli a oMowabi yiitthaniwa Ruthi ni Orpa. Masi nuuvira iyaakha soophiyeryaka 10, an’awe Nowemi aaxilopwana anli yaahikhwa. Moota saari aya ooriipiwa murima Nowemi ni aximwali ale anli! Vano Nowemi aakela wiira exeeni?

Nihiku nimosaa Nowemi onnilakela opaka mukwaha woorakama wootthikela elapo ya atthu awe. Ruthi ni Orpa aniphavela okhala n’uwo, nto awo annirowa-tho hoothe. Masi yeettale ene mukwaha mphironi, Nowemi aahirukunuwa ni onahimya wa imwali iye wira: ‘Mutthikelase owaani nto mwakhaleke ni aximaam’inyu.’

Nowemi aahaabexari aximwali aalaxeryaka. Okathi yoowo awo yaahipacerya wunla, okhala wira yaanimphenta vanceenexa Nowemi. Awo yaahihimya wira: ‘Nnaari! Ninrowa ni nyuwo ori atthu anyu.’ Masi Nowemi onnaakhula wira: ‘Nyuwo muhaana otthika, anaaka. Vanrowa oreera wa nyuwosa okhala owaani.’ Siiso-nto Orpa aahipacerya otthikela owaani. Masi Ruthi khonrowa.

Nowemi aahirukunuwa ni aahihimya wa owo: ‘Orpa oorowa. Nyuwo-tho muroweke owaani n’uwo.’ Masi Ruthi onaakhula oriki: ‘Muhikikhanyererye woohiyani! Mukihiye kiroweke ni nyuwo. Onirowa anyu ni miyo kinoorowa, ni onirowa anyu okhalaka ni miyo kinrowa okhalaka weiwo. Atthu anyu anrowa okhala atthu aka, ni Muluku anyu onrowa okhala Muluku aka. Onrowa anyu okhwa ni miyo kinrowa okhwela weiwo, ni weiwo tonrowa aka ovithiwa.’ Vaavo Ruthi vanihimya awe ela, Nowemi khoneererya-tho omwiiriha orowa owaani.

Wanikisa waya athiyana ala anli anniphiya wIsarayeli. Opuro ola awo annimaka. Ruthi niinanoru onnipacerya ovara muteko mmatta, okhala wira ola okathi wa othukumanya esevada. Mulopwana oniihaniwa Bowazi onnimuhiya othukumanyaka esevada mmatta mwawe. Nyuwo munnimusuwela tanii aari maama awe Bowazi? Aari Rahabi a muttetthe wa oYerikhoo.

Nihiku nimosaa Bowazi onimuleela Ruthi wira: ‘Kihiiwa soohimmwa sotheene sa nyuwo, nto moota mwaamureerenlya anyu murima Nowemi. Miyo koosuwela moota mwaamuhin’ya anyu tiith’inyu ni maama anyu ni elapo anyu ni moota saakhanlya anyu eriyari ya atthu yaawo yahaasuwela anyu khalai. Nto Yehova ooreereleni murima!’

Ruthi onaakhula wira: ‘Khimurookireerela murima, napwiya. Mookiriiriha murima mmoota silavunlya anyu ni miyo.’ Bowazi onnisiveliwa vanceene ni Ruthi, nto khonvira okathi munceene ahithelanne. Moota yaamuhakalalinha aya eyo Nowemi! Masi Nowemi ootteeliwa murima vaavo Ruthi ni Bowazi vanikhalana aya mwaana oopacerya mwaamulopwana, oniihaniwa Obedi. Vattuli vaya Obedi onnikhala taata a Davidi, ninrowa wiixutta sinceene sa yoowo muhoolo.

Eliivuru ya Biibiliya ya Ruthi.