Mwaha 52: Gedeyoni Ni Alopwana Awe 300
NYUWO munniweha ele eniiraneya va? Otheene ala arii anakhotto a Isarayeli. Alopwana awo anuuramela vathii anoowurya. Namaphuka Gedeyoni mulopwana owo eemenle moowaattamela awosa. Owo oniweha moota awo siniwuurya aya maasi.
Nkawehani vakhiviru vene inamuna soovirikana mmemmo alopwana awo siniwurya aya. Akina anuuramiha ethoi aya mpakha mmaasini. Masi mmosaa onrika maasi ni matata awe, wira oweryeke woona eniiraneya moomurukurerya. Ela ti yootthuneya, okhala wira Yehova aahimwiirela Gedeyoni wira aathanle paahi alopwana yaawo okathi oniwurya aya anivikaniha oweha-weha. Akina a yaawo, Muluku aahimmye wira, ahaana ottikiheriwa owaani. Nrowee niwehee nthowa naya.
AnaIsarayeli arii-tho mmixankiho suulupale. Mwaha aya toowi awo khiyaamwiiwelenle Yehova. Atthu a oMadiyani ahaawerya ni annaahaaxa awosa. Siiso-nto anaIsarayeli annikhuwela wa Yehova wira akhaliheriwe, nto Yehova onniiwa okhuwela waya.
Yehova onimuleela Gedeyoni wira aatthokihe anakhotto, nto Gedeyoni onnaathukumanya anakhotto 32.000. Masi aakhala anakhotto 135.000 aniwana ni Isarayeli. Hataa vari siiso Yehova onimuleela Gedeyoni wira: ‘Nlelo khimureerane alopwana.’ Nthowa xeeni Yehova ohimyaka eyo?
Nthowa noowi vaakhanleke wira aIsarayeli aaxintta ekhotto, awo yaarowa wuupuwelaka wira axinttale mwa ikuruu saya. Awo yaamuupuwelaka wira khinaatthuneya nikhaliheryo na Yehova wira axintte. Siiso Yehova onihimya wa Gedeyoni wira: ‘Mwaaleele alopwana otheene oowoova wira atthikele owaani.’ Vaavo Gedeyoni vanipaka awe ela, anakhotto awe 22.000 annitthikela owaani. Onihalana paahi anakhotto 10.000 wira awaneke ni atoropa otheene ale 135.000.
Masi, nkawiriyanani! Yehova onihimya wira: ‘Nlelo nyuwo mookhalana alopwana anceene.’ Nto onimuleela Gedeyoni wira owiirihe alopwana awo owurya maasi vamuroo ni waattikiherya owaani atthu otheene yaale anuuramiha ethoi aya mmaasini wira awurye. ‘Miyo kinrowa woovahani oxintta ni alopwana 300 yaawo aniweha-weha okathi oniwurya aya,’ Yehova onnimmana natiri.
Okathi wa ekhotto onniphiya. Gedeyoni onaakuha alopwana 300 mu ikrupu tthaaru. Owo onimunnya nlope khuta mulopwana, ni mwaapu wookhalana muthuko muhina mwawe. Vaavo vaary’aya ohiyu eriyari, otheene aya annithukumana moorukurerya mixaxa sa atoropa anyokhani aya. Nuumala vo, okathi yoowo, otheene aya annoopa malope aya ni annipwexa miyaapu, khiyakhuwela yiiraka: ‘Ekatana ya Yehova ni ya Gedeyoni!’ Vaavo anyokhani vanivenya aya vaarupa aya, awo annaakanyerereya mupuwelelo ni annoova. Otheene aya annipacerya otthyawa, nto anaIsarayeli annixintta ekhotto.
Makhulupale ekapitulu 6 mpakha 8.
Makoho
- Moota xeeni ni nthowa xeeni anaIsarayeli ary’aya mmixankiho sinceene?
- Nthowa xeeni Yehova onimuleela awe Gedeyoni wira anakhotto awe khareere?
- Alopwana akavii anihala nuumala Gedeyoni waaleela alopwana oowoova otthikela owaani?
- Murumeelaka elatarato, muhimye moota Yehova sinaavukula awe anakhotto a Gedeyoni wira ahale paahi 300.
- Gedeyoni onaatthokiha sai alopwana awe 300, ni moota xeeni aIsarayeli anixintta aya ekhotto?
Makoho oowuncererya
- Mmusome Makhulupale 6:36-40.
Gedeyoni aapanke-ni wira osuwelexe yotthuna ya Yehova?
Moota xeeni hiyo olelo ninkela ahu osuwela tiivi eri yotthuna ya Yehova? (Mir 2:3-6; Mat 7:7-11; 2 Tim 3:16, 17)
- Mmusome Makhulupale 7:1-25.
Etthu xeeni ninwerya ahu wiixutta mwa ale 300 yaavikaninhe okhala ooweha-weha moovirikana ni ale yahaaweha-weha? (Makh 7:3, 6; aRom 13:11, 12; aEf 5:15-17)
Ntoko siisaale ale 300 yiixuntta aya mu onweha Gedeyoni, moota xeeni hiyo nniixutta ahu mu onweha Gedeyoni Muulupale, Yesu Kristu? (Makh 7:17; Mat 11:29, 30; 28:19, 20; 1 Ped 2:21)
Makhulupale 7:21 onnikhaliherya sai okhala oohakalala mu orumeela opuro ori wotheene onthanleliwa ahu mmulokiheryo a Yehova? (1 aKor 4:2; 12:14-18; Yak 4:10)
- Mmusome Makhulupale 8:1-3.
Vaavo vanthokorerya ahu mixankiho sahu ni munna aahiiso murokora, exeeni ninwerya ahu wiixutta mmukhalelo yoowo Gedeyoni saaphunka awe onyakulihana ni atthu a Efrayimi? (Mir 15:1; Mat 5:23, 24; Luk 9:48)
