KHAHIYO mwammiravo ooreera ola? Nsina nawe ti Samuweli. Nto mulopwana okunhe ntata nawe vamuruu va Samuweli ti Eli muulupale aanamukuttho a Isarayeli. Elikana ole ti paapa awe Samuweli ni Ana amama awe ti yaawo animuruuha Samuweli wa Eli.

Samuweli orina paahi iyaakha soophiyeryaka xexee aahiiso thanuu. Masi owo onrowa okhalaka va mutabernaakulu a Yehova vamosaa ni Eli ni anamukuttho akina. Nthowa xeeni Elikana ni Ana vaninvaha aya mwaana ooyeva ntoko Samuweli wira omurumeeleke Yehova mutabernaakulu? Nrowee niwehee.

Saari iyaakha vakhaani paahi ehiiranen’ye ela vaavo Ana aarya awe ooriipiwa murima vanceene. Nthowa noowi owo khaayara, ni aanimphavela mwaana vanceenexa. Siiso nihiku nimosaa vaavo Ana vaaxukurya awe etabernaakulu ya Yehova, owo aahivekela oriki: ‘Oh Yehova, muhikiliyale! Vakhala wira munookivaha mwaana, kinimmana natiri wira kinrowa woovahani wira oorumeelekeni okumi awe wotheene.’

Yehova aahaakhula nivekelo na Ana, nto sivinre ene miyeeri owo onnimuyara Samuweli. Ana aahimphenta mwammiravo awe, ni aahipacerya omwiixuttiha sa Yehova vaavo varya awe nlelo mwaamukhaanixa. Owo aahimuleela iyawe wira: ‘Mowaakuveyexa vaavo Samuweli vaninnuwa awe moophiyerya ohinatthuneya waamwihiwa-tho, kinrowa omurooha otabernaakulu wira amurumeeleke Yehova iwe.’

Ela ti etthu enoona ahu Ana ni Elikana yiiraka valataratoni va. Ni okhala wira Samuweli ohiixuttihiwa saana ni axitiithi awe, owo orii oohakalala omurumeela Yehova opuro ola muheemani mwa Yehova. Khuta mwaakha Ana ni Elikana annoorwa okokhorela vaheemani va yavameekh’aya, ni omuxukurya mwammiravo aya. Ni khuta mwaakha Ana oniruuha nlaya nsyaa noohikhalana miyoono nenno nimpakenlya awe Samuweli.

Moovira wa iyaakha, Samuweli onnivikaniha orumeela mutabernaakulu mwa Yehova, nto hataa Yehova aahiiso atthu aanimphenta owo. Masi an’awe Eeli muulupale aanamukuttho, Hofini ni Pineha khahiyo ooloka. Awo anivara itthu sinceene sootakhala, nto anniwiiriha akina ohimwiiwelela-tho Yehova. Eli ohaana waakumiha awosa okhala anamukuttho, masi khoniira.

Mmiravo owo Samuweli khonihiya itthu siri sotheene soonanara sinivariwa mutabernaakulu simwiirihaka owo ohiya omurumeela Yehova. Masi okhala wira atthu vakhaani mwekeekhai tanimphenta Yehova, woovira okathi munceene okhuma vaavale Yehova vaalavunlya awe ni mutthu ori otheene. Vaavo Samuweli vaninnuwa awe vakhaani, etthu eniiraneya tiila:

Samuweli onoorupa mutabernaakulu vaavo nsuu vaninvenxa aya. Owo onaakhula so: ‘Miyo kirii va.’ Nto onnivenya ni onatthyawa orowaka wa Eli, ni onahimya wira: ‘Nyuwo mookiihana, nto miyo kirii va.’

Masi Eli onaakhula so: ‘Nkiwiihanneni; mutthikele vakhaamani.’ Siiso Samuweli onnitthikela vakhaamani.

Nto nno wiihaniwa wa nenli: ‘Samuweli!’ Siiso Samuweli onnivenya ni onatthyawa orowaka-tho wa Eli. ‘Nyuwo mookiihana, nto miyo kirii va,’ owo onnihimya. Masi Eli onaakhula so: ‘Nkiwiihanneni, mwan’aka. Mwammaathi-tho.’ Siiso Samuweli onnitthikela vakhaamani.

‘Samuweli!’ nsuu niniihana mukwaha wa neeraru. Siiso Samuweli onitthyawa orowaka wa Eli. ‘Miyo kirii va, tthiri mookiihana mukwaha ola,’ owo onnihimya. Eli oosuwela vano wira pooti okhala Yehova oniitthana. Siiso owo onimuleela Samuweli wira: ‘Murowee mutthikele mukwaha mmosaa wummaathi, ni vakhala wira owo onimwiihana-tho, nyuwo moohaana ohimya so: “Mulavuleke, Yehova, okhala wira murummwa anyu onniwiriyana.”’

Ela tiiyo Samuweli enihimya awe vaavo Yehova vaniihana awe vasyaa-tho. Nuumala vo Yehova onimuleela Samuweli wira onrowa omulaka Eli ni an’awe. Valokenle ene Hofini ni Pineha annookhwa mukhottoni ni aFilisti, nto vaavo Eli vaniiwa awe yeele yiiranen’ye owo onimorela ottuli, onninta exiko awe ni khiyakhwa-tho. Siiso masuu a Yehova yaahaakhwanela.

Samuweli onninnuwa, ni onnikhala namaphuka ookiserya a wIsarayeli. Vaavo vanuuluvala awe, atthu aninvekela wira: ‘Mmuthanle mwene wira onilamuleleke.’ Samuweli khomphavela opaka ela, okhala wira Yehova tthiri tokhanle mwene aya. Masi Yehova onimuleela wira owiiwelele atthu awo.

1 Samuweli 1:1-28; 2:11-36; 3:1-18; 4:16-18; 8:4-9.