Mwaha 62: Mixankiho Vatthokoni Va Davidi
NUUMALA Davidi opacerya olamulela oYerusalemu, Yehova onaavaha anakhotto awe oxintta wunceene wa anyokhani aya. Yehova aahilakela ovaha elapo ya oKanani wa anaIsarayeli. Nto vano, nnikhaliheryo na Yehova, ilapo sotheene saapakeliwa aya natiri, wanikisa waya saahikhala sawaya.
Davidi orii namalamulela ooloka. Owo onnimphenta Yehova. Siiso emosaa sa itthu soopacerya seiyo onipaka awe nuumala okela oYerusalemu orii oruuha vale nivuku na wataana na Yehova. Nto owo oniphavela oteka empa ya Muluku wira okuhe nivuku nna.
Vaavo Davidi vaaluvanlya awe, owo onnipaka yoottheka yootakhala. Davidi oosuwela wira ti voonanara okuxa etthu ya mutthu mukina. Masi makaaripi omosaa, vaavo vary’awe vaniphironi va empa awe ya vasuluu, owo onniweha vathii ni onamoona muthiyana ooreera saana. Nsina nawe ti Bathi-Xeba, nto iyawe orii mmosaa aatoropa awe oniitthaniwa Uriya.
Davidi onnimphavela vanceenexa Bathi-Xeba mpakha omwiitthaniha owannyawe. Iyawe kokhanle orii okhottoni. Saana, Davidi onnirupana ni vattuli vaya owo onnisuwela wira onrowa okhalana mwaana. Davidi ooxanka vanceene nto onnirumiha muhupi wa muhooleli aanakhotto Yowabi wira omuhele Uriya ohoolo wa ekhotto weiwo onrowa awe wiiviwa. Vaavo Uriya vanikhwa awe, Davidi onnimuthela Bathi-Xeba.
Yehova oonanariwa vanceene ni Davidi. Siiso onimuruma murumeyi awe Natani wira omuleele voohimya sa sottheka sawe. Nyuwo munoowerya onweha Natani vale olavulaka ni Davidi. Davidi onniikhupanyiha vanceene voohimya sa ele epanka awe, siiso-nto Yehova khonimwiiva. Masi Yehova onihimya so: ‘Okhala wira nyuwo moopaka itthu iya sootakhala, nyuwo munrowa okhalana mixankiho sinceene vatthokoni vanyu.’ Nto moota Davidi orina awe muxankiho!
Wanipacerya, mwaana a Bathi-Xeba onnookhwa. Nto Aminoni mwaana oopaceriwa a Davidi onnimukuxa ekhawe murokora awe Tamari ni onnimukhanyererya orupana. Absalomi mwaana a Davidi oonanariwa vanceene mwaha wa ela mpakha omwiiva Aminoni. Vattuli vaya, Absalomi aahiphwanya waakhuleliwa ni atthu anceene, nto owo aahiipaka mwene. Wanikisa waya, Davidi onnixintta ekhotto wa Absalomi, yoowo oniiviwa. Aayo, Davidi ookhalana mixankiho sinceene.
Eriyari ya itthu iya sotheene, Bathi-Xeba onnimuyara mwaana oniitthaniwa Salomoni. Vaavo Davidi vanuuluvala awe ni owereiwa, mwanawe Adoniya oneererya wiihela omwene. Mwaha wa yeeyo Davidi aahiiriha wira namukuttho oniitthaniwa Sadoki iitthele makhura vamuruu va Salomoni wira ooniherye wi Salomoni tonrowa okhala mwene. Niinanoru nuumala eyo Davidi onnookhwa orina ene iyaakha 70. Owo oolamulela iyaakha 40, masi vano Salomoni tori mwene a Isarayeli.
2 Samuweli 11:1-27; 12:1-18; 1 Mamwene 1:1-48.
Makoho
- Nnikhaliheryo na Yehova, exeeni eniiraneya wanikisa waya ni elapo ya oKanani?
- Exeeni eniiraneya makaaripi omosaa vaavo Davidi vary’awe vaniphironi va empa awe ya vasuluu ya omwene?
- Nthowa xeeni Yehova onanariwa awe vanceene ni Davidi?
- Valataratoni va, tanii Yehova onimurumiha awe omuleela Davidi sa soottheka sawe, ni exeeni mulopwana owo enihimya awe wira enrowa omwiiraneela Davidi?
- Muxankiho xeeni Davidi orina awe?
- Vattuli va Davidi, tanii onikhala mwene a Isarayeli?
Makoho oowuncererya
- Mmusome 2 Samuweli 11:1-27.
Moota xeeni ovareya mmuteko wa Yehova ory’aya yoowaakiha wa hiyo?
Davidi aamorenle sai mu yoottheka, ni yoolopola xeeni ela enivaha aya wa arumeyi a Yehova olelo? (2 Sam 11:2; Mat 5:27-29; 1 aKor 10:12; Yak 1:14, 15)
- Mmusome 2 Samuweli 12:1-18.
Etthu xeeni axitokweene ni axitiithi eniwerya aya wiixutta moota Natani aamwaattamenlya awe Davidi wira onvahe nikhaliheryo? (2 Sam 12:1-4; Mir 12:18; Mat 13:34)
Nthowa xeeni Yehova vaamoonenlya awe ikharari Davidi? (2 Sam 12:13; Sal 32:5; 2 aKor 7:9, 10)
