Mwaha 66: Yezabeli Pwiyamwene Ootakhala
NUUMALA okhwa Mwene Yerobowamu, khuta mwene yoowo onilamulela omwene wa mahimo 10 a onikela epheyo a wIsarayeli tootakhala. Mwene Akhabi orii mwene ootakhalexa waavikana otheene. Nyuwo munnisuwela nthowa naya? Nthowa nimosaa nuulupale ti mwaarawe, Yezabeli Pwiyamwene ootakhala.
Yezabeli khahiyo muthiyana muIsarayeli. Owo mwaana mwaamuthiyana a mwene ooSidoni. Ola onimukokhorela Bayali muluku a ethiru, ni owo onnimwiiriha Akhabi ni anaIsarayeli anceene omukokhorela-tho Bayali. Yezabeli onnimunyokha Yehova ni oniwiiva maprofeta awe anceene. Akina yaahaana wiipitha mukhukuni wira nto ahiiviwe. Akhala wira Yezabeli oniphavela etthu, owo onnirowa hataa omwiiva mutthu wira ophwanye ela.
Nihiku nimosaa Mwene Akhabi orii ooriipiwa murima vanceene. Siiso Yezabeli onimukoha wira: ‘Xeeni oriipiwa murima olelo?’
‘Mwaha wa ele ehimmya aya aNabothi wa miyo,’ onnaakhula Akhabi. ‘Kaaphavela othuma ematta awe ya uuva. Masi okilenle wira khivanweryaneya.’
‘Muhivelavele,’ onnihimya Yezabeli ‘kinimoophwanyihani.’
Siiso Yezabeli onaalepela ipaphelo makhulupale makina a muttetthe yoole mulopwana ola Nabothi onikhala awe. ‘Nwiirihe atthu akina ootakhala ohimya wira Nabothi onveeha Muluku ni mwene,’ owo onnaahimeerya. ‘Nto mmukumiherye Nabothi otaa wa muttetthe ni munvonyakase maluku mpakha okhwa.’
Omalakaru wiiwa Yezabeli wira Nabothi ohookhwa, owo onimuleela Akhabi wira: ‘Vano murooke ni mwakuxe ematta awe ya uuva.’ Khimunaakhulela wira Yezabeli ohaana ohukhummwa mwaha woopaka etthu eyo yootakhala?
Siiso, moovira wa okathi, Yehova onimurumiha Yehu wira omuhukhumu Yezabeli. Vaavo Yezabeli oniiwa awe wira Yehu onnoorwa, onniiripeleliha maitho awe ni wiiphapa wira oreere. Masi vaavo Yehu vaniphiya awe ni omoona Yezabeli vaxanelani, owo oniwiitthana alopwana ari mpaani mwa mwene wira: ‘Mmurihele vathii-va!’ Alopwana ale anniiwelela, ntoko siniwerya anyu oweha valataratoni va. Awo annimurihela vathii, nto onakhwa. Nno wanikisa wa Pwiyamwene ootakhala Yezabeli.
1 Mamwene 16:29-33; 18:1-4; 21:1-16; 2 Mamwene 9:30-37.
Makoho
- Yezabeli tanii?
- Nthowa xeeni Mwene Akhabi ory’awe ooriipiwa murima nihiku nimosaa?
- Yezabeli onipaka exeeni wira omwiirihe iyawe Akhabi okuxa ematta ya uuva ya Nabothi?
- Yehova onimurumiha aani wira omuhukhumu Yezabeli?
- Ntoko siniwerya anyu woona valataratoni va, exeeni eniiraneya vaavo Yehu vaniphiya awe mu empa ya omwene ya Yezabeli?
Makoho oowuncererya
- Mmusome 1 Mamwene 16:29-33 ni 18:3, 4.
Mikhalelo xeeni sootakhala sinikhala wIsarayeli okathi wa olamulelo wa Mwene Akhabi? (1 Mam 14:9)
- Mmusome 1 Mamwene 21:1-16.
Nabothi oonihenrye sai olipa murima ni ororomeleya wa Yehova? (1 Mam 21:1-3; Onam 25:23-28)
Mu ntakiheryo na Akhabi, nniixutta opaka exeeni ni onyoonyihiwa? (1 Mam 21:4; aRom 5:3-5)
- Mmusome 2 Mamwene 9:30-37.
Exeeni ninwerya ahu wiixutta mwa nthiti na Yehu mu opaka yotthuna ya Yehova? (2 Mam 9:4-10; 2 aKor 9:1, 2; 2 Tim 4:2)
