Mwaha 73: Mwene Ookiserya Ooloka A Isarayeli
YOSIYA orina paahi iyaakha thanuu na tthaaru vaavo vanikhala awe mwene a okuusini a mahimo manli a Isarayeli. Eyinnuwelo ela ti yooyeva wira mutthu okhalee mwene. Siiso wanipacerya atthu akina oowunnuwela annimukhaliherya wira olamulele nloko nno.
Vaavo Yosiya vary’awe mwene mu iyaakha thanuu na piili owo onnipacerya omphavelasa Yehova. Owo onitthara ntakiheryo na mamwene ooloka ntoko Davidi, Yosafati ni Ezekiya. Nto, nlelo oryeene mmiravo, Yosiya onipaka etthu enooniherya olipa murima.
Muokathi woorakama anamunceene a anaIsarayeli annikhala ootakhala vanceene. Awo anaakokhorela amuluku oowoka. Awo aniwuuramela amuluku a ethiru. Siiso Yosiya onnirowa ni atthu awe nto onapacerya okumiha okokhorela woowoka mulaponi mme. Ola muteko muulupale okhala wira atthu anceene anaakokhorela amuluku oowoka. Nyuwo munoowerya onweha Yosiya ni atthu awe yaapwexaka amuluku a ethiru.
Vattuli vaya, Yosiya onaakuha alopwana araruu wira aweheryeke olokiheriwa wa empa ya Yehova. Onnithukumanyiwa musurukhu onkhuma wa atthu ni onannyiwa alopwana ala wira aliverye muteko onrowa ovariwa. Ariki ovara muteko mu empa ya Muluku, Hilikiya muulupale aanamukuttho onniphwanya mme etthu yootthuneya vanceene. Ela eliivuru eneene ya nlamulo yeeyo Yehova aamurumme awe olepa Moise okathi munceene khalai-khalai. Saahivira iyaakha sinceene erimenle ene.
Eliivuru eniroihiwa wa Yosiya, nto owo oniveka wira osomeliwe. Vaavo vaniwiriyana awe, Yosiya onniwerya woona wi atthu khavikaninhe okhapelela nlamulo na Yehova. Owo onniriipiwa murima vanceene mwaha wa ela, nto owo onikhera ikuwo sawe, ntoko nyuwo siniwerya anyu oweha va. Owo onihimya so: ‘Yehova oonanariwa ni hiyo, okhala wira axitiithi ihu khiyaavikaninhe okhapelela malamulo alempwale muliivuruni-mu.’
Yosiya onimuruma Hilikiya muulupale aanamukuttho wira ophavelase osuwela yeeyo Yehova enrowa awe owiiriha. Hilikiya onirowa wa muthiyana Hulda, yoowo orii profeta, ni onamukoha. Ola oninvaha muhupi onikhuma wa Yehova wira oroohe wa Yosiya: ‘Yerusalemu ni atthu otheene anrowa ohukhummwa okhala wira awo ahaakokhorela amuluku oowoka ni elapo yoosareya otakhala. Masi okhala wira nyuwo, Yosiya, moopaka yeele eri yooloka, ohukhumu nno khonrowa orwa mpakha okhwa wanyu.’
2 Wahala 34:1-28.
Makoho
- Yosiya orina iyaakha kavii vaavo vanikhala awe mwene, ni exeeni enipacerya awe opaka vaavo vanikhala awe mwene mu iyaakha thanuu na piili?
- Muninweha Yosiya opakaka exeeni mu elatarato yoopacerya?
- Muulupale aanamukuttho oniphwanya exeeni vaavo alopwana vanilokiherya aya empa ya Muluku?
- Nthowa xeeni Yosiya vanikhera awe ikuwo sawe?
- Muhupi xeeni onikhuma wa Yehova, muthiyana Hulda yoowo ori profeta oninvaha awe Yosiya?
Makoho oowuncererya
- Mmusome 2 Wahala 34:1-28.
Ntakiheryo xeeni Yosiya onivaha awe wa yaale waaniheryasa yaarina muxankiho onamwane aya? (2 Wah 33:21-25; 34:1, 2; Sal 27:10)
Sowiira xeeni sootthuneya Yosiya saapanke awe wira onnuuherye okokhorela wekeekhai okathi wa iyaakha sa 8, 12 ni 18 sa olamulelo awe? (2 Wah 34:3, 8)
Itthu xeeni siniwerya ahu wiixutta mu matakiheryo a Mwene Yosiya ni Namukuttho Muulupale Hilikiya mu ovikaniha olokiherya opuro ahu wa okokhorela? (2 Wah 34:9-13; Mir 11:14; 1 aKor 10:31)
